សន្និសីទប្រចាំឆ្នាំរបស់អ.ស.ប.ស្តីពីអាកាសធាតុចាប់បើកធ្វើនៅអាហ្វ្រិកខាងត្បូង
សន្និសីទប្រចាំឆ្នាំរបស់អ.ស.ប. ស្តីពីអាកាសធាតុបានចាប់ផ្តើមបើកធ្វើ នៅក្នុងប្រទេសអាហ្វ្រិកខាងត្បូង ពីថ្ងៃចន្ទ ទី២៨ វិច្ឆិកា ដល់ថ្ងៃសុក្រ ទី៩ ធ្នូ ២០១១។ នៅក្នុងពេលដែលពិភពលោកកំពុងប្រឈមមុខនឹងវិបត្តិសេដ្ឋកិច្ចផង និងគ្រោះធម្មជាតិកាន់តែច្រើនឡើងៗផងនោះ គណៈប្រតិភូមកពីប្រទេសចំនួន ១៩៤ នឹងត្រូវជួបជជែកគ្នា ដើម្បីស្វែងរកមធ្យោបាយទប់ស្កាត់ការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០៥:២៣
បើយើងក្រឡេកមើលទៅអតីតកាល យើងឃើញថា កិច្ចចរចាស្តីពីអាកាសធាតុ ក្នុងរយៈពេលប្រមាណ ២០ឆ្នាំកន្លងទៅនេះ ភាពចម្រូងចម្រាសតែងតែកើតមានឡើងលើចំណុចដដែលៗ៖ កាតព្វកិច្ចខុសគ្នារវាងប្រទេសអ្នកមាន និងប្រទេសកំពុងអភិវឌ្ឍ, ការទប់ស្កាត់ការកាប់បំផ្លាញព្រៃឈើ, ភាពចាំបាច់ក្នុងការអភិវឌ្ឍបច្ចេកវិទ្យាថ្មី ដើម្បីផលិតថាមពលដែលមិនបំពុលបរិស្ថាន និងវិភាគទានហិរញ្ញវត្ថុ ដើម្បីជួយប្រទេសក្រីក្រឲ្យសម្របខ្លួននឹងការប្រែប្រួលអាកាសធាតុ។ សន្និសីទនៅអាហ្វ្រិកខាងត្បូងលើកនេះ ក៏ប្រាកដជាចៀសមិនផុតពីភាពចម្រូងចម្រាសទាំងនេះដែរ។
ក្រុមអ្នកវិទ្យាសាស្រ្តជំនាញខាងផ្នែកអាកាសធាតុយល់ថា នៅក្នុងគ្រប់ការចរចាស្តីពីអាកាសធាតុ ប្រទេសភាគច្រើនយកបញ្ហានយោបាយ សេដ្ឋកិច្ច និងផលប្រយោជន៍ជាតិជាធំ ដោយធ្វើជាមិនដឹងមិនយល់អំពីការសិក្សាជាលក្ខណៈវិទ្យាសាស្រ្ត ទៅលើភាពជាក់ស្តែងនៃការប្រែប្រួលអាកាសធាតុ។ នាពេលថ្មីៗនេះ ក្រុមអ្នកវិទ្យាសាស្រ្តរបស់អ.ស.ប.បានធ្វើការវាយតម្លៃលើស្ថានភាពរួមនៃការប្រែប្រួលអាកាសធាតុលើពិភពលោក ដោយគូសបញ្ជាក់ថា គ្រោះធម្មជាតិកើតមានឡើងកាន់តែញឹកញាប់ ហើយកាន់តែធ្ងន់ធ្ងរ ដូចជា ភាពរាំងស្ងួត ទឹកជំនន់ និងព្យុះសង្ឃរា។ ទាំងនេះជាសញ្ញាបង្ហាញថា ការប្រែប្រួលអាកាសធាតុកំពុងតែមានសភាពធ្ងន់ធ្ងរឡើងៗ ដែលគេចាំបាច់ត្រូវតែចាត់វិធានការជាបន្ទាន់ ដើម្បីកាត់បន្ថយឧស្ម័នផ្ទះកញ្ចក់ (រួមមាន ឧស្ម័នកាបូនិក ជាដើម ដែលជាដើមហេតុនៃការប្រែប្រួលអាកាសធាតុ)។
រហូតមកទល់ពេលនេះ ពិធីសារក្រុងក្យូតូ គឺជាកិច្ចព្រមព្រៀងតែមួយគត់ ដែលមានចែងពីកាតព្វកិច្ចតាមផ្លូវច្បាប់ តម្រូវឲ្យប្រទេសជាសមាជិកកាត់បន្ថយការបញ្ចេញឧស្ម័នផ្ទះកញ្ចក់។ ពិធីសារនេះនឹងត្រូវផុតសុពលភាព នៅឆ្នាំ២០១២ខាងមុខ ដែលគេចាំបាច់ត្រូវតែចរចារកកិច្ចព្រមព្រៀងថ្មីមកជំនួស។ ការចរចាពីរលើកកន្លងទៅនេះ (សន្និសីទឆ្នាំ២០០៩ នៅដាណឺម៉ាក និងសន្និសីទឆ្នាំ២០១០ នៅម៉ិកស៊ិក) សុទ្ធតែត្រូវបរាជ័យ ដោយគេមិនអាចស្វែងរកកិច្ចព្រមព្រៀងថ្មីមួយបាន។ សន្និសីទនៅអាហ្វ្រិកខាងត្បូង នៅពេលនេះ គឺជាឱកាសចុងក្រោយ ដើម្បីស្វែងរកកិច្ចព្រមព្រៀងថ្មីនេះ។
ប៉ុន្តែ ប្រឈមមុខនឹងភាពវឹកវរផ្នែកសេដ្ឋកិច្ច ប្រទេសជាច្រើនបាននាំគ្នារួញរាមិនចង់និយាយដល់រឿងកាត់បន្ថយការបញ្ចេញឧស្ម័នផ្ទះកញ្ចក់ ដោយគេយល់ថាវាអាចជាឧបសគ្គដល់កំណើនសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ