កូរ៉េខាងជើងចាប់ខ្លួនពលរដ្ឋអាមេរិកមួយរូបទៀត ពីបទចង់ធ្វើសកម្មភាពប្រឆាំង
កូរ៉េខាងជើងបានប្រកាសនៅថ្ងៃអាទិត្យនេះថា បានចាប់ខ្លួនពលរដ្ឋអាមេរិកម្នាក់ទៀត ពីបទចង់ធ្វើសកម្មភាពប្រឆាំងរដ្ឋាភិបាលក្រុងព្យុងយ៉ាង។ ពលរដ្ឋអាមេរិករូបនេះ ជាបុគ្គលិកសកលវិទ្យាល័យមួយ នៅក្រុងព្យុងយ៉ាង ជាពលរដ្ឋអាមេរិកទី៤ដែលកូរ៉េខាងជើងបានចាប់ខ្លួន។ ក្រុងព្យុងយ៉ាងចាប់ខ្លួនពលរដ្ឋអាមេរិកចំពេលទំនាក់ទំនងកូរ៉េខាងជើងនិងអាមេរិកកាន់តែតានតឹងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៥
លោកគីម ហាក់សុង Kim Hak Song ជាពលរដ្ឋអាមេរិកទី៤ ដែលកូរ៉េខាងជើងចាប់ខ្លួន កាលពីថ្ងៃសៅរ៍។ គាត់បំរើការអោយសកលវិទ្យាល័យវិទ្យាសាស្ត្រនិងបច្ចេកវិទ្យា ក្រុងព្យុងយ៉ាង។ គាត់ជាអ្នកផ្តល់សន្និសីទនៅសកលវិទ្យាល័យមួយនេះ។ កូរ៉េ់ខាងជើងចោទថា គាត់ចង់ធ្វើសកម្មភាពប្រឆាំងរដ្ឋអំណាចក្រុងព្យុងយ៉ាង។ កូរ៉េខាងជើងប្រាប់ថា នឹងស៊ើបអង្កេតអោយលម្អិត ពីបទឧក្រិដ្ឋរបស់លោកគីម។
គិតទាំងលោកគីម ហាក់សុង មកដល់ពេលនេះ ក្រុងព្យុងយ៉ាងបានចាប់ខ្លួនពលរដ្ឋសរុប ៤នាក់។ សូមរំលឹកថា ថ្ងៃ២២មេសា កូរ៉េខាងជើងបានចាប់ខ្លួនពលរដ្ឋអាមេរិកដើមកំណើតកូរ៉េមួយរូបទៀតដែរ នៅអាកាសយានដ្ឋាន ពេលបុរសរូបនោះត្រៀមចាកចេញទៅអាមេរិកវិញ។ ពលរដ្ឋអាមេរិករូបនោះធ្វើការអោយសកលវិទ្យាល័យវិទ្យាសាស្ត្រនៅកូរ៉េខាងជើងនេះដែរ។ គាត់ត្រៀមឡើងយន្តហោះ ក្រោយគាត់បានបង្រៀនអស់ច្រើនសប្តាហ៍មក។ គាត់រងការចោទប្រកាន់ថា បានធ្វើសកម្មភាពទំលាក់រដ្ឋាភិបាលកូរ៉េខាងជើង។
ពលរដ្ឋអាមេរិក២នាក់ទៀតដែលកូរ៉េខាងជើងចាប់ខ្លួន ម្នាក់ជានិស្សិត ត្រូវក្រុងព្យុងយ៉ាងចាប់ខ្លួនដើមឆ្នាំ២០១៦ និងដាក់ទោសគាត់បង្ខំអោយធ្វើពលកម្មរយៈពល១៥ឆ្នាំ។ ពលរដ្ឋអាមេរិកម្នាក់ទៀតមានអាយុ៦២ឆ្នាំ ត្រូវក្រុងព្យុងយ៉ាងបង្ខំអោយធ្វើពលកម្ម រយៈពេល១០ឆ្នាំ។
ហេតុការណ៍ចាប់ខ្លួនពលរដ្ឋអាមេរិកទី៤ កាលពីថ្ងៃសៅរ៍ កើតឡើងចំពេលទំនាក់ទំនងអាមេរិកនិងកូរ៉េខាងជើងកាន់តែដុនដាបខ្លាំង ដែលអាចឈានទៅរកការប្រយុទ្ធគ្នាបាន។ អាមេរិកចោទថា កូរ៉េខាងជើងចាប់ពលរដ្ឋខ្លួនដើម្បីធ្វើខែលការពារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ