ក្រុមហ៊ុនមូលបត្រកម្ពុជាព្យាយាមទាក់ទាញសមាជិកថ្មីឲ្យចូលក្នុងទីផ្សារភាគហ៊ុន
នៅថ្ងៃទី ១៩ កុម្ភៈនេះ ក្រុមហ៊ុន មូលបត្រកម្ពុជា CSX បានរៀបចំកម្មវិធី ឆ្ពោះទៅកាន់ការចុះបញ្ជីនៅផ្សារមូលបត្រកម្ពុជាដើម្បីបង្ហាញដល់បណ្តាក្រុមរដ្ឋ និងឯកជននានា ដែលមានបំណងចូលក្នុងទីផ្សារមូលបត្រកម្ពុជា។ យោងតាមមន្ត្រីទទួលបន្ទុកទីផ្សារមូលបត្រកម្ពុជា នៅឆ្នាំ២០១៤នេះ មានក្រុមហ៊ុនចំនួន ១០ ដែលចាប់អារម្មណ៍ចុះបញ្ជីនៅក្នុងទីផ្សារភាគហ៊ុន ក្នុងនោះ មានក្រុមហ៊ុនរដ្ឋចំនួន៣ ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
បន្ទាប់ពីដំណើរការអស់រយៈពេលជិត ២ឆ្នាំមក ក្រុមហ៊ុនផ្សារមូលបត្រកម្ពុជាបានទទួលក្រុមហ៊ុន ចុះបញ្ជីជាផ្លូវការតែមួយគត់ប៉ុណ្ណោះ គឺរដ្ឋាករទឹកស្វយ័តក្រុងភ្នំពេញ (PPWSA) ។ ដើម្បីទាក់ទាញក្រុមហ៊ុនថ្មីទៀតឲ្យចុះឈ្មោះលក់ភាគហ៊ុនរបស់ខ្លួន នៅព្រឹកថ្ងៃទី ១៩ កុម្ភៈ ឆ្នាំ ២០១៤នេះ ក្រុមហ៊ុនមូលបត្រកម្ពុជា CSX ដែលជាក្រុមហ៊ុនចំរុះរវាងរដ្ឋាភិបាលកម្ពុជា និងផ្សារមូលបត្រកូរ៉េ បានរៀបចំកម្មវិធី ឆ្ពោះទៅកាន់ការចុះបញ្ជីនៅផ្សារមូលបត្រកម្ពុជា។
កម្មវិធីនេះមានគោលដៅ បង្កលក្ខណៈងាយស្រួលដល់បណ្តាក្រុមហ៊ុននានាដែលមាន បំណងចុះបញ្ជី រឺចូលទៅក្នុងផ្សារមូលបត្រ ដើម្បីដាក់លក់ភាគហ៊ុនរបស់ខ្លួន។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជាបានប្រាប់អ្នកយកសារព័ត៌មានថា នៅក្នុងឆ្នាំ ២០១៤នេះ មានក្រុមហ៊ុនចំនួន ១០ ដែលបានចាប់អារម្មណ៍ចុះបញ្ជីជាមួយនិងក្រុមហ៊ុនមូលបត្រកម្ពុជា ដោយក្នុងនោះមានក្រុមហ៊ុនចំនួន ២ រឺ ទៅ ៣ កំពុងតែរៀបចំនីតិវិធី និងឯកសារ ដើម្បីត្រៀមខ្លួនចូលក្នុងទីផ្សារភាគហ៊ុន។ ក្នុងចំណោមក្រុមហ៊ុនទាំង១០ នោះមានក្រុមហ៊ុនរបស់រដ្ឋចំនួន ៣ ដែលរួមមាន កំពង់ផែស្វយ័តក្រុងព្រះសីហនុ ទូរគមនាគមន៍កម្ពុជា និងកំពង់ផែស្វយ័តក្រុងភ្នំពេញ។
លោក ហុង សុហួរ ឲ្យដឹងទៀតថា នៅដំណាច់ឆ្នាំ២០១៤នេះ យ៉ាងហោចណាស់ក៏មានក្រុមហ៊ុនចំនួនពីរដែរ ដែលនឹងរៀបចំឯកសាររួចរាល់ ហើយនឹងចុះបញ្ជីជាផ្លូវការ ចូលក្នុងផ្សារមូលបត្រកម្ពុជា ប៉ុន្តែលោកមិនអាចបញ្ជាក់ថា ក្រុមហ៊ុនទាំងពីរនោះមានឈ្មោះអ្វីខ្លះនោះទេ។
គួរបញ្ជាក់ថា ក្រុមហ៊ុនមូលបត្រកម្ពុជា បានចាប់ផ្តើមដំណើរការកាលពីថ្ងៃទី ១៨ មេសា ឆ្នាំ ២០១២ ហើយរហូតមកទល់នឹងបច្ចុប្បន្ន ក្រុមហ៊ុននេះ ទទួលបានការចុះបញ្ជីពីក្រុមហ៊ុនរដ្ឋតែមួយគត់គឺ រដ្ឋាករទឹកស្វយ័តក្រុងភ្នំពេញ PPWSA។ ភាគហ៊ុនរបស់រដ្ឋាកទឹកស្វយ័តក្រុងភ្នំពេញ មានតំលៃដើម ក្នុងមួយហ៊ុន ៦៣០០រៀល។ ភាគហ៊ុននេះបានឡើងដល់ទៅជាង ១ម៉ឺនរៀល ក្នុងរយៈពេលជួញដូរ ពីរទៅ បីខែដំបូង ប៉ុន្តែ បន្ទាប់ពីនោះ រហូតមកដល់បច្ចុប្បន្នភាគហ៊ុនរបស់រដ្ឋាករទឹកស្វយ័តក្រុងភ្នំពេញបន្តធ្លាក់ចុះជាបន្តបន្ទាប់។នៅថ្ងៃពុធនេះភាគហ៊ុនមានតំលៃត្រឹមតែ ៥០០០ រៀលតែប៉ុណ្ណោះក្នុងមួយហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ