ទំនាក់ទំនងគុយបា-អាមេរិកនឹងទៅជាយ៉ាងណា ក្រោយហ្វីដែល កាស្ត្រូ?
ចុះផ្សាយនៅថ្ងៃ៖
ស្តាប់ - ០៥:២៧
ថ្ងៃអាទិត្យនេះ ប្រជាជនគុយបាបន្តកាន់ទុក្ខបិតាបដិវត្ត ហ្វីដែល កាស្ត្រូ ដែលបានទទួលមរណភាព កាលពីថ្ងៃសុក្រ ក្នុងអាយុ៩០ឆ្នាំ។ គុយបាអនុញ្ញាតលោកកាស្ត្រូទទួលមរណភាពចំពេលដែលគុយបា និងសហរដ្ឋអាមេរិកទើបតែខិតទៅរកគ្នាឡើងវិញ តែក៏ចំពេលដែលលោកដូណាល់ ត្រាំ ត្រូវកាន់កាប់សហរដ្ឋអាមេរិកបន្តពីលោកអូបាម៉ាដែរ។ តើដូណាល់ ត្រាំ អាចបំផ្លាញទំនាក់ទំនងដែលលោកអូបាម៉ាខំស្តារឡើងវិញជាមួយគុយបាទេ? គុយបានឹងក្លាយទៅជាយ៉ាងណាក្រោយហ្វីដែល កាស្ត្រូ?
ក្រោយមរណភាពហ្វីដែល កាស្ត្រូ លោកដូណាល់ ត្រាំ ចង់ជួយប្រជាជនគុយបាអោយទទួលបានភាពរុងរឿងឡើងវិញ
ក្នុងអាណត្តិលោកអូបាម៉ា សហរដ្ឋអាមេរិកទើបបានបើកទ្វារស្ថានទូតខ្លួន នៅទីក្រុងឡាហាវ៉ាន កាលពីឆ្នាំមុន។ ប៉ុន្តែ មុនជាប់ឆ្នោតជាប្រធានាធិបតីថ្មីបន្តពីលោកអូបាម៉ា លោកដូណាល់ ត្រាំ ធ្លាប់សន្យាថា នឹងបិទទ្វារស្ថានទូតនេះទៅវិញ។
ទំនាក់ទំនងគុយបា-អាមេរិក រស់រវើក រឺក៏អន់ថយទៅវិញ ពេលនេះ គឺអាស្រ័យលើលោកដូណាល់ ត្រាំ។ លោកត្រាំ មិនចូលចិត្តលោក ហ្វីដែល កាស្ត្រូទេ។ លោកត្រាំ ចាត់ទុកលោកកាស្ត្រូ ថាជាមេដឹកនាំផ្តាច់ការ ដែលធ្វើបាបប្រជាជន អោយរងភាពឈឺចាប់ ធ្វើអោយគុយបាធ្លាក់ខ្លួនជាប្រទេសក្រីក្រ រងការបំពានសិទ្ធិមនុស្សជាដើម។ ក្រោយលោកហ្វីដែល កាស្ត្រូស្លាប់កាលពីថ្ងៃសុក្រ លោកត្រាំលើកឡើងថា ទោះជាលោកកាស្ត្រូបានបន្សល់ទុក្ខសោកទាំងនេះអោយគុយបាក្តី ក៏សហរដ្ឋអាមេរិកសន្យាថា នឹងធ្វើអោយប្រជាជនគុយបាទទួលបានភាពរុងរឿង និងសេរីភាពនៅទីបញ្ចប់។
បើផ្អែកតាមពាក្យពេចន៍សន្យាជួយប្រជាជនគុយបាអោយទទួលបានភាពរុងរឿងឡើងវិញនេះ ដូណាល់ ត្រាំ ប្រហែលជាមិនអាចធ្វើបាបគុយបា មិនអាចបិទស្ថានទូតគុយបា នៅក្រុងឡាហាវ៉ាន ដើម្បីផ្តាច់អ្វីដែលលោកអូបាម៉ា ខំស្តារមកវិញជាមួយគុយបានោះទេ។ ហ្វីដែល កាស្ត្រូ ជានិមិត្តរូបបដិវត្តគុយបា តែក៏ជានិមិត្តរូបនៃកំហឹងរបស់ក្រុមប្រឆាំងគុយបា របស់ប្រជាជនគុយបាដែលមិនអាចធ្វើអ្វីប្រឆាំងគាត់ កាលពីគាត់នៅរស់ដែរ។ ហ្វីដែល កាស្ត្រូ ជាសត្រូវអាមេរិករាប់ជំនាន់មកហើយ។ ពេលនេះ គាត់ស្លាប់ហើយ ដូច្នេះកំហឹងប្រជាជន និងកំហឹងអាមេរិក ក៏បានស្លាប់ទៅតាមរូបលោកកាស្ត្រូដែរ។
សត្រូវអាមេរិកបានស្លាប់ហើយ លោកដូណាល់ ត្រាំ ពិតជាត្រូវពិចារណាឡើងវិញ ចំពោះទំនាក់ទំនងអាមេរិកជាមួយគុយបាហើយ។ ម្យ៉ាងវិញទៀត លោករ៉ាអ៊ូល កាស្ត្រូ ជាប្អូនប្រុសលោកហ្វីដែល កាស្ត្រូ ក៏បានសន្យាឈប់កាន់កាប់នយោបាយគុយបា នៅឆ្នាំ២០១៨ខាងមុខដែរ។ ការកាន់កាប់របស់ត្រកូលកាស្ត្រូ ក៏ត្រូវចប់ទៅដែរ។
ប៉ុន្មានឆ្នាំចុងក្រោយនេះ លោករ៉ាអ៊ូល កាស្ត្រូ បានធ្វើកំណែទម្រង់សេដ្ឋកិច្ចបើកចំហរទីផ្សារខ្លះៗដែរ។ សហគ្រាសអឺរ៉ុបនិងអាស៊ីកំពុងប្រជែងគ្នារកស៊ីនៅគុយបា។ គុយបាបានបង្កើតអោយមានជើងហោះហើរយន្តហោះទៅសហរដ្ឋអាមេរិក បើកទ្វារអោយទេសចរអាមេរិកចូលទឹកដីខ្លួន។ បើលោកត្រាំមិនចង់បាត់បង់ការរកស៊ីរបស់សហគ្រាសអាមេរិកនៅគុយបាទេ លោកត្រាំត្រូវតែបន្តទំនាក៉ទំនងជាមួយគុយបាតទៅទៀត។ ហើយការបន្តស្តារទំនាក់ទំនងនេះទៅមុខទៀត ក៏ស្របតាមអ្វីដែលលោកសន្យាដែរ គឺការសន្យាជួយប្រជាជនគុយបាអោយទទួលបានភាពរុងរឿងឡើងវិញនោះឯង។
បើលោកត្រាំចង់ជួយប្រជាជនគុយបាមែន ក្នុងពេលចូលកាន់កាប់សហរដ្ឋអាមេរិក លោកត្រាំ គួរតែពិចារណាដកទណ្ឌកម្មអាមេរិកទាំងស្រុងចេញពីគុយបាហើយ ព្រោះសត្រូវអាមេរិកស្លាប់ទៅហើយ គុយបាក៏ក្រីក្រ។ តើបន្តទណ្ឌកម្មបានប្រយោជន៍អ្វីទៀត។ កន្លងមក លោកអូបាម៉ាចង់ដកទណ្ឌកម្មពីគុយបាដែរ តែពិបាកព្រោះនៅសភា មានអ្នកនយោបាយបក្សសាធារណរដ្ឋរបស់លោកត្រាំច្រើន។
ឆ្លៀតពេលអស់ពីហ្វីដែល កាស្ត្រូ ទៅ លោកត្រាំក៏អាចស្នើជំរុញគុយបាអោយដោះលែងក្រុមប្រឆាំងនយោបាយ រឺក៏ទទួលយកផលិតផលអាមេរិកមួយចំនួនចូលស្រុកផងក៏ថាបាន។ វាជាការចំណេញរឿងរកស៊ីជាមួយគុយបាទៅវិញទេ។
រដ្ឋាភិបាលគុយបាចង់បន្តកេរដំណែលនយោបាយ ហ្វីដែល កាស្ត្រូ
មេដឹកនាំគុយបា រ៉ាអ៊ូល កាស្ត្រូ កាន់កាប់គុយបា១០ឆ្នាំមកហើយ បន្តពីហ្វីដែល ជាបងប្រុស។ តែការកាន់កាប់ក៏ត្រូវបានគេមើលឃើញថា នៅតែស្ថិតក្រោមការណែនាំ ឃ្លាំមើលពីក្រោយរបស់ហ្វីដែល កាស្ត្រូដដែល។
កន្លងមក លោករ៉ាអ៊ូល បានប្រកាសថា នឹងឈប់កាន៉អំណាចនៅឆ្នាំ២០១៨ខាងមុខ។ អ្នកដែលឡើងមកបន្តអំណាចពីលោក រ៉ាអ៊ូល ត្រូវបានតែងតាំងរួចមកហើយ គឺលោកមីហ្គែល ដ្យាហ្សឺ កាណែល ជាបុរសខ្លាំងទី២ ក្នុងរដ្ឋាភិបាលគុយបា។ ត្បិតថា រ៉ាអ៊ូល កាស្ត្រូ ឈប់កាន់អំណាច ក្នុងពេលខាងមុខក្តី តែរដ្ឋាភិបាលគុយបា មានជំហរបន្តកេរដំណែលនយោបាយកុម្មុយនិស្តរបស់ហ្វីដែល កាស្ត្រូជានិច្ច។ រដ្ឋាភិបាលប្រហែលជាអាចសុំអោយប្រជាជនបន្តគាំទ្រនយោបាយកុម្មុយនិស្តតទៅទៀត។
ថ្ងៃសៅរ៍ម្សិលមិញ អាជ្ញាធរបានឃោសនាអោយប្រជាជនរាប់លាននាក់ សន្យាជាលាយលក្ខណ៍អក្សរ ថាស្មោះត្រង់នឹងនយោបាយបដិវត្តគុយបា សន្យាបន្តដើរតាមគំនិតលោកហ្វីដែល កាស្ត្រូ។ គុយបាក្រីក្រ តែប្រជាជនគុយបាភាគច្រើននៅតែស្រលាញ់ពេញចិត្តលោកហ្វីដែល កាស្រ្តូ។ ប្រជាជនប្រហែលជាអាចនៅតែស្មោះស្ម័គ្រនយោបាយរបស់កាស្ត្រូ ជានិច្ចដែរ។
រដ្ឋាភីបាលប្រកាន់ជំហរនយោបាយហ្វីដែល កាស្ត្រូ ដែលស្អប់របបមូលធននិយមក៏ពិតមែន ទន្ទឹមនេះដែរគុយបាក៏បានធ្វើកំណែទម្រង់ បើកចំហរទីផ្សារឡើងវិញច្រើនដែរ ដើម្បីបន្ធូរដង្ហើមសេដ្ឋកិច្ច។ គុយបាមិនអាចពឹងផ្អែកជំនួយតែលើវេណេស៊ុយអេឡាទេ។ វេណេស៊ុយអេឡាកំពុងរងវិបត្តិសេដ្ឋកិច្ច មិនអាចជួយគុយបាដូចមុនទេ។
ក្រៅពីវេណេស៊ុយអេឡា ចិនបានជួយគុយបាច្រើន។ ហើយដើម្បីអាចរកជំនួយពីប្រទេសផ្សេងៗទៀត បើសិនជាអាច គុយបាប្រហែលជាត្រូវបន្តបើកទូលាយទីផ្សារថែមទៀត។ ហ្វីដែល កាស្ត្រូ ជាសត្រូវអាមេរិកបានស្លាប់ហើយ។ បើដូណាល់ ត្រាំ ចង់ជួយគុយបាមែន ថាមិនត្រូវ រដ្ឋាភិបាលគុយបាក៏ប្រហែលអាចទទួលសំណើ មួយចំនួនរបស់ដូណាល់ ត្រាំ ដែរ ពេលខាងមុខផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ