កូរ៉េខាងជើងបង្ហាញលម្អិតគម្រោងការបាញ់មីស៊ីលសំដៅទៅកោះGuamអាមេរិក
ចុះផ្សាយនៅថ្ងៃ៖
ស្តាប់ - ០៥:០២
ថ្ងៃព្រហស្បតិ៍នេះ កូរ៉េខាងជើងបានបង្ហាញលម្អិតអំពីគម្រោងការវាយប្រហារមីស៊ីល សំដៅទៅកោះហ្គាំរបស់អាមេរិក។ យោងតាមផែនការ កងទ័ពកូរ៉េខាងជើងនឹងបាញ់មីស៊ីល៤ដើមដំណាលគ្នាតែម្តង ឆ្ពោះទៅកាន់កោះហ្គាំ នៅប៉ាស៊ីហ្វិក។ ការបញ្ជាក់លម្អិតផែនការវាយប្រហារនេះ អាចជាសញ្ញាថា ក្រុងព្យុងយ៉ាងនឹងធ្វើតាមការគំរាម។ ក្រុមជំនាញលើកឡើងថា បើកូរ៉េខាងជើងធ្វើតាមគម្រោងមែន លោកដូណាល់ ត្រាំ ប្រហែលជាពិបាកនឹងជ្រើសរើសវិធានការតបវិញណាស់។
គម្រោងការលម្អិតរបស់កងទ័ពកូរ៉េខាងជើងក្នុងការវាយប្រហារសំដៅទៅកោះGuamអាមេរិក
កងទ័ពកូរ៉េខាងជើងប្រាប់ថា នឹងបាញ់មីស៊ីល៤ដើម ក្នុងពេលដំណាលគ្នា ឆ្ពោះទៅកោះហ្គាំ។ មីស៊ីលទាំង៤ដើមនេះ គឺមីស៊ីលHwasong 12 បាញ់រយៈចំងាយមធ្យម នឹងហោះកាត់ទីក្រុងជប៉ុនចំនួន៣ គឺក្រុងស្ហ៊ីម៉ានShimane ហ៊ីរ៉ូស្ហ៊ីម៉ាHiroshima និងកូឈីKoichi។ មីស៊ីលទាំងនេះនឹងហោះ១៧នាទី៤៥វិនាទី ក្នុងរយៈចំងាយ៣៣៥៦,៧គីឡូម៉ែត្រ ហើយនឹងធ្លាក់ក្នុងសមុទ្រ នៅចំងាយ៣០ទៅ៤០គីឡូម៉ែត្រ ពីកោះហ្គាំអាមេរិក នៅប៉ាស៊ីហ្វិក។ កូរ៉េបាញ់Hwasong 12 នេះរួចហើយ កាលពីខែឧសភា។ មេបញ្ជាការយោធាកូរ៉េខាងជើងប្រាប់ថា កងទ័ពនឹងសម្រេចសម្រួលខ្លឹមសារក្នុងផែនការវាយប្រហារនេះ អោយរួចរាល់ នៅពាក់កណ្តាលខែសីហានេះ ហើយនឹងបញ្ជូនទៅអោយលោកគឹម ជុងអ៊ុន ពិនិត្យ។
សូមបញ្ជាក់ថា កោះហ្គាំអាមេរិកមានមនុស្សជាង១សែន៦ម៉ឺននាក់រស់នៅ នៅចំងាយប្រមាណ៣៥០០គីឡូម៉ែត្រ ពីកូរ៉េខាងជើង។ កោះហ្កាំជាទីតាំងយុទ្ធសាស្ត្រយោធាអាមេរិក មានយន្តហោះទំលាក់គ្រាប់បែក យន្តហោះប្រដេញ នាវាមុជទឹក ដែលតែងចូលរួមសមយុទ្ធជាមួយកូរ៉េខាងត្បូង។ នៅកោះហ្គាំ ក៏មានប្រព័ន្ធខែលមីស៊ីលការពារមីស៊ីល Thaadអាមេរិក ប្រើសម្រាប់បាញ់ស្ទាក់មីស៊ីលដែរ។
ការដែលកូរ៉េខាងជើងប្រកាសផែនការបាញ់មីស៊ីលក្បោះក្បាយបែបនេះ គឺដើម្បីឆ្លើយតបទៅលោកដូណាល់ ត្រាំ ដែលបានប្រើសំដីគំរាមថា នឹងប្រែក្លាយកូរ៉េខាងជើងអោយទៅជាភ្លើងនឹងកំហឹងនោះឯង។ ក្រុងព្យុងយ៉ាងបានតបទៅវិញថា លោកត្រាំជាមនុស្សដែលលែងដឹងខុសត្រូវទៀតហើយ ហើយការចរចាជាមួយមនុស្សបែបនេះ គឺមិនអាចធ្វើទៅរួចទេ។
បើពិនិត្យអោយមែនទែនទៅ ប្រធានាធិបតីអាមេរិកប្រើពាក្យពេចន៍បែបនេះ ក៏ប្រហែលជាលោកលួចច្រណែននឹងកូរ៉េខាងជើងដែលអភិវឌ្ឈន៍បច្ចេកវិទ្យាមីស៊ីល និងនុយក្លេអ៊ែរបានឆាប់រហ័សយ៉ាងនេះដែរ។ លោកគឹម ជុងអ៊ុន ឡើងកាន់កាប់កូរ៉េខាងជើងមិនដល់១០ឆ្នាំផង អភីវឌ្ឍន៍មីស៊ីលបានល្អយ៉ាងនេះ ហើយទោះជាមានទណ្ឌកម្មអន្តរជាតិ ក៏សេដ្ឋកិច្ចកូរ៉េខាងជើងនៅតែអាចបន្តរស់រានបាន។
ជាមួយគ្នានេះ លោកត្រាំក៏បារម្ភពីអានុភាពនុយក្លេអ៊ែរកូរ៉េខាងជើងដែរ ទើបបានជាបញ្ចេញពាក្យពេចន៍បែបនេះឡើង។ ព្រោះថា លោកបានទទួលដំណឹងពីភ្នាក់ងារចារកិច្ចយោធាអាមេរិកថា ក្រុងព្យុងយ៉ាងផលិតបានក្បាលគ្រាប់នុយក្លេអ៊ែរទំហំតូចនិងស្រាល សម្រាប់បំពាក់មីស៊ីល បាន១គ្រាប់ហើយ។
កូរ៉េខាងជើងទំនងមិនលេងសើចជាមួយអាមេរិកទេ
កងទ័ពកូរ៉េខាងជើងប្រកាសគម្រោងការណ៍វាយប្រហារ បែបហ្មត់ចត់ណាស់ ទំនងកងទ័ពច្បាស់ជានឹងបាញ់មីស៊ីលទាំង៤ដើមនេះ ឆ្ពោះទៅកោះអាមេរិកមែនហើយ។ ម្យ៉ាងទៀត ខែកក្កដាកន្លងទៅ ក្រុងព្យុងយ៉ាងបានបាញ់មីស៊ីលអន្តរទ្វីបដល់ទៅ២លើក ផ្គើនអាមេរិក។ លើកនេះ ក្រុងព្យុងយ៉ាងច្បាស់ជាហ៊ានគំរាមអោយប្លែកជាងលើកមុន គឺអាចនឹងបាញ់មីស៊ីលអោយបាន៤ដើម ដំណាលគ្នាតែម្តង។
កងទ័ពកូរ៉េខាងជើងហាក់ដូចជាចង់ប្រាប់ទៅអន្តរជាតិដែរថា បើកូរ៉េខាងជើងអនុវត្តគម្រោងការនេះមែន គឺស្របតាមច្បាប់អន្តរជាតិ គ្មានអ្វីខុសទាស់ទេ ព្រោះថា អង្គការសហប្រជាជាតិបានចេញទណ្ឌកម្មបន្ថែមប្រឆាំងកូរ៉េខាងជើង ដើម្បីជំរុញអោយក្រុងព្យងយ៉ាងចរចា តែលោកដូណាល់ ត្រាំ មិនចេះអត់ធ្មត់ បែរជាបន្ថែមភ្លើងក្នុងជម្លោះ ព្រមាន ប្រែក្លាយកូរ៉េខាងជើងអោយក្លាយជាភ្លើងនិងកំហឹង។ ហើយបើតាមគម្រោងការ កងទ័ពកូរ៉េខាងជើងនឹងមិនបាញ់មីស៊ីលទាំងនេះអោយចូលទៅដល់ដែនដីអាមេរិកទេ។ គឺគ្រោងអោយធ្លាក់ទៅសមុទ្រ ឆ្ងាយ៣០ ទៅ៤០ គីឡូម៉ែត្រដែរពីកោះហ្គាំ គឺធ្លាក់ក្រៅដែនដីអាមេរិក។ គម្រោងបាញ់មីស៊ីលរបស់កូរ៉េខាងជើងនេះ អាចថា ជាការផ្គើនបន្ថែមដល់លោកដូណាល់ ត្រាំ តែក៏ជាការដែលកូរ៉េខាងជើងបង្ហាញទៅលោកត្រាំ វិញថា កូរ៉េខាងជើងត្រៀមតបត ដើម្បីការពារបូរណភាពដែនដីខ្លួន។ ម្សិលមិញនេះ អាជ្ញាធរព្យុងយ៉ាងបានរៀបចំអោយមានបាតុកម្មប្រជាជន បង្ហាញការគាំទ្ររបបដឺកនាំ ប្រកាន់ជំហរការពារទឹកដីកូរ៉េខាងជើង។ ប្រជាជនកូរ៉េខាងជើងរាប់ពាន់នាក់បានចូលរួមក្បួនបាតុកម្មនេះ។
លោកដូណាល់ ត្រាំ ពិបាកនឹងចាត់វិធានការតបតទៅកូរ៉េខាងជើងវិញ
ក្នុងសម័យសង្គ្រាមត្រជាក់ សហភាពសូវៀតបានបាញ់មីស៊ីលទៅធ្លាក់នៅប៉ាស៊ីហ្វិក ចំងាយជាង១ពាន់គីឡូម៉ែត្រពីហាវ៉ៃ។ បើកូរ៉េខាងជើងបាញ់មីស៊ីលពេលនេះ ក៏គ្រោងនឹងអោយធ្លាក់ក្រៅដែនដីអាមេរិកដែរ។ យោងតាមក្រុមជំនាញ លោកដូណាល់ ត្រាំ ពិតជាពិបាករកដំណោះស្រាយតបទៅព្យុងយ៉ាង ព្រោះថា បើអាមេរិកមិនប្រើប្រព័ន្ធមីស៊ីលការពារមីស៊ីល ដើម្បីបាញ់ស្ទាក់មីស៊ីលរបស់ក្រុងព្យុងយ៉ាងទេ នោះលោកគឺម ជុងអ៊ុន នឹងបានចិត្តកាន់តែខ្លាំង ហើយពេលក្រោយៗទៀត ច្បាស់ជាអាចបាញ់មីស៊ីលលេងច្រើនដើមទៀត ក្បែរដែនដីអាមេរិកមិនខាន។
ប៉ុន្តែ បើអាមេរិកបាញ់ស្ទាក់មីស៊ីលកូរ៉េខាងជើង គេសួរថា តើអាចស្ទាក់បានដូចបំណងទេ ចុះបើស្ទាក់មិនបាន នោះកូរ៉េខាងជើងនឹងចំអកថាខែលមីស៊ីលអាមេរិក អន់ប្រើការមិនបានទៅហើយ? បញ្ហាគឺថា វាកាន់តែធ្វើអោយមានភាពតានតឹងថែមទៀតរវាងអាមេរិកនឹងប្រទេសដៃគូក្នុងតំបន់ ព្រោះបើប្រព័ន្ធការពារមីស៊ីលដូចជាប្រព័ន្ធThaadនេះអន់មែន តើកូរ៉េខាងត្បូង និងជប៉ុនដែលរងការគំរាមដែរនោះ ធ្វើម៉េចអាចទុកចិត្តថាអាមេរិកការពារពួកគេបានទៀតទៅ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ