ដង្ហើមសេដ្ឋកិច្ចចិន ធ្លាក់ចុះគួរឲ្យភ្ញាក់ផ្អើល សម្រាប់ខែកក្កដា
ចុះផ្សាយនៅថ្ងៃ៖
ស្តាប់ - ០៤:១០
ថ្ងៃអង្គារ ទី១៥សីហា អ្នកជំនាញសេដ្ឋកិច្ច បានវាយតម្លៃថា ដង្ហើមសេដ្ឋកិច្ចចិន សម្រាប់ខែកក្កដាកន្លងទៅនេះ គឺមានការធ្លាក់ចុះ គួរឲ្យភ្ញាក់ផ្អើល។ ការចុះខ្សោយសេដ្ឋកិច្ចបន្តិច នៅពេលនេះ គឺបានអូសបន្លាយតាំងពីដើមឆ្នាំ២០១៨មកម្ល៉េះ។ តើមានមូលហេតុអ្វីខ្លះ ដែលសេដ្ឋកិច្ចចិនកំពុងប្រឈម?
សេដ្ឋកិច្ចវិទូ ជាច្រើនដែលឈរជើងនៅប៉េកាំង និងនៅស្ថាប័នបស្ចិមលោកក្តី គឺសុទ្ធតែមូលមាត់គ្នា ចង្អុលបង្ហាញថា ដង្ហើមសេដ្ឋកិច្ចចិន គឺពិតជាមានការធ្លាក់ចុះបន្តិចបន្តួចមែន រាប់ចាប់តាំងពីដើមខែមករា រហូតដល់ពាក់កណ្តាលឆ្នាំ២០១៨ ហើយការស្រុតចុះខ្សោយ សម្រាប់ខែកក្កដាទៅថ្មីៗនេះ គឺគួរឲ្យភ្ញាក់ផ្អើល និងមិនធ្លាប់មានទេ នៅក្នុងរយៈកាលពីរទសវត្សរ៍ចុងក្រោយនេះ។
មូលហេតុ៤ នៃការស្រុតចុះសេដ្ឋកិច្ចចិន(បន្តិច)នៅពេលនេះ
ហោចណាស់ មានមូលហេតុ៤យ៉ាងតិច ដើម្បីពន្យល់ពីការធ្លាក់ចុះ សេដ្ឋកិច្ចបន្តិចរបស់ចិននៅពេលនេះ។ ទី១ គឺមកពីការផលិតក្នុងវិស័យឧស្សាហកម្ម ធ្លាក់ស្រុតថមថយបន្តិច។ ពោលគឺការផលិតបានតិចជាងការរំពឹងទុក ក្នុងខែកក្កដា។ បញ្ហាទី២ អត្រាវិនិយោគក្នុងស្រុក បានធ្លាក់ចុះ គួរឲ្យភ្ញាក់ផ្អើលដែលមិនធ្លាប់មានទេ បើសេដ្ឋវិទូបានកត់ចំណាំចាប់តាំងពីឆ្នាំ១៩៩៦មក។ មូលហេតុទី៣ មកពីការបញ្ជាកុម្ម៉ង់ទិញទំនិញពីក្រៅស្រុក មានតិចតួចជាងធម្មតា ហើយវិបត្តិទី៤នោះ គឺដោយសាររងផលប៉ះពាល់ខ្លះដែរ ពីការប្រឈមមុខគ្នាក្នុងសង្គ្រាមពាណិជ្ជកម្ម រវាងមហាយក្សសេដ្ឋកិច្ចពីរ នោះគឺចិនខ្លួនឯងនិងអាមេរិក។
សញ្ញាណធ្លាក់ចុះលុយយ័នរបស់ចិន គឺជាការធុំក្លិនឈ្ងៀមនៃផ្សែងរបស់សង្គ្រាមពាណិជ្ជកម្ម។ សូមជ្រាបថា ក្នុងបរិបទនៃទំនាស់ពាណិជ្ជកម្ម តាមរយៈការដំឡើងពន្ធគយដាក់គ្នាទៅវិញទៅមក គឺបានធ្វើឲ្យប្រាក់យ័នចិន បានធ្លាក់ចុះ នៅប៉ុន្មានសប្តាហ៍ចុងក្រោយនេះ។ នេះជាការមើលឃើញរបស់ការិយាល័យជាតិស្ថិតិចិនដែរ (Bureau national des statistiques)។
ក្នុងបរិបទនៃសង្គ្រាមពាណិជ្ជកម្មនេះ ពលរដ្ឋចិន បានផ្តើមឆន្ទៈដោយខ្លួនឯង ធ្វើពហិការនៅស្រុក ឈប់ទិញទំនិញរបស់អាមេរិក។ បើតាមការស៊ើបសួរពលរដ្ឋចិន ពីសំណាក់ភ្នាក់ងារអ្នកកាសែតអង់គ្លេស Reuters, ក្នុងចំណោមពលរដ្ឋចិនបីនាក់ គឺមានម្នាក់ បានឈប់ទិញផលិតផលរបស់អាមេរិក។ ឆន្ទៈជាតិនិយមរបស់ពលរដ្ឋចិនបែបនេះ ក៏វាបានប៉ះពាល់ដល់សេដ្ឋកិច្ចចិនខ្លួនឯងខ្លះដែរ។ ដ្បិតថា ទី១ គឺធ្វើឲ្យមិនសូវមានលំហូរនៃការចាយវាយផ្សេងៗ ហើយទី២ ក៏បានប៉ះពាល់ដល់ផលិតទំនិញពាក់ស្លាកយីហោម៉ាក់អាមេរិកមែន តែវាបានផលិតដោយកម្មករចិន ក្នុងស្រុកខ្លួនឯងសោះ។
យុទ្ធនាការកាត់បន្ថយផ្សែងពុល ប៉ះពាល់ដល់សេដ្ឋកិច្ចចិន
ងាកមកមើល ការផលិតផ្នែកឧស្សាហកម្មស្រុតធ្លាក់វិញ។ មួយផ្នែកធំគឺព្រោះតែនយោបាយកាត់បន្ថយការបំពុលបរិស្ថាន។ ក្នុងយុទ្ធនាការនេះ រដ្ឋាភិបាលចិន បានបិទរោងចក្រនិងតំបន់ឧស្សាហកម្មអស់ជាច្រើន។ ឆន្ទៈនយោបាយរបស់ថ្នាក់ដឹកនាំចិន ក្នុងការចូលរួមចំណែកកាត់បន្ថយការបំពុលបរិយាកាស និងជួយស្រោចស្រង់បរិស្ថានផែនដី គឺជារឿងល្អ តែវាក៏បានទាញឲ្យសេដ្ឋកិច្ចអន់ថយបន្តិចដែរ។ ដ្បិតថា ការកំណត់ឲ្យកាត់បន្ថយការបញ្ចេញផ្សេងពុល វាធ្វើឲ្យម៉ាស៊ីនឧស្សាហកម្ម ក៏មិនសូវដើរដូចមុន ហើយ ផលិតកម្ម ក៏ត្រូវថមថយដែរ។
ម្យ៉ាងវិញទៀត រដ្ឋអំណាចចិន រវល់តែជាប់ដៃខ្លាំង ខាងចំណាយទៅលើការសាងសង់ផ្លូវដែក ផ្លូវថ្នល់ ហើយធនាគារជាតិចិន ក៏គិតតែពីផ្តល់ប្រាក់កម្មី ឲ្យចំពោះតែក្រុមហ៊ុនធំៗ ដែលរកស៊ីផ្នែកសំណង់ទាំងនេះ ដោយមិនសូវបានគិតគូរដល់សហគ្រាសធនតូចនិងមធ្យម ឬក៏ក្រុមហ៊ុនខ្នាតតូចៗ ឲ្យបានសមរម្យនោះទេ។ ចំណុចនេះ ក៏ត្រូវអ្នកជំនាញចង្អុលបង្ហាញថាវាបង្កឲ្យប៉ះពាល់ដល់ដំណើរការនៃប្រព័ន្ធសេដ្ឋកិច្ច។ ស្ថាប័នរូបិយវត្ថុអន្តរជាតិ FMI បានចេញយោបល់ជំរុញឲ្យ រដ្ឋអំណាចក្រុងប៉េកាំង កាត់បន្ថយប្រាក់កម្ចីឥណទានទាំងឡាយដែលអាចបង្កហានិភ័យ។
ចិនអាចត្រូវការពេលច្រើនខែ ដើម្បីស្តារសុខភាពសេដ្ឋកិច្ច
បើផ្អែកតាមស្ថានភាពបច្ចុប្បន្ន និងតាមរយៈកត្តាបញ្ហាជារួម ដែលបានរៀបរាប់មកទាំងអស់នេះ អ្នកជំនាញ អាចវាយតម្លៃបានថា សុខភាពសេដ្ឋកិច្ចចិន អាចនឹងបន្តជួបការលំបាកបន្តិច ហើយត្រូវការពេលជាច្រើនខែទៀតដែរ ទម្រាំអាចស្តារ ឬព្យាបាលសុខភាព ឲ្យបានគ្រាន់បើជាងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ