អ៊ីរ៉ង់និងរុស្ស៊ីចាប់ផ្តើមសាងសង់ប្រតិករនុយក្លេអ៊ែរថ្មី២ ក្នុងទឹកដីអ៊ីរ៉ង់
នៅថ្ងៃសៅរ៍១០សីហានេះ អ៊ីរ់ង់និងរុស្ស៊ីបានចាប់ផ្តើមធ្វើការសាងសង់ប្រតិករនុយក្លេអ៊ែរថ្មីចំនួន២ នៅមជ្ឈមណ្ឌល Bouchehr ស្ថិតនៅឆ្នេរឈូងសមុទ្រពែរស៍ ភាគខាងត្បូងអ៊ីរ៉ង់។ ការសាងសង់ប្រតិករនុយក្លេអ៊ែរទាំង២ មានតម្លៃ១០ពាន់លានដុល្លារ និងត្រូវប្រើពេល១០ឆ្នាំ។ ប្រតិករទាំង២អាចជួយអ៊ីរ៉ង់អោយសន្សំសំចៃប្រេងប្រមាណ១១លានបារីល ក្នុងមួយឆ្នាំៗ។
ចុះផ្សាយនៅថ្ងៃ៖
ស្តាប់ - ០១:២២
ប្រតិករនុយក្លេអ៊ែរទាំង២ថ្មី ដែលអ៊ីរ៉ង់និងរុស្ស៊ីចាប់ផ្តើមសាងសង់ឡើងនេះ ក៏ជួយទប់ស្កាត់ឧស្ម័នផ្ទះកញ្ចក់ដល់ទៅ៧លានតោនផងដែរ។ មានមនុស្សប្រមាណ៨០០០នាក់ ដែលត្រូវចូលរួមក្នុងការងារសង់ម៉ាស៊ីនប្រតិកម្មទាំង២ នៅក្រុងកំពង់ផែ Bouchehr ភាគខាងត្បូងអ៊ីរ៉ង់។
អ៊ីរ៉ង់គ្រោងសង់ប្រតិករនុយក្លេអ៊ែរជាង២០ទៀតដែរ សម្រាប់ពេលអនាគត។ ក្នុងនោះ មានប្រតិករចំនួន៩ ដែលអ៊ីរ៉ង់ត្រូវសហការជាមួយរុស្ស៊ី។ រដ្ឋាភិបាលក្រុងតេហេរ៉ង់មិនចង់ពឹងផ្អែកទាំងស្រុង លើការផលិតប្រេងនិងឧស្ម័នក្នុងស្រុកទៀតទេ។ សព្វថ្ងៃនេះ អ៊ីរ៉ង់មានប្រតិករនុយក្លេអ៊ែរ១០០០មេហ្កាវ៉ាត់ តែមួយប៉ុណ្ណោះ នៅមជ្ឈមណ្ឌល Bouchehr។ ប្រតិករនេះដាក់អោយដំណើរការតាំងពីឆ្នាំ២០១១មក។
ក្នុងទិវាបើកការដ្ឋានសាងសង់ប្រតិករនុយក្លេអ៊ែរ ថ្ងៃសៅរ៍នេះ មានការចូលរួមពីប្រធានទីភ្នាក់ងារសហព័ន្ធថាមពលបរមាណូរបស់រុស្ស៊ី និងក្រុមហ៊ុនអភិវឌ្ឈន៍ផលិតផលនុយក្លេអ៊ែរអ៊ីរ៉ង់។ តំណាងខាងរុស្ស៊ីលើកឡើងថា ការសាងសង់នេះបង្ហាញពីការសហប្រតិបត្តិការរវាងរុស្ស៊ីនិងអ៊ីរ៉ង់ ហើយក៏ជាជំហានមួយជួយរុស្ស៊ីអោយពង្រឹងជំហរខ្លួន នៅដើមបូព៌ា ក្នុងទីផ្សារអន្តរជាតិ ខាងផ្នែកបច្ចេកវិទ្យានុយក្លេអ៊ែរតាមបែបសន្តិភាព។
គួររំលឹកថា កាលពីខែកក្កដា ឆ្នាំ២០១៤ អ៊ីរ៉ង់បានចុះកិច្ចព្រមព្រៀង ជាមួយប្រទេសមហាអំណាច នៅក្រុងវីយែន ជាកិច្ចព្រមព្រៀងធនានាថា សកម្មភាពនុយក្លេអ៊ែរអ៊ីរ៉ង់មានបែបផែនសន្តិភាព។ ជាថ្នូរនឹងការធានានេះ អន្តរជាតិបានលើកទណ្ឌកម្មប្រឆាំងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ