តុលាការកំពូលចិន ជំរុញឱ្យជំនុំជម្រះបណ្តឹងទាក់ទងនឹងការលួចកម្មសិទ្ធបញ្ញា
តុលាការកំពូលចិន នឹងសម្រេចជំនុំជម្រះកាត់សេចក្តី ទៅលើបណ្តឹងទាំងឡាយ ពាក់ព័ន្ធនឹងការលួចកម្មសិទ្ធបញ្ញា។ ការជំនុំជម្រះ គឺនឹងចាប់ផ្តើមធ្វើឡើងនៅដើមខែមករាឆ្នាំ២០១៩នេះ។ ការប្រកាសរបស់អាជ្ញាធរចិនយ៉ាងដូច្នេះ គឺជាលើកទី១ នៅក្នុងប្រវត្តិទំនាស់ផ្នែកពាណិជ្ជកម្មនិងជំនួញ នៅស្រុកចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
បណ្តឹងសារទុក្ខ នឹងត្រូវតុលាការកំពូលចិន យកចិត្តទុកដាក់ជំនុំជម្រះ ចាប់ពីឆ្នាំថ្មីនេះតទៅ។ នេះបើតាមការបញ្ជាក់របស់លោកអនុប្រធានតុលាការកំពូល Luo Duongchan ដែលបានផ្សាយនៅក្នុងកាសែតរដ្ឋចិន។ សេចក្តីសម្រេចចិត្តនេះ គឺនឹងផ្តល់ប្រយោជន៍ ឲ្យជៀសវាងការកាត់ក្តីមិនប្រក្រតីចំពោះពាក្យប្តឹងជុំវិញការលួចចម្លងកម្មសិទ្ធបញ្ញា ហើយក៏នឹងបង្កើតគុណភាពនៃដំណើរការស្វែងរកយុត្តិធម៌ផងដែរ។ នេះបើតាមការបញ្ជាក់របស់អនុប្រធានតុលាការកំពូលដដែល។
បើយោងតាមការអះអាងរបស់សារព័ត៌មាន Xinhua នៅក្នុងឆ្នាំ២០១៧កន្លងទៅ តុលាការចិន បានដោះស្រាយពាក្យប្តឹង ចំនួនជាង២១ម៉ឺនករណី ដែលជាបណ្តឹងទាក់ទងនឹងការលួចចម្លងកម្មសិទ្ធបញ្ញា។ បើធៀបនឹងឆ្នាំ២០១៦ ការដោះស្រាយបណ្តឹងនៅឆ្នាំ២០១៧នេះ គឺច្រើនជាង៤០ដង ។
ក្រៅពីជំរុញការដោះស្រាយតាមប្រព័ន្ធតុលាការ រដ្ឋាភិបាលចិន ក៏ចាត់វិធានការណ៍ទប់ស្កាត់ការការលួចចម្លងកម្មសិទ្ធបញ្ញាដែរ ជាពិសេសគឺការពារផលិតផល ដែលចុះបញ្ជីពាណិជ្ជកម្ម សម្គាល់មាក់ទំនិញ ឬស្លាកសញ្ញា បានត្រឹមត្រូវ។
បន្ថែមពីនេះ សភាប្រជាជនចិន ក៏កំពុងតែរៀបចំគម្រោងស្នើច្បាប់ថ្មី អនុញ្ញាតឲ្យជនរងគ្រោះនៃការលួចកម្មសិទ្ធបញ្ញា អាចប្តឹងទាមទារសំណងជំងឺចិត្តនិងសំណងការខូចខាត ឲ្យបានសមរម្យស្របតាមទំហំនៃការខូចខាត។ គម្រោងស្នើច្បាប់ថ្មីនេះ នឹងពិនិត្យមើលឡើងវិញ ចំពោះករណីបង្ខំឲ្យក្រុមហ៊ុនបរទេសផ្ទេរបច្ចេកវិជ្ជារបស់ខ្លួន បើចង់រកស៊ីស្រុកចិន។ ករណីនេះ អាចនឹងត្រូវលុបចោល ឬត្រូវបន្ធូរបន្ថយ។ ហើយក្រុមហ៊ុនបរទេស ដែលរងការខូចខាតដោយសារតែការលួចចម្លងបច្ចេកវិជ្ជា អាចនឹងដាក់ពាក្យប្តឹងទាមទារសំណងវិញបានដែរ។ នេះបើយោងតាមគម្រោងស្នើច្បាប់ថ្មី។
អ្នកវិភាគសេដ្ឋកិច្ច និងអ្នកតាមដានស្ថានការណ៍ស្រុកចិន មើលឃើញថា អាជ្ញាធរចិន កំពុងតែបន្ទន់ឥរិយាបថ ឆ្លើយបតជាវិជ្ជមានចំពោះសង្គ្រាមពាណិជ្ជកម្មរវាងចិននិងអាមេរិក។ នៅក្នុងសង្គ្រាមនេះ ការលួចចម្លងកម្មសិទ្ធបញ្ញា ក៏ជាដើមហេតុចម្បងមួយ នៃការទាមទាររបស់អាមេរិក ចង់ឲ្យចិនគោរព។ ជុំវិញការមិនគោរពកម្មសិទ្ធបញ្ញានៅស្រុកចិន ទាំងអាមេរិក ទាំងសហភាពអឺរ៉ុប គឺសុទ្ធតែព្រួយបារម្ភ។ បើសិនបើចិនអនុវត្តតាមសំណើច្បាប់ថ្មីនិងវិធានការណ៍ដែលដាក់ចេញនៅពេលនេះ គឺហាក់ដូចកាយ វិការ ល្អមួយឲ្យបស្ចិមលោកកក់ក្តៅចិត្តបានខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ