សៀវភៅសរបស់ក្រសួងការពារជាតិបារាំងគ្រោងលុបចោលការងារ២ម៉ឺនកន្លែង
សៀវភៅសរបស់ក្រសួងការពារជាតិបារាំង ត្រូវដាក់ជូនដល់លោកប្រធានាធិបតី François Hollande នៅថ្ងៃចន្ទនេះវេលាម៉ោង១១,៣០នាទីម៉ោងក្នុងស្រុក។ សៀវភៅសដែលមានគម្រោងកាត់បន្ថយការងារនៅក្នុងជួរកងទ័ពបារាំងជាបន្តបន្ទាប់គ្នារហូតដល់ ៥០០០ កន្លែង ជាមធ្យមក្នុងមួយឆ្នាំចាប់ពី ឆ្នាំ២០១៦-ដល់ឆ្នាំ ២០១៩ ដែលសរុប មានចំនួន២ម៉ឺនកន្លែង ៩ខែក្រោយពីមានការជជែកពិភាក្សាគ្នារួចរាល់អស់-នេះជាការបញ្ជាក់របស់ ទិន្នានុប្បវត្តិន៍សេដ្ឋកិច្ច Les Echos។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
យោងតាមទិន្នានុប្បវត្តិន៍សេដ្ឋកិច្ច Les Echos សៀវភៅសរបស់ក្រសួងការពារជាតិបារាំង ដែលត្រូវដាក់ជូនដល់លោកប្រធានាធិបតីបារាំងនៅព្រឹកមិញនេះ គ្រោងនឹងកាត់បន្ថយចំនួនការងារនៅក្នុងជួរកងទ័ពបារាំង រហូតដល់ជាង២ម៉ឺនកន្លែងបន្ថែមទៀត ចាប់ពីពេលនេះ រហូតដល់ឆ្នាំ ២០១៩។
នៅឆ្នាំ ២០០៨ លោក Nicolas Sarkozy បាន រៀបចំគម្រោងការដើម្បីលុបចោលការងារក្នុងកងទ័ពចំនួន៥ម៉ឺន៤០០០កន្លែងនៅក្នុងអំឡុងពេលឆ្នាំ២០០៨-ទៅដល់ឆ្នាំ ២០១៥។
ចំណែកសៀវភៅសរបស់ក្រសួងការពារជាតិនៅឆ្នាំ២០១៣នេះ គ្រោងបន្តការកាត់បន្ថយចំនួនការងារក្នុងជួរកងទ័ពទៀតដែលគ្រោងទុករហូតដល់ឆ្នាំ២០១៥ (គឺ ១ម៉ឺនកន្លែង)និងលុបចោលការងារជាង២ម៉ឺនកន្លែងជាបន្ថែមទៀតនៅក្នុងអំឡុង៤ឆ្នាំបន្ទាប់មកទៀត។
ដោយឡែក ដូចដែលបានជូនដំណឹងដោយលោកប្រធានាធិបតីបារាំងFrançois Hollande កាលពីថ្ងៃទី២៨មីនាមុន ថវិការសំរាប់ឆ្នាំ២០១៤របស់ក្រសួងការពារជាតិបារាំងនឹងត្រូវរក្សាទុកដដែលគឺ មានចំនួន ៣១ពាន់៤០០លានអឺរ៉ូ(31,’milliards d’euros)។ ហើយថវិការ ចំនួន១៧ម៉ឺន៩០០០លានអឺរ៉ូ នឹងត្រូវឧទ្ទិសសំរាប់កិច្ចការពារជាតិនៅរវាងឆ្នាំ ២០១៤និង២០១៩។
ចាប់ផ្តើមឡើងតាំងពីខែកក្កដាឆ្នាំមុនដោយលោក François Hollande សៀវភៅស ត្រូវធ្វើការសើរើឡើងវិញអំពីយុទ្ធសាស្ត្រការពាររបស់ប្រទេសបារាំងនៅចំពោះមុខស្ថានភាពប្រែប្រួលក្នុងពិភពលោក ដូចយ៉ាងបដិវត្តន៍នៅក្នុងពិភពអារ៉ាបនិងការវិវឌ្ឈន៍នៃនយោបាយការបរទេសរបស់សហរដ្ឋអាមេរិក ដែលងាកចេញពីទ្វីបអឺរ៉ុប។ក៏ប៉ុន្តែ កិច្ចការនេះ ក៏ត្រូវគិតគូផងដែរដល់វិបត្តិសេដ្ឋកិច្ចបច្ចុប្បន្ននិងការសន្សំសំចៃត្បិតត្បៀតយ៉ាងខ្លាំងបំផុតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ