សមាជបក្សកុម្មុយនិស្តចិនចាប់បើកជាផ្លូវការដើម្បីផ្លាស់ប្តូរមេដឹកនាំ
បន្ទាប់ពីអាមេរិក កាលពីថ្ងៃអង្គារ នៅថ្ងៃព្រហស្បតិ៍នេះ ដល់វេនចិនម្តង ដែលត្រូវធ្វើការផ្លាស់ប្តូរមេដឹកនាំថ្មី។ សមាជបក្សកុម្មុយនិស្តចិនបានចាប់ផ្តើមបើកធ្វើជាផ្លូវការ នៅព្រឹកមិញ ហើយនៅក្នុងសមាជរយៈពេលមួយសប្តាហ៍នេះ បក្សកុម្មុយនិស្តចិននឹងធ្វើការជ្រើសរើសថ្នាក់ដឹកនាំថ្មី ចាប់តាំងពីសមាជិកគណៈមជ្ឈិម រហូតដល់អគ្គលេខាបក្ស។ ផ្ទុយពីអាមេរិក ដែលគេត្រូវរង់ចាំលទ្ធផលបោះឆ្នោតទើបដឹងឈ្មោះមេដឹកនាំថ្មី នៅចិនវិញ គេបានដឹងជាមុនទៅហើយថាអ្នកណាដែលនឹងត្រូវឡើងមកស្នងតំណែងពីលោកហ៊ូ ជីនតាវ។
ចុះផ្សាយនៅថ្ងៃ៖
ស្តាប់ - ០១:៥០
ក្នុងចន្លោះពេលគ្នាតែប៉ុន្មានថ្ងៃ ចិន និងអាមេរិក សុទ្ធតែត្រូវធ្វើការផ្លាស់ប្តូរមេដឹកនាំថ្មី ហើយការផ្លាស់ប្តូរមេដឹកនាំនៅក្នុងប្រទេសទាំងពីរនេះ សុទ្ធតែទាក់ទាញចំណាប់អារម្មណ៍យ៉ាងខ្លាំងពីស្ទើរតែគ្រប់ប្រទេសនៅទូទាំងពិភពលោក។ នេះគឺដោយសារតែចិន និងអាមេរិក សុទ្ធតែជាមហាអំណាចពិភពលោក ហើយនយោបាយក្នុងប្រទេសទាំងពីរនេះ អាចមានផលប៉ះពាល់ទៅដល់ពិភពលោកទាំងមូល។
ក៏ប៉ុន្តែ ខុសពីសហរដ្ឋអាមេរិក ដែលមេដឹកនាំត្រូវជ្រើសរើសតាមរយៈការបោះឆ្នោតជាតិ ហើយគេត្រូវរង់ចាំក្រោយការបោះឆ្នោតទើបដឹងអ្នកឈ្នះ អ្នកចាញ់ នៅចិនវិញ ជាប្រទេសដឹកនាំដោយបក្សតែមួយ ហើយឈ្មោះមេដឹកនាំថ្មីត្រូវបានគេដឹងជាយូរណាស់មកហើយ គឺលោកស៊ី ជីនពីង (Xi Jinping) នឹងត្រូវឡើងមកជំនួសលោកហ៊ូ ជីនតាវ ជាអគ្គលេខាបក្ស និងបន្ទាប់មកជាប្រធានាធិបតី ចំណែកតំណែងនាយករដ្ឋមន្រ្តីរបស់លោកវេន ជាប៉ាវ វិញ នឹងត្រូវផ្ទេរទៅឲ្យលោកលី ខឺឈាំង (Li Keqiang) បច្ចុប្បន្នជាឧបនាយករដ្ឋមន្រ្តី។
អ្វីដែលគេនៅទន្ទឹងរង់ចាំមើល ក្នុងសមាជបក្សកុម្មុយនិស្ត ដែលបើកធ្វើនៅព្រឹកមិញនេះ គឺសមាសភាពនៃគណៈអចិន្រ្តៃយ៍ ដែលមានសមាជិកទាំងអស់ ៩រូប ហើយជាស្ថាប័នដែលមានអំណាចកំពូលក្នុងបក្ស។ គេរង់ចាំមើលថា តើសមាជិកថ្មីនៃគណៈអចិន្រ្តៃយ៍នេះភាគច្រើនជាអ្នកមានគំនិតអភិរក្សនិយម ឬក៏ជាអ្នកកំណែទម្រង់និយម?
នៅក្នុងសុន្ទរកថាបើកសមាជបក្ស នៅព្រឹកមិញនេះ លោកហ៊ូ ជិនតាវ បានលើកឡើងពីភាពចាំបាច់ ដែលចិនត្រូវតែធ្វើកំណែទម្រង់ ទាំងខាងសេដ្ឋកិច្ច និងខាងនយោបាយ ក៏ប៉ុន្តែ លោកក៏បានបញ្ជាក់ផងដែរថា កំណែទម្រង់ទាំងនេះត្រូវតែធ្វើឡើងដោយប្រយ័ត្នប្រយែង។
លោកហ៊ូ ជិនតាវ ក៏បានធ្វើការព្រមានផងដែរ ពីគ្រោះថ្នាក់បង្កឡើងដោយអំពើពុករលួយ ដែលចិនចាំបាច់ត្រូវតែលុបបំបាត់ឲ្យបាន។ លោកបានសង្កត់ធ្ងន់ថា អ្នកណាដែលរំលោភច្បាប់ ត្រូវតែនាំទៅជំនុំជម្រះនៅតុលាការ បើទោះជាអ្នកនោះមានតំណែងធំប៉ុណ្ណាក៏ដោយ។
គួររំឭកឡើងវិញថា លោកប៉ូ ស៊ីឡៃ ដែលជាអតីតមន្រ្តីជាន់ខ្ពស់ និងមានឥទ្ធិពល ក្នុងបក្សកុម្មុយនិស្តចិន ទើបនឹងត្រូវបានបណ្តេញចេញពីបក្ស និងពីសភា ហើយកំពុងប្រឈមមុខនឹងតុលាការ ពីបទពុករលួយ និងការប្រើអំណាចដោយខុសច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ