អាមេរិកកាត់ទោសពលរដ្ឋចិនដាក់ពន្ធនាគារដោយចោទពីបទលួចការណ៍សម្ងាត់
ពលរដ្ឋចិនម្នាក់ត្រូវបានតុលាការអាមេរិកកាត់ទោសកាលពីថ្ងៃពុធម្សិលមិញ ឲ្យជាប់ពន្ធនាគាររយៈពេល ជិត ៤ឆ្នាំ ក្នុងបទចោទប្រកាន់ថាបានលួចចូលក្នុងប្រព័ន្ធអ៊ីនធ័រនែត ដើម្បីលួចព័ត៌មានសម្ងាត់របស់ក្រុមហ៊ុនផលិតគ្រឿងសព្វាវុធរបស់អាមេរិក។ នេះគឺជាសំណុំរឿងមួយ ក្នុងសំណុំរឿងជាច្រើន នៃជម្លោះជាប់ជាប្រចាំ រវាងចិន និងអាមេរិក ទាក់ទងនឹងការវាយប្រហារ ឬការលួចព័ត៌មានសម្ងាត់តាមប្រព័ន្ធអ៊ីនធ័រនែត។
ចុះផ្សាយនៅថ្ងៃ៖
ស្តាប់ - ០២:០២
ស៊ូ ពីន (Su Bin) វ័យ ៥១ឆ្នាំ ធ្លាប់ជាអ្នកគ្រប់គ្រងសាខាក្រុមហ៊ុនចិនមួយនៅក្នុងប្រទេសកាណាដា មុននឹងត្រូវអាជ្ញាធរកាណាដាចាប់ខ្លួន នៅឆ្នាំ២០១៤ រួចហើយបញ្ជូនមកឲ្យតុលាការអាមេរិក។
យោងតាមរបាយការណ៍នៃការស៊ើបអង្កេតរបស់តុលាការអាមេរិក ស៊ូ ពីន និងបក្ខពួកចំនួន ពីររូបបានព្យាយាមលួចចូលទៅក្នុងប្រព័ន្ធអ៊ីនធ័រនែតរបស់ក្រុមហ៊ុនផលិតគ្រឿងសព្វាវុធធំៗរបស់អាមេរិក ដើម្បីលួចព័ត៌មានសម្ងាត់បញ្ជូនទៅឲ្យរដ្ឋាភិបាលចិន។
នៅចំពោះមុខអាជ្ញាធរអាមេរិក ស៊ូ ពីន បានសារភាពថាខ្លួនពិតជាបានសហការជាមួយមន្រ្តីយោធាចិនចំនួន ២រូប ក្នុងការប៉ុនប៉ងលួចយកព័ត៌មានសម្ងាត់ពីក្រុមហ៊ុនអាមេរិក ហើយព័ត៌មានសម្ងាត់ដែលខ្លួនព្យាយាមលួចនោះ គឺប្លង់យន្តហោះយោធាចំនួន ៣ គឺយន្តហោះ ធុន F-22 និង F-35 ដែលជាយន្តហោះចម្បាំងដ៏ទំនើបចុងក្រោយបង្អស់របស់អាមេរិក និងមួយទៀត គឺយន្តហោះដឹកជញ្ជូនយោធារបស់ក្រុមហ៊ុនប៊ូអ៊ីង (C-17)។
ដោយសារតែមានការសារភាពទទូលកំហុសនេះហើយ ទើបតុលាការអាមេរិកសម្រេចបន្ធូរបន្ថយទោស ដោយសម្រេចឲ្យ ស៊ូ ពីន ជាប់ពន្ធនាគារត្រឹមតែ ៣ឆ្នាំ និង១០ខែ ហើយពិន័យជាប្រាក់ចំនួន ១ម៉ឺនដុល្លារអាមេរិក។
ពីទីក្រុងប៉េកាំងវិញ រដ្ឋាភិបាលចិនតែងតែបានបដិសេធម្តងហើយម្តងទៀតថា ខ្លួនមិនមានជាប់ពាក់ព័ន្ធទៅនឹងសកម្មភាពរបស់ស៊ូ ពីននោះទេ។ ក៏ប៉ុន្តែ ប្រព័ន្ធផ្សព្វផ្សាយព័ត៌មានចិនវិញ ក្នុងនោះរួមមានទាំងកាសែតផ្លូវការរបស់គណបក្សកុម្មុយនិស្តចិនផង បាននាំគ្នាចុះផ្សាយ លើកសរសើរស្នាដៃរបស់ស៊ូ ពីន ដោយចាត់ទុកថាជាវីរជន ដែលធ្វើការបម្រើជាតិរបស់ខ្លួន។
គួរបញ្ជាក់ថា នៅក្នុងរយៈពេលប៉ុន្មានឆ្នាំចុងក្រោយនេះ អាមេរិក និងចិន តែងតែទាស់គ្នាជារឿយៗ ទាក់ទងនឹងការលួចព័ត៌មានសម្ងាត់តាមប្រព័ន្ធអ៊ីនធ័រនែត ជាពិសេស គឺការលួចព័ត៌មានរសើបក្នុងវិស័យឧស្សាហកម្មសព្វាវុធ។ កាលពីឆ្នាំទៅមិញ មន្រ្តីយោធាចិនចំនួន ៥រូប ត្រូវបានតុលាការអាមេរិកធ្វើការចោទប្រកាន់ជាផ្លូវការ ទាក់ទងនឹងការលួចយកការណ៍តាមប្រព័ន្ធអ៊ីនធ័រនែត ហើយកាលពីឆ្នាំ២០០៨កន្លងទៅ ពលរដ្ឋអាមេរិកដើមកំណើតចិនម្នាក់ត្រូវបានតុលាការអាមេរិកកាត់ទោសដាក់ពន្ធនាគារចំនួន ២៤ឆ្នាំ ក្នុងបទចោទប្រកាន់ថាបានឃុបឃិតក្នុងការលួចបច្ចេកវិទ្យានាវាមុជទឹកអាមេរិកបញ្ជូនទៅឲ្យចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ