មេចារកិច្ចហូឡង់ថាពិភពលោកប្រឈមមុខនឹងភាពវឹកវរដោយការវាយប្រហារតាមអ៊ីនធ័រនែត
ប៉ុន្មានថ្ងៃក្រោយការវាយប្រហារតាមប្រព័ន្ធអ៊ីនធ័រនែត ក្នុងទ្រង់ទ្រាយដ៏ធំកម្រមានមួយ ដែលប៉ះពាល់ដល់ស្ទើរតែគ្រប់ប្រទេសនៅទូទាំងពិភពលោក ប្រមុខទីភ្នាក់ងារចារកិច្ចហូឡង់បានទាញសញ្ញាអាសន្ន កាលពីថ្ងៃអង្គារថា ពិភពលោកយើងកំពុងប្រឈមមុខនឹងហានិភ័យដ៏ខ្ពស់ នៃការវាយប្រហារតាមប្រព័ន្ធអ៊ីនធ័រនែត ដែលអាចនឹងបង្កឲ្យមានភាពចលាចលធ្ងន់ធ្ងរ។
ចុះផ្សាយនៅថ្ងៃ៖
គ្រប់ប្រទេសទាំងអស់ត្រូវតែប្រុងប្រៀបខ្លួន ក្នុងការទប់ទល់នឹងការគំរាមកំហែងខាងផ្នែកព័ត៌មានវិទ្យា។ នេះគឺជាការលើកឡើងរបស់លោកប្រមុខចារកិច្ចហូឡង់ រ៉ប ប៊ែរថូលី ដែលបានគូសបញ្ជាក់ថា ដើម្បីទប់ស្កាត់នឹងការគំរាមកំហែងនេះ គេទាមទារចាំបាច់ឲ្យមានកិច្ចសហប្រតិបត្តិការយ៉ាងជិតស្និទ្ធ រវាងរដ្ឋាភិបាល និងវិស័យឯកជន។
បច្ចុប្បន្ននេះ យើងកំពុងរស់នៅក្នុងសង្គមមួយ ដែលអ្វីៗត្រូវចងភ្ជាប់ប្រទាក់ក្រឡាគ្នា តាមប្រព័ន្ធព័ត៌មានវិទ្យា ទាំងក្នុងប្រទេស និងពីប្រទេសមួយទៅប្រទេសមួយ រាប់ចាប់តាំងពីប្រព័ន្ធធនាគារ រហូតដល់ហេដ្ឋារចនាសម្ព័ន្ធនៃសេវាសាធារណៈជាសារវ័ន្ត រួមមានដូចជា ប្រព័ន្ធដឹកជញ្ជូន ប្រព័ន្ធគ្រប់គ្រងអគ្គិសនី និងទឹកស្អាត ជាដើម។ បើតាមការយល់ឃើញរបស់លោកប្រមុខចារកិច្ចហូឡង់ នេះជាចំណុចវិជ្ជមានមួយ ដែលផ្តល់នូវគុណប្រយោជន៍យ៉ាងច្រើនដល់ជីវភាពរស់នៅរបស់ប្រជាជន ក៏ប៉ុន្តែ ក្នុងពេលជាមួយគ្នា វាក៏ធ្វើឲ្យយើងត្រូវប្រឈមមុខនឹងការវាយប្រហារផងដែរ។
តើនឹងមានអ្វីកើតឡើង ប្រសិនបើប្រព័ន្ធធនាគារទាំងមូលត្រូវជាប់គាំងលែងដំណើរការ ១ថ្ងៃ ២ថ្ងៃ ឬក៏មួយសប្តាហ៍? ឬប្រព័ន្ធដឹកជញ្ជូន ប្រព័ន្ធគ្រប់គ្រង់ទឹកស្អាត ឬអគ្គិសនីត្រូវជាប់គាំង? ឬក៏ប្រព័ន្ធគ្រប់គ្រងផ្លូវយន្តហោះត្រូវទទួលរងការវាយប្រហារ? ផលវិបាកគឺអាចនឹងធ្ងន់ធ្ងរពិបាកនឹងពិពណ៌នា។
ក្រៅពីការវាយប្រហារ ដោយប្រើកម្មវិធីជម្រិតទារលុយ ដែលប៉ះពាល់ដល់ស្ទើរតែគ្រប់ប្រទេសនៅទូទាំងពិភពលោក នៅប៉ុន្មានថ្ងៃមុននេះ លោកប្រមុខចារកិច្ចហូឡង់បានលើកឡើងជាឧទារណ៍ ពីការវាយប្រហារមួយចំនួនផ្សេងទៀត កាលពីពេលកន្លងមក រួមមានដូចជាការវាយប្រហារទៅលើក្រុមហ៊ុនប្រេងរបស់អារ៉ាប៊ីសាអ៊ូឌីត កាលពីឆ្នាំ២០១២ និងការវាយប្រហារទៅលើប្រព័ន្ធចែកចាយអគ្គិសនីអ៊ុយក្រែនបណ្តាលឲ្យមនុស្សរាប់សិបម៉ឺននាក់គ្មានអគ្គិសនីប្រើប្រាស់ កាលពីចុងឆ្នាំ២០១៥ ជាដើម។
មនុស្សជាច្រើនប្រហែលជាមិនបានចាប់អារម្មណ៍ ក៏ប៉ុន្តែ បើយោងតាមលោកប្រមុខចារកិច្ចហូឡង់ ហានិភ័យដែលពិភពលោកត្រូវប្រឈមមុខនឹងភាពចលាចល ដោយការវាយប្រហារខាងផ្នែកព័ត៌មានវិទ្យា គឺមានកម្រិតខ្ពស់ជាងការគិតស្មានរបស់មនុស្សទូទៅ។ ការគំរាមកំហែងខាងផ្នែកព័ត៌មានវិទ្យានេះ ក៏មានប្រភពចម្រុះ រាប់ចាប់តាំងពីរដ្ឋ រហូតដល់ក្រុមឧក្រិដ្ឋជន និងក្រុមភេរវជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ