ក្តីបារម្ភជុំវិញការកើនឡើងនៃអំពើហិង្សានៅតំបន់កាស្មៀរ
អស់រយៈពេលជាច្រើនសប្តាហ៍មកហើយ ដែលអំពើហិង្សាបានផ្ទុះឡើង និងរាលដាលកាន់តែខ្លាំង ពីមួយថ្ងៃទៅមួយថ្ងៃ នៅក្នុងតំបន់កាស្មៀរ ដែលជាតំបន់ជាប់ជម្លោះ រវាងឥណ្ឌា និងប៉ាគីស្ថាន។ ការរាលដាលនៃអំពើហិង្សានៅក្នុងតំបន់ជម្លោះ រវាងមហាអំណាចនុយក្លេអ៊ែរនេះ កំពុងតែបង្កឲ្យមានក្តីបារម្ភទាំងនៅក្នុងតំបន់ និងរហូតទៅដល់សហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
អំពើហិង្សាដែលកំពុងតែកើតមានឡើង នៅក្នុងតំបន់កាស្មៀរ នៅក្នុងពេលបច្ចុប្បន្ននេះ ត្រូវបានគេកត់សម្គាល់ថា បានបង្កឲ្យមានវិបត្តិនយោបាយដ៏ធ្ងន់ធ្ងរបំផុតមិនធ្លាប់ឃើញមាន នៅក្នុងរយៈពេលប្រមាណជា ២៥ឆ្នាំចុងក្រោយនេះ។
អ្វីៗបានចាប់ផ្តើមឡើង ក្រោយពីមេដឹកនាំក្រុមឧទ្ទាមផ្តាច់ទឹកដីកាស្មៀរត្រូវបានទាហានរដ្ឋាភិបាលឥណ្ឌាបាញ់សម្លាប់ កាលពីថ្ងៃទី៨កក្កដាកន្លងទៅ។ ការស្លាប់នេះបានធ្វើឲ្យក្រុមអ្នកគាំទ្រចលនាអ៊ីស្លាមផ្តាច់ទឹកដីនាំគ្នាចេញធ្វើបាតុកម្មប្រឆាំងនឹងរដ្ឋាភិបាល បណ្តាលឲ្យមានការប៉ះទង្គិចដោយហិង្សា បង្កឲ្យមានអ្នកស្លាប់និងរបួសជាច្រើននាក់។
ប្រឈមមុខនឹងអំពើហិង្សានេះ អាជ្ញាធរឥណ្ឌាបានដាក់ពង្រាយកងទ័ព ចេញបម្រាមគោចរ ហើយរហូតមានការរឹបអូសកាសែតដែលចុះផ្សាយពីចលនាប្រឆាំង ក៏ប៉ុន្តែ ៣សប្តាហ៍ក្រោយមក កំហឹងអ្នកគាំទ្រចលនាអ៊ីស្លាមផ្តាច់ទឹកដីនៅតែមិនថមថយ ហើយការប៉ះទង្គិចគ្នា រវាងបាតុករប្រឆាំង និងកងកម្លាំងរដ្ឋាភិបាល នៅតែបន្តកើតមានឡើង ជារៀងរាល់ថ្ងៃ។ គិតជាសរុប អំពើហិង្សានៅតំបន់កាស្មៀរ នៅក្នុងរយៈពេល ៣សប្តាហ៍នេះ បានបណ្តាលឲ្យមានអ្នកស្លាប់ជាង ៥០នាក់ និងរាប់ពាន់នាក់ផ្សេងទៀតត្រូវរងរបួស។
នៅក្នុងប្រទេសឥណ្ឌា អំពើហិង្សានៅក្នុងតំបន់កាស្មៀរនេះបានបង្កើតឲ្យមានការជជែកដេញដោលគ្នាយ៉ាងផុសផុល ជាពិសេស តាមរយៈបណ្តាញសារព័ត៌មាន និងប្រព័ន្ធអ៊ីនធ័រនែត ដោយអ្នកខ្លះ ទាមទារឲ្យរដ្ឋាភិបាលប្រើកម្លាំងបង្រ្កាបចលនាទាមទារផ្តាច់ទឹកដី រីឯអ្នកខ្លះទៀត ទាមទារឲ្យមានដំណោះស្រាយនយោបាយ ដោយបានធ្វើការកត់សម្គាល់ថា អស់រយៈពេលជាច្រើនឆ្នាំមកហើយ ដែលរដ្ឋាភិបាលយកកម្លាំងធ្វើជាមធ្យោបាយដោះស្រាយវិបត្តិនៅកាស្មៀរនេះ ក៏ប៉ុន្តែ ជាលទ្ធផល ចលនាអ៊ីស្លាមទាមទារផ្តាច់ទឹកដីមិនត្រឹមតែមិនថយចុះ តែថែមទាំងកើនឡើងកាន់តែខ្លាំងទៅវិញ។
អ្វីដែលធ្វើឲ្យគេកាន់តែបារម្ភទៅទៀតនោះ គឺខ្លាចអំពើហិង្សានៅកាស្មៀរនេះរាលដាលរហូតក្លាយជាជម្លោះជាមួយប៉ាគីស្ថាន។ គេមិនត្រូវភ្លេចទេថា ឥណ្ឌា និងប៉ាគីស្ថាន សុទ្ធតែជាប្រទេសមហាអំណាចនុយក្លេអ៊ែរ ហើយប្រទេសទាំងពីរនេះសុទ្ធតែទាមទារយកតំបន់កាស្មៀរទាំងមូលមកកាន់កាប់រៀងៗខ្លួន។
សូម្បីតែសហរដ្ឋអាមេរិក ដែលភាគច្រើនតែងតែព្យាយាមមិនលូកមាត់រឿងជម្លោះកាស្មៀរនោះ ក៏បានបង្ហាញនូវក្តីបារម្ភរបស់ខ្លួនផងដែរ កាលពីថ្ងៃសៅរ៍ម្សិលមិញ ចំពោះការរីករាលដាលនៃអំពើហិង្សានៅតំបន់កាស្មៀរ។ សូម្បីតែសហរដ្ឋអាមេរិកក៏បានបង្ហាញនូវក្តីបារម្ភរបស់ខ្លួនដែរ ចំពោះអ្វីដែលកំពុងកើតឡើងនៅកាស្មៀរពេលនេះ។ ជាទូទៅ គេសង្កេតឃើញថា ជាទូទៅ អាមេរិកតែងតែព្យាយាមមិនលូកមាត់រឿងជម្លោះកាស្មៀរនេះទេ ដោយសារតែមិនចង់ឲ្យគេឃើញមានភាពលម្អៀងទៅខាងណាមួយ ក្នុងពេលដែលអាមេរិកកំពុងតែព្យាយាមបង្កើនទំនាក់ទំនង ទាំងជាមួយប៉ាគីស្ថាន និងជាមួយឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ