សហភាពអាហ្វ្រិកសុំអោយអ.ស.ប ព្យួរសវនាការកាត់ទោសប្រធានាធិបតីនិងអនុប្រធានាធិបតីកេនយ៉ា
នៅថ្ងៃសុក្រនេះ ក្រុមប្រឹក្សាសន្តិសុខអង្គការសហប្រជាសជាតិបើកកិច្ចពិភាក្សាពិនិត្យសេចក្តីសំរេចរបស់សហភាពអាហ្វ្រិក ដែលបានដាក់សុំអោយអង្គការសហប្រជាជាតិ ព្យួរសវនាការកាត់ទោសប្រធានាធិបតី និងអនុប្រធានាធិបតីកេនយ៉ា រយៈពេលមួយឆ្នាំ។ កន្លងមក តុលាការព្រហ្មទណ្ឌអន្តរជាតិបានចោទប្រកាន់មេដឹកនាំកេនយ៉ាទាំងពីររូបនេះ ពីបទឧក្រិដ្ឋប្រឆាំងមនុស្សជាតិ។ ការសុំអោយព្យួរសវនាការកាត់ទោសនេះ ប្រហែលជាពិបាកនឹងអនុម័តណាស់ ដោយសារតែបណ្តាប្រទេសអាហ្វ្រិក ខ្វះសម្លេងគាំទ្រ ក្នុងក្រុមប្រឹក្សាសន្តិសុខអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ក្រុមប្រឹក្សាសន្តិសុខអង្គការសហប្រជាសជាតិបានបើកកិច្ចពិភាក្សាពិនិត្យសេចក្តីសំរេចរបស់សហភាពអាហ្វ្រិក នៅថ្ងៃសុក្រនេះ។ ជាសេចក្តីសំរេចសុំអោយអង្គការសហប្រជាជាតិ ព្យួរសវនាការកាត់ទោសប្រធានាធិបតីកេនយ៉ា និងអនុប្រធានាធិបតីកេនយ៉ា រយៈពេលមួយឆ្នាំ។ ប្រទេសរ៉ូវ៉ាន់ដាជាអ្នកការពារសេចក្តីសំរេចនេះ។ រ៉ូវ៉ាន់ដាជាសមាជិកមិនអចិន្ត្រៃយ៍នៃអង្គការសហប្រជាជាតិ ប៉ុន្តែ មិនមែនជាប្រទេសហត្ថលេខីនៅតុលាការព្រហ្មទណ្ឌអន្តរជាតិទេ។
តុលាការព្រហ្មទណ្ឌអន្តរជាតិបានចោទប្រកាន់ប្រធានាធិបតីកេនយ៉ា អ៊ូហ៊ូរូ កេនយ៉ាត់តាដែលទើបជាប់ឆ្នោត នៅដើមឆ្នាំ២០១៣ និងអនុប្រធានាធិបតីកេនយ៉ា វីល្លីយ៉ាំ រុតូ ពីបទឧក្រិដ្ឋប្រឆាំងមនុស្សជាតិ ក្នុងអំឡុងវិបត្តិនយោបាយក្រោយការបោះឆ្នោត ចុងឆ្នាំ ២០០៧។ អំពើហិង្សានយោបាយកាលណោះ បានសំលាប់មនុស្សជាង១ពាន់នាក់។
ការពិភាក្សាគ្នាក្នុងក្រុមប្រឹក្សាសន្តិសុខអង្គការសហប្រជាជាតិនៅថ្ងៃសុក្រនេះប្រៀបបាននឹងការប្រកួតរវាងតុលាការព្រហ្មទណ្ឌអន្តរជាតិ និងបណ្តាប្រទេសអាហ្វ្រិកដូច្នោះដែរ។ កន្លងមក មេដឹកនាំអាហ្វ្រិកធ្លាប់បានបើកកិច្ចប្រជុំធំមួយ បរិហាររិះគន់តុលាការព្រហ្មទណ្ឌអន្តរជាតិ ថាជាឧបករណ៍នយោបាយបំរើប្រទេសស្បែកស និងរើសអើងពូជសាសន៍ ដោយកាត់ទោសតែមេដឹកនាំអាហ្វ្រិក។
ក្រុមប្រឹក្សាសន្តិសុខអង្គការសហប្រជាជាតិអាចសំរេចលើកការព្យួរសវនាការកាត់ទោសរយៈពេលមួយឆ្នាំបាន ប្រសិនបើសវនការនេះជាការគំរាមដល់សន្តិសុខអន្តរជាតិ។ សហភាពអាហ្វ្រិកគិតថា សវនាការនេះជាការរាំងស្ទះកាតព្វកិច្ចប្រធានាធិបតី និងអនុប្រធានាធិបតីកេនយ៉ា ក្នុងការប្រយុទ្ធប្រឆាំងក្រុមប្រដាប់អាវុធអ៊ីស្លាមនៅប្រទេសសូម៉ាលី ពិសេសបន្ទាប់ពីមានអំពើភេរវកម្មនៅអគារពាណិជ្ជកម្មក្រុងណៃរ៉ូប៊ីថ្មីៗនេះរួចមក។
ក្រុមប្រឹក្សាសន្តិសុខ អង្គការសហប្រជាជាតិ ប្រហែលពិបាកអនុម័តសេចក្តីសំរេចសុំព្យួរទោសនេះណាស់ ព្រោះថាបណ្តាប្រទេសអាហ្វ្រិកខ្វះសម្លេងគាំទ្រច្រើន។ ក្នុងចំណោមសមាជិក១៥ប្រទេសនៃក្រុមប្រឹក្សាសន្តិសុខ សមាជិក៧ប្រទេសជាប្រទេសហត្ថលេខីនៃតុលាការព្រហ្មទណ្ឌអន្តរជាតិ។ ម្យ៉ាងទៀត អាមេរិកក៏ជំទាស់សេចក្តីសំរេចរបស់សហភាពអាហ្វ្រិកនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ