កំណែទម្រង់បោះឆ្នោត៖ បក្សសង្គ្រោះជាតិផ្ញើលិខិតសុំការបញ្ជាក់ពីគណបក្សប្រជាជន
គណបក្សសង្គ្រោះជាតិ នៅថ្ងៃព្រហស្បតិ៍ទី ១៣មីនា បានផ្ញើលិខិតផ្លូវការមួយទៅកាន់គណបក្សប្រជាជនកម្ពុជាដែលជាដៃគូចរចា។ ជាលិខិតដើម្បីស្នើឱ្យបក្សកាន់អំណាចបញ្ជាក់ពីជំហរររបស់ខ្លួនថា តើបញ្ហាគណៈកម្មាធិការជាតិរៀបចំការបោះឆ្នោតនឹងក្លាយជារបៀបវារៈនៃការចរចា នៅថ្ងៃទី១៧ មីនាដើមសប្តាហ៍ក្រោយ ឬយ៉ាងណា? បើគ្មានចម្លើយនោះទេបក្សប្រឆាំងនឹងមិនត្រលប់ចូលតុចរចា និងគំរាមធ្វើបាតុកម្ម។ គណបក្សប្រជាជនកម្ពុជាបានបញ្ជាក់ថា ខ្លួនមិនបានបដិសេធចំពោះសំណើនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
នៅថ្ងៃព្រហស្បតិ៍ទី១៣ មីនានេះ លិខិតផ្លូវការមួយរបស់គណសង្គ្រោះជាតិ នឹងត្រូវបញ្ជូនទៅកាន់ទីស្នាក់ការកណ្តាលគណបក្សប្រជាជនកម្ពុជា ដើម្បីស្នើសុំឱ្យបក្សកាន់អំណាចបញ្ជាក់ពីគោលជំហរររបស់ខ្លួន ថាតើព្រមលើកយករបៀបវារៈស្តីពីគណៈកម្មាធិការជាតិរៀបចំការបោះឆ្នោតមកពិភាក្សា នៅថ្ងៃទី១៧ មីនាដើម សប្តាហ៍ក្រោយ ឬយ៉ាណា? ជាការពិភាក្សាដែលគណបក្សទាំងពីរយល់ព្រម មូលមាត់គ្នាថា នឹងជួបសាជាថ្មីម្តងទៀត ក្រោយជំនួបដែលមិនអាចចេញសេចក្តីថ្លែងការណ៍រួម កាលពីថ្ងៃទី១០មីនា កន្លងទៅ។
ថ្លែងប្រាប់វិទ្យុបារាំងអន្តរជាតិRFIនៅព្រឹកនេះ លោក សុន ឆ័យ ប្រធានក្រុមចរចានៃគណបក្សសង្គ្រោះជាតិ បានបញ្ជាក់ថា លិខិតស្នើបញ្ជាក់ពីគោលជំហរនោះ គឺមានសារសំខាន់ណាស់ ព្រោះថាកំណែទម្រង់នៃគណៈកម្មាធិកាជាតិរៀបចំបោះឆ្នោត ជាចំណុចគន្លឹះនៃសុក្រិតភាព តម្លាភាព និងភាពយុត្តិធម៌ ស្តីពីការបោះឆ្នោតនៅកម្ពុជា។ បើតាមលោក សុន ឆ័យដដែល សំណើស្តីពីរបៀបវារៈនៃគណៈកម្មាធិការគ.ជ.បនេះ គឺជាបំណងប្រាថ្នារបស់អង្គការសង្គមស៊ីវិលដែលជំនាញលើបញ្ហាបោះឆ្នោត និងប្រជាពលរដ្ឋ។ ប្រជាពលរដ្ឋដែលបានបាត់បង់ជំនឿរបស់ខ្លួនទៅលើគណៈកម្មាធិការជាតិរៀបចំការបោះឆ្នោតនេះរួចទៅហើយ។
ប្រធានក្រុមចរចានៃគណបក្សសង្គ្រោះជាតិ លោក សុន ឆ័យដដែល បានគូសបញ្ជាក់ថា គណៈកម្មាធិកាជាតិរៀបចំការបោះឆ្នោត ដែលជាអាជ្ញាកណ្តាលកាត់ក្តីនៃការបោះឆ្នោតនោះ មិនត្រូវស្ថិតក្រោមឥទ្ធិពលនៃគណបក្សនយោបាយណាមួយនោះទេ។ គណបក្សសង្គ្រោះជាតិ គឺចង់ឱ្យប្តូរឈ្មោះគណៈកម្មាធិការជាតិរៀបចំការបោះឆ្នោតថែមទៀតផង។
មន្ត្រីជាន់ខ្ពស់នៃការរិយាល័យនយោបាយគណបក្សប្រជាជនកម្ពុជា លោក ជាម យៀប បានអះអាងថា បក្សកាន់អំណាចមិនបដិសេធឡើយ ចំពោះការលើកយករបៀបវារៈនៃគណៈកម្មាធិការជាតិ រៀបចំការបោះឆ្នោត នៅថ្ងៃទី១៧មីនា ដែលជាជំនួបលើកក្រោយនោះ។ លោក ជាម យៀប ដែលជាសមាជិកនៃក្រុមចរចាមកពីគណបក្សកាន់អំណាច បានស្នើទៅកាន់បក្សប្រឆាំងរបស់លោក សម រង្ស៊ីថា បើទោះបីជានៅថ្ងៃចរចាខាងមុខ ក្រុមនៃបក្សទាំងពីរខ្វែងគំនិតគ្នា លើបញ្ហាមួយចំនួននោះ ក្រុមចរចាគួរត្រូវទុកបញ្ហាខ្វែងគំនិតនោះមួយឡែក ហើយពិភាក្សារបៀបវារៈផ្សេងជំនួសវិញ។
បើតាមលោក ជាម យៀប របៀបវារៈខ្វែងគំនិតគ្នាវាងបក្សទាំងពីរ ក្នុងថ្ងៃចរចា គឺជាភារៈរបស់ថ្នាក់ដឹកកំពូលនយោបាយនៃគណបក្សដែលត្រូវដោះស្រាយ និងធ្វើសម្បទានរវាងគ្នា។
សូមបញ្ជាក់ថា ការបញ្ជូនលិខិតបញ្ជាក់ស្នើគោលជំហរពីគណបក្សសង្គ្រោះជាតិទៅកាន់គណបក្សប្រជាជនកម្ពុជា ស្តីពីគណៈកម្មាធិការជាតិរៀបចំការបោះឆ្នោតនេះ គឺធ្វើឡើងភ្លាមៗ មួយថ្ងៃក្រោយការប្រកាសផ្តាច់ផ្លូវចរចា និងគម្រាមធ្វើបាតុកម្មរបស់លោក សម រង្ស៊ី ប្រធានគណបក្សសង្គ្រោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ