បាតុករគណបក្សសង្គ្រោះជាតិហែក្បួនម៉ូតូ ក្នុងក្រុងភ្នំពេញនៅថ្ងៃចន្ទនេះ
នៅល្ងាចថ្ងៃចន្ទនេះ បាតុកររបស់គណបក្សសង្គ្រោះជាតិ បានជិះម៉ូតូជាក្បួន នៅតាមដងវិថីនានា តាមគម្រោងរបស់ខ្លួន បើទោះបីជាសាលារាជធានីភ្នំពេញមិនអនុញ្ញាតក៏ដោយ។ គួរកត់សម្គាល់ថា ប្រធាននិងអនុប្រធានគណបក្សប្រឆាំង មិនបានថ្លែងការណ៍ច្រើនឡើយ នៅរសៀលថ្ងៃចន្ទនេះ ដោយទុកឱ្យតំណាងរាស្ត្រផ្សេងៗទៀត ធ្វើអត្ថាធិប្បាយ នៅចំពោះមុខបាតុករ ដែលហាក់មិនស្រកស្រុតឡើយ ទាំងចំនួន ទាំងកម្លាំងចិត្ត បើធៀបនឹងថ្ងៃអាទិត្យម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
បាតុករគណបក្សសង្គ្រោះជាតិជិតមួយម៉ឺននាក់ ប្រហាក់ប្រហែលនឹងថ្ងៃអាទិត្យម្សិលមិញដែរ បានបន្តធ្វើបាតុកម្ម នៅថ្ងៃចន្ទនេះ តាមគម្រោងរបស់ខ្លួន ដោយជិះម៉ូតូដង្ហែបន្តកន្ទុយគ្នា នៅតាមដងវិថីនានា ក្នុងរាជធានីភ្នំពេញ។ ពួកគេបន្តទាមទារឱ្យរៀបចំបោះឆ្នោតជាតិសាថ្មី ក្នុងរយៈពេលយ៉ាងយូរបីខែ។ បើមិនដូច្នោះទេ កម្មវត្ថុបន្ទាប់នៃការទាមទាររបស់ពួកគេ គឺការចុះចេញពីអំណាចរបស់នាយករដ្ឋមន្ត្រី ហ៊ុន សែន។
គួរឱ្យកត់សម្គាល់ លោក សម រង្ស៊ី ប្រធានគណបក្សសង្គ្រោះជាតិ និងលោក កឹម សុខា ជាអនុប្រធានបក្ស មិនបានធ្វើសេចក្តីថ្លែងការណ៍ច្រើនទេ នៅថ្ងៃចន្ទនេះ។ លោក កឹម សុខា ដែលបានមកដល់វេទិកាបាតុកម្ម នៅលើទីលានប្រជាធិបតេយ្យ មុនលោក សម រង្ស៊ី គ្រាន់តែបានសម្តែងការគួរសមចំពោះបាតុករ និងពន្យល់អំពីដំណាក់នីមួយៗនៃការធ្វើបាតុកម្ម។
រីឯលោក សម រង្ស៊ី ដែលបានមក ក្រោយ បានប្រាប់អ្នកគាំទ្រថា លោកទើបបានអំពាវនាវ តាមរយៈហេ្វសប៊ុករបស់ខ្លួន ឱ្យមហាជនចូលរួមជិះម៉ូតូហែតាមវិថី ឱ្យបានច្រើនថែមទៀត។ មុនការមកដល់នៃថ្នាក់ដឹកនាំទាំងពីរ លោក អេង ឆៃអ៊ាង តំណាងរាស្ត្រជាប់ឆ្នោតមណ្ឌលខេត្តកណ្តាល បានគម្រាមថា គណក្សប្រឆាំងរបស់លោក នឹងនាំបាតុករអង្គុយតាមដងវិថីនានា ក្នុងក្រុងភ្នំពេញ ដើម្បីធ្វើឱ្យគាំងចរាចរណ៍ក្នុងរាជធានីតែម្តង បើគណបក្សប្រជាជនមិនអើពើនឹងសំណើរបស់បាតុករទេ។ ក្បួនម៉ូតូ ដែលដឹកនាំដោយ លោក សម រង្ស៊ី និងលោក កឹម សុខា បានចេញដំណើរនៅម៉ោង១៧និង១៥នាទី។
សាលារាជធានីភ្នំពេញបានហៅបាតុកម្មរបស់គណបក្សសង្គ្រោះជាតិថ្ងៃនេះថា«ខុសច្បាប់» ហើយមិនទទួលខុសត្រូវចំពោះបញ្ហាទាំងឡាយណាដែលអាចកើតចេញពីទង្វើខុសច្បាប់នេះឡើយ។ លោក ឃួង ស្រេង អភិបាលរងរាជធានីភ្នំពេញ បានទម្លាក់ការទទួលខុសត្រូវទាំងអស់លើអ្នកដឹកនាំបាតុកម្ម ហើយបានអះអាងថា កម្លាំងមានសមត្ថកិច្ច ដែលចេញធ្វើប្រតិបត្តិការតាមដងវិថីល្ងាចថ្ងៃចន្ទនេះ គឺ«ដើម្បីការពារប្រជាពលរដ្ឋនៅក្នុងក្រុងភ្នំពេញជាង២លាននាក់ មិនមែនការពារបាតុករខុសច្បាប់ឡើយ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ