រដ្ឋាភិបាលឥណ្ឌាមានពេល៤៨ម៉ោង ដើម្បីបង្ហាញដំណោះស្រាយការពុលបរិយាកាសនៅក្រុងDelhi
ថ្ងៃអង្គារនេះរដ្ឋាភិបាលឥណ្ឌាបានស្នើសុំទៅតុលាការកំពូល អោយផ្តល់ពេល២ថ្ងៃ ដើម្បីអោយរដ្ឋាភិបាលរៀបចំផែនការ ដោះស្រាយបញ្ហាបំពុលបរិយាកាស ដែលកំពុងវាយប្រហារក្រុងដេល្លី។ ផ្សែងរថយន្ត និងផ្សែងតាមរោងចក្រ បូករួមនឹងការធ្លាក់ចុះសីតុណ្ហភាព ជាង១០ថ្ងៃមកនេះ បានបង្កើនកម្រិតសារធាតុពុលក្នុងបរិយាកាស នៅរដ្ឋធានីឥណ្ឌា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
សារធាតុល្អិតឆ្មារPM 2.5 ដែលប្រភពនៃការបំពុលបរិយាកាស នៅក្រុងដេល្លី ប្រទេសឥណ្ឌា បានឡើងដល់កម្រិត៣៧២មីក្រូក្រាម ក្នុងមួយម៉ែត្រគូប នៅព្រឹកថ្ងៃអង្គារម្សិលមិញនេះ។ នេះជាកម្រិតខ្ពស់ហួសហេតុ ព្រោះអង្គការសុខភាពពិភពលោកតម្រូវអោយសារធាតុនេះ មានតែក្នុងបរិមាណ ជាមធ្យមត្រឹម២៥មីក្រូក្រាមប៉ុណ្ណោះ ក្នុងមួយថ្ងៃ។ កាលពីថ្ងៃចន្ទ សារធាតុល្អិតឆ្មារ PM 2.5 នៅក្រុងដេល្លី មានរហូតដល់៧៧៨មីក្រូក្រាមក្នុងមួយម៉ែត្រគូបឯណោះ។
សារធាតុល្អិតឆ្មារPM 2.5 ជាសារធាតុពុល អាចជ្រាបចូលតាមឈាម និងសួត ហើយអាចបង្កជាជំងឺមហារីក និងជំងឺបេះដូង។ ដោយសារកម្រិតសារធាតុនេះ ខ្ពស់បែបនេះ កាលពីថ្ងៃអាទិត្យ អាជ្ញាធរក្រុងដេល្លី បានប្រកាសបិទទ្វារសាលារៀន សម្រាប់ពេល៣ថ្ងៃ និងសម្រេចផ្អាកការដ្ឋានសំណង់ផ្សេងៗ។ ផ្សែងពុលនៃសារធាតុល្អីតឆ្មារនេះ បានគ្របដណ្តប់ក្រុងដេល្លីជាងមួយសប្តាហ៍មកហើយ។ ប្រជាជនបាននាំគ្នាតម្រង់ជួរតាមហាងផ្សេងៗ ដើម្បីទិញម៉ាសមុខមកពាក់ការពារ។
រដ្ឋាភិបាលឥណ្ឌាបានសុំពេល៤៨ម៉ោង ទៅតុលាការកំពូល ដើម្បីរៀបចំផែនការដំណោះស្រាយបញ្ហានេះ។ តុលាការកំពូលឥណ្ឌាខឹង និងមិនយល់សោះថា រហូតមកដល់ពេលនេះ ហេតុអ្វីបានជារដ្ឋាភិបាលមិនព្រមប្រើវិធានការដូចនៅក្រុងប៉កាំងប្រទេសចិន ហេតុអ្វីមិនព្រមប្រើឧទ្ធម្ភាគចក្រទំលាក់ទឹក នៅក្រុងដេល្លី និងតំបន់ជុំវិញក្រុងនេះ ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ