ចិន រឹតបន្តឹងវិន័យក្នុងជួរថ្នាក់ដឹកនាំ និងមានដាក់ពិន័យដេញចេញពីបក្ស
បក្សកុម្មុយនីស្តចិន បានចេញសារាចរណ៍ណែនាំមួយ នៅក្នុងខែសីហានេះ ដើម្បីពង្រឹងវិន័យផ្ទៃក្នុងបក្ស ដោយត្រូវបណ្តេញចេញពីបក្ស ចំពោះសមាជិកបក្សរូបណាក៏ដោយ ឲ្យតែជាប់ពាក់ព័ន្ធនឹងរឿងផ្សព្វផ្សាយពាក្យចចាមអារាមនយោបាយ ឬពាក្យអុជអាលដែលនាំឲ្យបែកបាក់សាមគ្គី។ សារាចរណ៍ណែនាំនេះ ចេញដោយគណៈកម្មាធិការមជ្ឈិមបក្សកុម្មុយនីស្តទទួលបន្ទុកផ្នែកវិន័យ ដែលបានដាក់ចេញកាលពីពាក់កណ្តាលខែសីហា និងដែលទើបតែត្រូវផ្សាយឲ្យដឹងនៅថ្ងៃទី២៧សីហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ក្រៅពីរឹតបន្តឹងវិន័យផ្ទៃក្នុងបក្សឲ្យល្អ សេចក្តីណែនាំនេះ មានគោលដាក់ទោសកំហិតដល់សមាជិកបក្ស ដែលអ្នកកាន់សាសនាផងដែរ។ នៅក្នុងនោះ មានចែងពីសមាជិកបក្សណាដែលផ្សាយព័ត៌មានក្លែងក្លាយនៅក្នុងសាសនា និងពាក្យបង្ខូចដល់សាមគ្គីភាពរបស់បក្សកុម្មុយនីស្ត គឺត្រូវមានទោសតាមច្បាប់ ហើយទោសកំហុសធ្ងន់បំផុតនោះ គឺត្រូវបណ្តេញចេញពីបក្សតែម្តង។
សេចក្តីសម្រេចដូច្នេះ គឺបន្ទាប់ពីខែកក្កដាកន្លងទៅ មានការបែកធ្លាយសំឡេងឆ្លើយឆ្លងស្នេហាតាមទូរសព្ទ របស់ប្រធានសហព័ន្ធសង្ឃទូទាំងប្រទេស។ ធម្មាចារ្យដ៏ល្បីល្បាញ ព្រះអង្គ Xuecheng (ស៊ុយឆេង) ជាសមាជិកជាន់ខ្ពស់របស់បក្សកុម្មុយនីស្តចិន និងជាចៅអធិការវត្ត Longquan (ឡុងឆាង) នៅក្រុងប៉េកាំង បានត្រូវលោកសង្ឃពីរអង្គទម្លាយសារឆ្លើយឆ្លងតាមទូរសព្ទ ដែលមានខ្លឹមសារបបួលដូនជីមួយចំនួន ទៅរួមភេទ។ រឿងអាស្រូវផ្លូវភេទក្នុងវត្តនេះ បានរីកល្បីសុសសាយ ហើយព្រះអង្គចៅអធិការ Xuecheng បានសុំលាលែងតំណែងពីប្រធានសហព័ន្ធសង្ឃ កាលពីពាក់កណ្តាលខែសីហានេះ។ ចំណែកអាជ្ញាធរចិន កំពុងបើកការស៊ើបអង្កេត ពីបទបំពារបំពានភេទ។
នៅទីបំផុត អាជ្ញាធរចិនទទួលបន្ទុកកិច្ចការសាសនា ក៏បានរកឃើញដែរ ថាវត្តដែលគ្រប់គ្រងដោយចៅអធិការអង្គនោះ មានការចាយវាយថវិកាវត្តមិនប្រក្រតី។ ករណីនេះ គឺជាការរំលោភទៅលើច្បាប់របស់រដ្ឋ ហើយនិងត្រូវមានទោស។ ក៏ប៉ុន្តែ តាំងតែពីដើមខែសីហាមក ចៅអធិការវត្តរូបនោះ រក្សាភាពស្ងៀមស្ងាត់ ហើយវត្តរបស់ព្រះអង្គ ក៏បានច្រាលចោលរាល់ការចោទប្រកាន់ទាំងឡាយ។
តែយ៉ាងណាក៏ដោយ ក្រោយពីមានសារាចរណ៍ណែនាំថ្មី ចេញដោយគណៈកម្មាធិការមជ្ឈិមបក្ស ព្រះអង្គ ដែលសមាជិកជាន់ខ្ពស់របស់បក្សកុម្មុយនីស្តចិន អង្គនេះ អាចនឹងត្រូវប្រឈមមុខនឹងបណ្តេញចេញពីបក្សផងក៏មិនដឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ