ចលនានៅកូរ៉េខាងត្បូងមានកាន់តែច្រើនអំពាវនាវអោយសេអ៊ូលផលិតអាវុធនុយក្លេអ៊ែរការពារខ្លួន
ចុះផ្សាយនៅថ្ងៃ៖
ស្តាប់ - ០៥:៥៣
ក្រោយកូរ៉េខាងជើងបង្ហាញផែនការវាយប្រហារមីស៊ីលឆ្ពោះទៅកោះGuam អាមេរិក លោកដូណាល់ ត្រាំ បានគំរាមបកទៅវិញថា នឹងសងសឹក ប្រសិនបើក្រុងព្យុងយ៉ាងហ៊ានវាយប្រហារអាមេរិក រឺក៏វាយប្រហារប្រទេសជាដៃគូអាមេរិក។ ស្ថានការណ៍កាន់តែតានតឹង។ ក្នុងស្រុកកូរ៉េខាងត្បូង គេឃើញមានកាន់តែច្រើន នូវចលនាអំពាវនាវសុំអោយរដ្ឋាភិបាលសេអ៊ូលផលិតអាវុធនុយក្លេអ៊ែរ ដើម្បីត្រៀមការពារប្រទេស ប្រឈមនឹងកូរ៉េខាងជើង។ ចិនបន្តអំពាវនាវអោយគ្រប់ភាគីរក្សាភាពអត់ធ្មត់។
សារព័ត៌មានក្នុងស្រុកកូរ៉េខាងត្បូងជំរុញអោយរដ្ឋាភិបាលគិតគូរផលិតអាវុធនុយក្លេអ៊ែរ
ថ្មីៗនេះ លោកសុង យុងម៉ូ ជារដ្ឋមន្ត្រីការពារជាតិកូរ៉េខាងត្បូង បានប្រាប់ថា កូរ៉េខាងត្បូងមិនបានគ្រោងផលិតអាវុធបរមាណូទេ ប៉ុន្តែ លោកបានប្រាប់ដែរថា កូរ៉េខាងត្បូងមានសមត្ថភាពពេញលេញក្នុងការផលិតអាវុធនុយក្លេអ៊ែរ។ ឥឡូវនេះ ស្ថានការណ៍កាន់តែតានតឹង នៅឧបទ្វីបកូរ៉េ។ លោកដូណាល់ ត្រាំ និងលោកគឹម ជុងអ៊ុន នៅតែបន្តសង្គ្រាមពាក្យសំដីជាមួយគ្នារៀងរាល់ថ្ងៃ។ ប្រជាជនកូរ៉េខាងត្បូងប្រហែលជាកាន់តែពិបាកទុកចិត្តថា អាមេរិកអាចជួយកូរ៉េខាងត្បូងណាស់ ករណីមានការវាយប្រហារពីកូរ៉េខាងជើង។ ចលនាទាមទារអោយរដ្ឋាភិបាលគិតគូរឡើងវិញ ពីការផលិតអាវុធនុយក្លេអ៊ែរទុកការពារខ្លួន កាន់តែមានច្រើន។ កាសែតក្នុងស្រុកជាច្រើនបានជំរុញសេអ៊ូលអោយគិតគូររឿងនេះ កុំចាំតែសង្ឃឹមលើអាមេរិកជួយពេក។ កាសែត ដូចជា Korea Economic Daily បានទាមទារកូរ៉េខាងត្បូងមានជម្រើសយោធាផ្ទាល់ខ្លួន។ សារព័ត៌មានក្នុងស្រុកមិនចង់អោយរដ្ឋាភិបាលពឹងតែលើអាមេរិកពេកទេ អាមេរិកខ្លួនឯងក៏ត្រូវកូរ៉េខាងជើងគំរាមព្រមានកាន់តែធ្ងន់ដែរឥឡូវនេះ។ ជាក់ស្តែង ម្សិលមិញនេះ កងទ័ពកូរ៉េខាងជើងបានបង្ហាញលម្អិតផែនការបាញ់មីស៊ីល៤ដើមដំណាលគ្នា ឆ្ពោះទៅកោះហ្គាំ នៅប៉ាស៊ីហ្វិក។ ផែនការនេះ ត្រូវបានបង្ហាញបែបហ្មត់ចត់ណាស់ ដូច្នេះ ក្រុងព្យុងយ៉ាងប្រហែលមិនលេងសើចទេ។
ដោយឡែក កូរ៉េខាងត្បូងគ្មានសិទ្ធិផលិតអាវុធនុយក្លេអ៊ែរទុកការពារខ្លួនទេ ដោយសារបានចុះហត្ថលេខាលើសន្ធិសញ្ញាថាមពលបរមាណូ ជាមួយអាមេរិក កាលពីឆ្នាំ១៩៧៤។ យោងតាមសន្ធិសញ្ញានេះ កូរ៉េខាងត្បូងមិនផលិតអាវុធបរមាណូ ប៉ុន្តែ ទទួលបានការការពារពីសហរដ្ឋអាមេរិក។
ក្រៅពីជំរុញអោយក្រុងសេអ៊ូលគិតគូររឿងផលិតអាវុធនុយក្លេអ៊ែរទុកការពារខ្លួន សារព័ត៌មានកូរ៉េខាងត្បូងក៏បានដាក់លក្ខខណ្ឌទៅអាមេរិកផងដែរថា បើអាមេរិកមិនចង់ឃើញកូរ៉េខាងត្បូងផលិតគ្រាប់បែកនុយក្លេអ៊ែរទុកការពារខ្លួនទេ ទាល់តែអាមេរិកដាក់ពង្រាយអាវុធនុយក្លេអ៊ែរ ក្នុងទឹកដីកូរ៉េខាងត្បូង ដើម្បីជួយការពារកូរ៉េខាងត្បូង។
ក្រោយសង្គ្រាមកូរ៉េ ឆ្នាំ១៩៥៣ អាមេរិកធ្លាប់បានពង្រាយអាវុធនុយក្លេអ៊ែរមួយចំនួនដែរ ក្នុងទឹកដីកូរ៉េខាងត្បូង ប៉ុន្តែ ក្រោយមកទៀត អាមេរិកក៏ដកអាវុធទាំងនោះចេញទៅវិញ ដោយសារតែ កាលពីឆ្នាំ១៩៩១ បងប្អូនកូរ៉េទាំង២សន្យារួមគ្នាថា នឹងធ្វើអោយឧបទ្វីបកូរ៉េទទួលបានសុខសន្តិភាព។ ប៉ុន្តែ ឆ្នាំ២០០៦ ក្រុងព្យុងយ៉ាងបែរជាបានសាកល្បងនុយក្លេអ៊ែរជាលើកទី១ ហើយឆ្នាំ២០០៩ ក៏បានទាត់ចោលពាក្យពេចន៍សន្យាទាំងនេះជាផ្លូវការទៀត។ អញ្ចឹង កូរ៉េខាងត្បូងត្រូវប្រឈមការគំរាមនុយក្លេអ៊ែរ និងមីស៊ីលពីកូរ៉េខាងជើងជាប្រចាំវិញទៅ។ ការស្ទាបស្ទង់មតិមួយ ក្នុងឆ្នាំ២០១៦កន្លងទៅ បង្ហាញថា ប្រជាជនកូរ៉េខាងត្បូង៥៧ភាគរយ ពេញចិត្តអោយជាតិខ្លួនមានអាវុធនុយក្លេអ៊ែរទុកការពារខ្លួន ៣១ភាគរយទៀតជំទាស់។
បើនិយាយពីសមត្ថភាពផលិតអាវុធនុយក្លេអ៊ែររបស់កូរ៉េខាងត្បូង គឺខ្ពស់ជាងកូរ៉េខាងជើងឆ្ងាយណាស់។ កូរ៉េខាងត្បូងជាប្រទេសជឿនលឿនគ្រប់វិស័យ ជឿនលឿនផ្នែកបច្ចេកវិទ្យា។ កូរ៉េខាងត្បូងមានជំនាញនិងសមត្ថភាពមិនចាញ់ជប៉ុនទេ នៅអាស៊ី។ ក្រុមជំនាញហ៊ានរហូតលើកឡើងថា ដើម្បីផលិតគ្រាប់បែកបរមាណូ១គ្រាប់ កូរ៉េខាងត្បូងត្រូវការពេលតែប៉ុន្មានខែប៉ុណ្ណោះ។ ប៉ុន្តែ បើយោងតាមក្រុមជំនាញ បញ្ហាធ្ងន់ស្ថិតត្រង់ថា បើកូរ៉េខាងត្បូងផលិតគ្រាប់នុយក្លេអ៊ែរការពារខ្លួនមែន នោះកូរ៉េខាងជើងនឹងក្តៅក្រហាយ ហើយរឹតតែមិនចង់ចូលមកចរចា។
បើក្រុងសេអ៊ូលផលិតគ្រាប់បែកនុយក្លេអ៊ែរ ស្ថានការណ៍ឧបទ្វីបកូរ៉េក៏កាន់តែស្ថិតកៀកក្បែរសង្គ្រាម។ ប្រទេសនៅអាស៊ីដូចជាជប៉ុន រឺក៏តៃវ៉ាន់ ច្បាស់ជាប្រុងជើងការដូចគ្នា ប្រទេសទាំងនេះមិនអាចបណ្តោយអោយសង្គ្រាមបំផ្លិចបំផ្លាញទឹកដី សម្លាប់ប្រជាជនពួកគេទេ។ ជប៉ុនអាចនឹងយកលេស សើរើរដ្ឋធម្មនុញ្ញឡើងវិញ ដើម្បីអភិវឌ្ឈន៍អាវុធនុយក្លេអ៊ែរនឹងគេដែរ។
ចិនប្រកាន់ជំហរបែបណា ករណីមានសង្គ្រាមនៅឧបទ្វីបកូរ៉េ?
រហូតពេលនេះ ចិននៅតែប្រកាន់ជំហរទាមទារអោយគ្រប់ភាគីរក្សាភាពអត់ធ្មត់។ ចិនពិបាកនិយាយគ្នា ជាមួយអាមេរិកនិងកូរ៉េខាងជើងណាស់ ព្រោះភាគីនិមួយៗនៅតែបន្តគំរាមពាក្យសំដីគ្នាទៅវិញទៅមក។ ចិនបានជួយអាមេរិកអោយសម្រេចបំណង អោយអង្គការសហប្រជាជាតិ ដាក់ទណ្ឌកម្មបន្ថែមលើក្រុងព្យុងយ៉ាង។ ចិនមិនបានចេញវេតូជំទាស់សំណើអាមេរិកទេ ពេលក្រុមប្រឹក្សាសន្តិសុខបោះឆ្នោតអនុម័ត។ អាមេរិកសម្រេចបំណងខ្លួនហើយ តែលោកដូណាល់ ត្រាំ បែរជាបន្តធ្វើដូចកូនក្មេង បញ្ចេញពាក្យសំដីជេរទៅជេរមកជាមួយលោកគឺម ជុងអ៊ុនទៅវិញ។ បើមានការផ្ទុះជម្លោះយោធា គឺមិនអាចបន្ទោសតែកូរ៉េខាងជើងតែម្ខាងទេ។ អ្នកណាៗក៏ដឺងដែរថា កូរ៉េខាងជើងមានប្រពៃណីគំរាមមីស៊ីលនិងនុយក្លេអ៊ែរផ្គើនសហគមន៍អន្តរជាតិជាប្រចាំទៅហើយ។
មិនដឺងថា តើរដ្ឋាភិបាលចិនមានជំហរបែបណាទេ ករណីមានសង្គ្រាម។ ប៉ុន្តែ បើយោងតាមបទវិចារណកថារបស់សារព័ត៌មានចិន បើកូរ៉េខាងជើងវាយប្រហារអាមេរិកមុន ចិននឹងប្រកាន់ជំហរអព្យាក្រឹត ប៉ុន្តែ បើអាមេរិកហ៊ានផ្តួលនិងផ្លាស់ប្តូររបបដឹកនាំព្យុងយ៉ាង ចិននឹងអន្តរាគមន៍ជាមិនខាន។ ទោះយ៉ាងនេះក្តី នេះគ្រាន់តែជាការសរសេររបស់កាសែតក្នុងស្រុកចិនប៉ុណ្ណោះ មិនមែនជា ការប្រកាស រឺមតិផ្លូវការរបស់រដ្ឋអំណាចចិនទេ។
ដោយឡែក ម្សិលមិញនេះ លោកដូណាល់ ត្រាំ បានយកប្រធានបទពាណិជ្ជកម្មចិន-អាមេរិក មកធ្វើជាលេសជំរុញអោយចិនជួយអាមេរិក ទៅនិយាយជាមួយអោយកូរ៉េខាងជើង ដើម្បីជួយកាត់បន្ថយភាពតានតឹង។ លោកត្រាំនិយាយបែបយ៉ាងថា បើចិនជួយអាមេរិក អារម្មណ៍លោកទាក់ទងនឹងផ្នែកពាណិជ្ជកម្មនឹងខុសពីមុន គឺអាចក្នុង ន័យថា បើចិនជួយអាមេរិក លោកត្រាំនឹងជួយកាត់បន្ថយឱនភាពពាណិជ្ជកម្មអាមេរិក-ចិនបាន។ តែមិនដឺងថា ចិនត្រូវជួយអាមេរិកនិយាយយ៉ាងម៉េចទេ ជាមួយកូរ៉េខាងជើង បើលោកត្រាំនិងលោកគឺម ជុងអ៊ុន សុទ្ធតែជើងខ្លាំងផ្គើនសំដីគ្នាយ៉ាងនេះ !
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ