នាវាចិនចាកចេញពីតំបន់សមុទ្រជាប់ជម្លោះក្រោយទស្សនកិច្ចរបស់លោកឌុយទែរតេ
នាវាល្បាតដែនសមុទ្ររបស់ចិនបានចាកចេញពីតំបន់ប្រជុំកោះជាប់ជម្លោះជាមួយហ្វីលីពីនហើយ។ នេះគឺជាការអះអាងរបស់មន្រ្តីរដ្ឋាភិបាលក្រុងម៉ានីល នៅថ្ងៃសៅរ៍នេះ។ ការដកនាវាល្បាតចិននេះបានកើតមានឡើង តែប្រមាណជាមួយសប្តាហ៍ប៉ុណ្ណោះ ក្រោយពីដំណើរទស្សនកិច្ចរបស់លោកប្រធានាធិបតី ឌុយទែរតេ ទៅកាន់ប្រទេសចិន ដែលនៅទីនោះ លោកបានធ្វើការវាយប្រហារខ្លាំងៗទៅលើសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០១:៥១
តំបន់ Scarborough ដែលបណ្តុំទៅដោយកូនកោះតូចៗ ដោយខ្លះត្រឹមតែជាពំនូកខ្សាច់ចេញផុត់ពីផ្ទៃទឹកតែបន្តិចនោះ គឺជាតំបន់ជាប់ជម្លោះដ៏ក្តៅគគុកមួយ នៅក្នុងសមុទ្រចិនខាងត្បូង រវាងចិន និងហ្វីលីពីន។ តំបន់នេះ ដែលស្ថិតនៅត្រឹមតែចម្ងាយប្រមាណជាពីររយគីឡូម៉ែត្រពីឆ្នេរសមុទ្រហ្វីលីពីន ត្រូវបាននាវាល្បាតដែនសមុទ្រចិនចូលកាន់កាប់ និងបណ្តេញទូកនេសាទហ្វីលីពីនចេញ តាំងពីឆ្នាំ២០១២។
ជម្លោះនេះហើយដែលបានរាលដាល រហូតធ្វើឲ្យរដ្ឋាភិបាលហ្វីលីពីន ក្រោមការដឹកនាំរបស់លោកអាគីណូ បានដាក់ពាក្យបណ្តឹងទៅតុលាការអាជ្ញាកណ្តាលអន្តរជាតិក្រុងឡាអេ កាលពីឆ្នាំ២០១៣។ តុលាការបានសម្រេចឲ្យចិនជាអ្នកចាញ់ ក៏ប៉ុន្តែ រដ្ឋាភិបាលក្រុងប៉េកាំងបានបដិសេធមិនគោរពតាម។ ចំណែកឯលោកឌុយទែរតេ ដែលទើបនឹងជាប់ឆ្នោតជាប្រធានាធិបតីថ្មី ក៏បានទុកសេចក្តីសម្រេចនេះមួយអន្លើ ដោយព្យាយាមផ្សះផ្សាទំនាក់ទំនងជាមួយចិន ក្នុងពេលកំពុងមានភាពប្រេះឆាខ្លាំងជាមួយនឹងសហរដ្ឋអាមេរិក ដែលជាសម្ព័ន្ធមិត្តចាស់ឆ្នាំ។
កាលពីសប្តាហ៍មុន លោកឌុយទែរតេ នៅក្នុងដំណើរទស្សនកិច្ចទៅកាន់ប្រទេសចិន បានប្រកាសក្តែងៗ ផ្តាច់សម្ព័ន្ធភាពជាមួយអាមេរិក ដោយចង់ងាកទៅចងសម្ព័ន្ធភាពជាមួយនឹងចិន និងរុស្ស៊ីវិញ។ លោកប្រធានាធិបតីហ្វីលីពីនក៏បានថ្លែងផងដែរពីចេតនាចង់ទុកជម្លោះនៅសមុទ្រចិនខាងត្បូងមួយអន្លើសិន ដោយមិនចាំបាច់លើកយកជជែកគ្នានៅពេលនេះ ហើយកាយវិការនេះទំនងជាកំពុងតែហុចផលដល់ហ្វីលីពីន។
នៅក្រោយបញ្ចប់ទស្សនកិច្ច លោកឌុយទែរតេបានបង្ហើបឲ្យដឹងថា “ទូកនេសាទហ្វីលីពីនប្រហែលជានឹងអាចវិលត្រឡប់ទៅកាន់តំបន់ Scarborough វិញ នៅក្នុងរយៈពេលប៉ុន្មានថ្ងៃខាងមុខ”។ ហើយនៅថ្ងៃសៅរ៍នេះ មន្រ្តីអ្នកនាំពាក្យការិយាល័យប្រធានាធិបតីហ្វីលីពីន បានថ្លែងប្រាប់ទីភ្នាក់ងារព័ត៌មានបារាំងអាអែហ្វប៉េថា “គេលែងឃើញមានវត្តមាននាវាល្បាតរបស់ចិន នៅក្នុងតំបន់ជម្លោះនេះទៀតហើយ” ហើយថា “នេះគឺជាការវិវឌ្ឍជាវិជ្ជមានមួយ នៅក្នុងទំនាក់ទំនងទ្វេភាគីចិន-ហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ