នៅឆ្នាំ ២០៥០ ទីក្រុងរាប់រយនឹងប្រឈមខាតបង់ដោយសារការឡើងកំពស់ទឹកសមុទ្រ
ចុះផ្សាយនៅថ្ងៃ៖
ស្តាប់ - ០៤:១៦
ការប្រែប្រួលអាកាសធាតុ ដោយសារការឡើងកំដៅនៃភពផែនដីបានជះឥទ្ធិពលយ៉ាងជាក់ស្តែងទៅលើជីវិតរស់នៅក្នុងពិភពលោក។ ទីក្រុងនៅតាមបណ្តោយឆ្នេរ ជាប់មាត់សមុទ្រ ទទួលរងគ្រោះដោយផ្ទាល់ និងមុនគេពីបាតុភូតធម្មជាតិ ជាពិសេស ទឹកជំនន់ និងការឡើងកំពស់ទឹកសមុទ្រ ដោយសារការរលាយទឹកកកនៅប៉ូលខាងជើង។ ការសិក្សាជាច្រើនបានបង្ហាញថា នៅឆ្នាំ ២០៥០ខាងមុខ ទាំងទឹកជំនន់ និងការឡើងកំពស់នៃទឹកសមុទ្រនឹងធ្វើឲ្យទីក្រុងជាប់មាត់សមុទ្រខាត់បង់ទឹកប្រាក់ប្រមាណ ១០០ម៉ឺន លានដុល្លារ។ ទីក្រុងញូវយ៉ករបស់អាមេរិក ដែលរងគ្រោះធ្ងន់ធ្ងរដោយសារខ្យល់ព្យុះសេនឌី កាលពីឆ្នាំ ២០១២ បានចាប់ផ្តើមសិក្សាលើហេដ្ឋារចនាសម្ព័ន្ធថ្មី ទប់ទល់នឹងគ្រោះមហន្តរាយធម្មជាតិ។
ផែនដីនៅបន្តឡើងកំដៅ នៅពេលដែលប្រទេសមហាអំណាច ល្បីខាងបញ្ចេញឧស្ម័នពុល នៅតែមិនទាន់និយាយចុះសម្រុងគ្នាដើម្បីកាត់បន្ថយឧស្ម័នផ្ទះកញ្ចក់ទាំងអស់គ្នា។ បើសិនជាគេនៅតែមិនអាចរកវិធានការរួមដើម្បីកាត់បន្ថយការឡើងកំដៅនៃភពផែនដី នោះ គេរំពឹងថា ក្នុងអំឡុង៤០ឆ្នាំទៀត ទីក្រុងទាំងអស់នៅក្នុងពិភពលោក ដែលស្ថិតនៅជាប់មាត់សមុទ្រ នឹងទទួលរងការខូចខាតធ្ងន់ធ្ងរ។ ទំហំខូតខាតទៀតសោតនឹងកើនឡើងដល់១០០ម៉ឺនលានដុល្លារ គឺស្មើនឹង០,៧ភាគរយនៃសេដ្ឋកិច្ចពិភពលោកទាំងមូលនៅឆ្នាំ ២០១២។ ទំហំខាតបង់ទឹកប្រាក់បានកើនឡើង គួរឲ្យកត់សំគាល់ ព្រោះថា កាលពីឆ្នាំ ២០០៥ ទឹកជំនន់ធ្វើឲ្យពិភពលោកខាតបង់ប្រមាណ ៦ពាន់លានដុល្លារប៉ុណ្ណោះ ក្នុងមួយឆ្នាំ។ ប៉ុន្តែ នៅបីឆ្នាំ ចុង ក្រោយនេះ ទឹកប្រាក់ខាតបង់ដោយសារទឹកជំនន់បានកើនដល់៥០ពាន់លានដុល្លារ ក្នុងមួយឆ្នាំ គឺកើន១០ដង បើប្រៀបធៀបនឹងឆ្នាំ ២០០៥។
ក្រុមអ្នកស្រាវជ្រាវមួយរបស់ធនាគារពិភពលោកក្នុងទីក្រុងវ៉ាស៊ីនតោនបានសិក្សាទៅលើការខាតបង់ដោយសារគ្រោះថ្នាក់ធម្មជាតិដែលនឹងកើតឡើងទៅលើទីក្រុងចំនួន ១៣៦ នៅក្នុងពិភពលោក។ នៅក្នុងនោះ ទីក្រុងសេដ្ឋកិច្ច ធំៗចំនួន៤ ដែលស្ថិតនៅជាប់មាត់សមុទ្រ ដូចជាញូវ អរឡេអង់ មីយ៉ាមី ញូវយ៉ក របស់អាមេរិក និងទីក្រុងក្វាងចូវរបស់ចិន នឹងទទួលខាតបង់ច្រើនជាងគេ ដោយសារតែគ្រោះថ្នាក់ធម្មជាតិ បង្កចេញមកពីទឹកសមុទ្រ។
កាលពីឆ្នាំ ២០១២ ទីក្រុងញូវយ៉កបានភ្លក់រសជាតិទឹកជំនន់ដែលកើតឡើង ដោយចៃដន្យ ឬដោយសារតែការប្រែប្រួលអាកាសធាតុ។ ព្យុះសង្ឃរាសេនឌី បាននាំទឹកសមុទ្រ ចូលក្នុងទីក្រុង ដែលនៅមានហេដ្ឋារចនាសម្ព័ន្ធ មិនឆ្លើយតបនឹងទឹកជំនន់។
នៅតែប៉ុន្មានខែក្រោយខ្យល់ព្យុះកំណាចដែលបានសម្លាប់មនុស្ស៤៣នាក់ និងការខាតបង់ទឹកប្រាក់រាប់ពាន់ដុល្លារ អតីតចៅហ្វាយក្រុងញូវយ៉ក លោកMike Bloomberg ចាប់ផ្តើមបង្ហាញពីគម្រោងសាងសង់សំណង់ជាច្រើន ដែលគេត្រូវធ្វើជាបន្ទាន់ដើម្បី ការពារទីក្រុងសេដ្ឋកិច្ចញូវយ៉ក ពីការគំរាមកំហែងនៃការឡើងកម្រិតកំពស់ទឹកសមុទ្រ។
ជញ្ជាំងចល័ត ទំនប់ថ្មី និងផ្នូកខ្សាច់នឹងត្រូវគេបង្កើតឡើង ដើម្បីធ្វើជាកំផែង ការពារទីក្រុងញូវយ៉ក ដែលមានឆ្នេរជាប់សមុទ្រ ប្រវែង ជាង ៨០០គីឡូម៉ែត្រ។ គេប៉ាន់ប្រមាណថា គម្រោងការពារសាងសង់ហេដ្ឋារចនាសម្ព័ន្ធការពារញូវយ៉កពីទឹកជំនន់នឹង ត្រូវការទឹកប្រាក់ប្រមាណ ២០ពាន់លានដុល្លារ។
នៅមួយឆ្នាំក្រោយ ផ្លាស់ប្តូរចៅហ្វាយក្រុង ទីក្រុងញូវយ៉ក នៅតែរក្សាគម្រោងរៀបចំក្រុងទប់ទល់នឹងការឡើងកំពស់ទឹកសមុទ្រ។ កាលពីដើមខែមិថុនា សាលាក្រុងញូវយ៉កបានអនុម័តលើគម្រោងចំនួន៦ សម្រាប់ការពារញូវយ៉ក។ លើកនេះ គេបានគុណគិតឃើញថា គេនឹងចាយប្រាក់ប្រមាណ ១ពាន់លានដុល្លារ ដើម្បីរៀបចំឡើងវិញ ហេដ្ឋារចនាសម្ព័ន្ធនៅតាមឆ្នេរ ក្នុងទីក្រុងញូវយ៉ក ឡង អាយឡែន និងញូវ ជើស៊ី។ គ្រាន់តែសំណង់ការពារជ្រោយម៉ាន់ហាតាន់ ដែលជាសង្កាត់សេដ្ឋកិច្ចយុទ្ធសាស្រ្ត ជាទីតាំងរបស់Wall Street គេត្រូវការចំណាយទឹកប្រាក់៣៣៥លានដុល្លារ។ ក្នុងបទពិសោធន៍ ក្នុងពេលជួបខ្យល់ព្យុះសេនឌី ឆ្នាំ ២០១២ សង្កាត់ម៉ាន់ហាតាន់ ដែលជាទីតាំងរបស់Wall Street បានរងគ្រោះយ៉ាងធ្ងន់ធ្ងរដោយសារទឹកជំនន់ពីសមុទ្រ។ ទឹកជំនន់បានកាត់ផ្តាច់ភ្លើង ដែលធ្វើឲ្យសង្កាត់ពាណិជ្ជកម្មរបស់អាមេរិកខាតបង់ទឹកប្រាក់រាប់ពាន់លានដុល្លារ។
ប្រឈមមុខនឹងគំរាមកំហែងរបស់ទឹកសមុទ្រ គឺជារឿងដែលអ្នករស់នៅតាមទីក្រុងជាប់ឆ្នេរមិនអាចជៀសផុតបាន។ តាមចៅហ្វាយក្រុងចាស់របស់ញូវយ៉ក ពីពេលនេះ ដល់ឆ្នាំ ២០៥០ ប្រជាជនញូវយ៉ក ប្រមាណ ៨សែននាក់ នឹងធ្លាក់ខ្លួន រស់នៅក្នុងតំបន់ដែលអាចលិចទឹក។ ពោលគឺមួយភាគបួននៃទំហំទីក្រុងញូវយ៉កទាំងមូល។ អ្នកវិទ្យាសាស្រ្តបានប៉ាន់ប្រមាណថា ពីពេលនេះ ដល់ឆ្នាំ ២០២០ កំពស់ទឹកសមុទ្រនឹងអាចឡើងពី១០ ទៅ ២០សង់ទីម៉ែត្រ ឬពី៣០ ទៅ ៥០សង់ទីម៉ែត្រពីពេលនេះ ដល់ឆ្នាំ ២០៥០។ អាជ្ញាធរញូវយ៉កទទួលស្គាល់ថា សំណង់ទំនប់ នឹងរំខានដល់អ្នកដែលចង់មើលទឹកសមុទ្រ ប៉ុន្តែ ការរំខានភ្នែកទាំងនោះ នឹងមិនសំខាន់ស្មើនឹងការខាតបង់ និងអនាគតសេដ្ឋកិច្ចរបស់ទីក្រុងទាំងមូលទេ។ ព្យុះសង្ឃរា សេនឌីបានធ្វើឲ្យរដ្ឋអាមេរិកខាតបង់ ១៩ពាន់លានដុល្លារ ប៉ុន្តែ បើខ្យល់ព្យុះស្រដៀងនេះកើតឡើង នៅឆ្នាំ ២០៥០ នោះ គេនឹងអាចខាតបង់៩០ពាន់លានដុល្លារ។ នេះជាការព្រមានទុករបស់អតីតចៅហ្វាយក្រុងញូវយ៉ក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ