យានអវកាសចិនហោះជុំវិញព្រះចន្ទ ត្រលប់មកភពផែនដីដោយសុវត្ថិភាព
យានអវកាសគ្មានមនុស្សបើករបស់ចិន ដែលបានបង្ហោះចេញកាលពីសប្តាហ៍ ឱ្យទៅហោះជុំវិញភពព្រះចន្ទ បានត្រលប់មកកាន់ភពផែនដីវិញ នៅព្រឹកថ្ងៃសៅរ៍ទី ១ វិច្ឆិកានេះ ប្រកបដោយជោគជ័យ។ នេះបើតាមការជូនដំណឹងរបស់មជ្ឈមណ្ឌលត្រួតពិនិត្យអវកាសនៅក្រុងប៉េកាំងនិងដែលចុះផ្សាយដោយសារព័ត៌មានផ្លូវការចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នេះគឺជាលើកទីមួយហើយដែលអ្នកជំនាញវិទ្យាសាស្ត្រចិន បានសាកល្បងបញ្ជូនយានទៅហោះជុំវិញព្រះចន្ទ រួចបញ្ជាឱ្យត្រលប់មកវិញ។ ការវិលត្រលប់ ដែលតម្រូវឱ្យយាន មានសមត្ថភាពធុនពិសេស នឹងគម្លាតសីតុណ្ហភាពក្តៅខ្លាំង នៅពេលចូលដល់ភពផែនដី។
យានគ្មានមនុស្សបើក គ្មានការប្រសិទ្ធិនាម បានចុះចតក្នុងតំបន់ម៉ុងហ្គោលីរបស់ចិន នៅភាគខាងជើងប្រទេស បានប្រកបដោយ ជោគជ័យ។ យានអវកាសបានពុះជ្រែកស្រទាប់អាកាសផែនដី ក្នុងល្បឿន១១,២គីឡូម៉ែត្រក្នុងមួយវិនាទី មុននឹងបន្ថយល្បឿន ដើម្បីអាចចុះចតលើដីបានដោយ សុវត្ថិភាព។ បើតាមភ្នាក់ងារសារព័ត៌មានផ្លូវការចិនថ្មី យានបាននាំមកជាមួយនូវរូបថតភពផែនដី និងព្រះចន្ទ យ៉ាងល្អគួរឱ្យស្ងប់ស្ងែង។
យាននេះ បានបង្ហោះចេញកាលពីថ្ងៃសុក្រទី ២៤តុលា វេលាម៉ោងប្រមាណ២ព្រឹក ចេញពីមជ្ឈមណ្ឌលអវកាស ស៊ីចង់ នៃខេត្តស៊ីឈន់ ទៅកាន់ចំណុចដែលមានរយៈចម្ងាយ ឆ្ងាយបំផុត ពីភពផែនដី (៤១៣០០០គ.ម.)។
បើតាមរដ្ឋបាលរដ្ឋទទួលបន្ទុកកម្មវិធីអវកាស នៃក្រសួងការពារជាតិចិន យានគ្មានឈ្មោះនេះ ជាការសាកល្បងបច្ចេកវិទ្យាដែលនឹងត្រូវយកទៅអនុវត្តក្នុងបេសកកម្ម ចង់ស៊ី-៥(Chang'e-5)។ បេសកកម្មប្រមូលអេសង់ទីយ៉ុងដីឋានព្រះចន្ទគ្រោងនឹងប្រព្រឹត្តទៅនៅឆ្នាំ២០១៧។ កន្លះសតវត្សក្រោយសហរដ្ឋអាមេរិក ក្រោយបេសកកម្មអាប៉ូឡូ ចិនកំពុងសំឡក់សំលៀងលោកខែ ចង់ក្លាយជាប្រទេសក្នុងតំបន់អាស៊ីដំបូងគេអាចបញ្ជូនមនុស្សទៅឋានព្រះចន្ទ ឱ្យបាននៅរវាងឆ្នាំ២០២៥។
កាលពីខែធ្នូ ២០១៣ ចិនបានបញ្ជួនយានអវកាសចង់ស៊ី-៣ (Chang'e -3) ទៅឋានព្រះចន្ទ។ យានយន្តបញ្ជាពីចម្ងាយ ឈ្មោះទន្សាយហ្គិច បានចុះចតលើភពព្រះចន្ទ។ អាចចាត់ទុកជាជោគជ័យ ថ្វីបើក្រោយមកយានយន្តនោះមានបញ្ហាមេកានិច ធ្លាក់ក្នុងស្ថានភាពជាប់គាំងសន្លប់ធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ