លោកដូណាល់ត្រាំព្រលះនយោបាយការបរទេសរបស់លោកអូបាម៉ានិងលោកស្រីគ្លីនតុន
លោកដូណាល់ ត្រាំ បានទទួលការតែងតាំងជាផ្លូវការ ជាបេក្ខជនប្រធានាធិបតីមកពីគណបក្សសាធារណរដ្ឋ ដើម្បីប្រកួតប្រជែងជាមួយនឹងលោកស្រីហ៊ីឡារី គ្លីនតុន ដែលនឹងត្រូវគណបក្សប្រជាធិបតេយ្យធ្វើការតែងតាំងជាផ្លូវការ នៅក្នុងពេលឆាប់ៗខាងមុខនេះ។ នៅក្នុងសន្ទុរកថា បិទសមាជបក្ស លោកដូណាល់ ត្រាំ បានបង្ហាញពីគោលនយោបាយ ដែលយកបញ្ហាសន្តិសុខជាអាទិភាពខ្ពស់ ហើយក្នុងពេលជាមួយគ្នា លោកបានធ្វើការវាយប្រហារយ៉ាងចាស់ដៃទៅលើនយោបាយការបរទេសរបស់លោកអូបាម៉ា និងលោកស្រីហ៊ីឡារីគ្លីនតុន ដែលជាអតីតរដ្ឋមន្រ្តីការបរទេស។
ចុះផ្សាយនៅថ្ងៃ៖
“ប្រជាពលរដ្ឋយើងមិនត្រឹមតែត្រូវប្រឈមមុខនឹងគ្រោះមហន្តរាយនៅក្នុងប្រទេសតែប៉ុណ្ណោទេ តែថែមទាំងត្រូវទទួលរងនូវភាពអាម៉ាស់នៅលើឆាកអន្តរជាតិម្តងហើយម្តងទៀត ឥតឈប់ឈរ។
“យើងទាំងអស់គ្នាសុទ្ធតែនៅចាំបានពីរូបភាពដែលទាហានជើងទឹករបស់យើងត្រូវបានចាប់ខ្លួន និងបង្ខំឲ្យលុតជង្គង់នៅចំពោះមុខចុងកាណុងរបស់ទាហានអ៊ីរ៉ង់... ហើយហេតុការណ៍នេះកើតឡើងមិនយូរប៉ុន្មានមុននឹងមានការចុះកិច្ចព្រមព្រៀងនុយក្លេអ៊ែរអ៊ីរ៉ង់ ដែលអនុញ្ញាតឲ្យអ៊ីរ៉ង់អាចយកលុយ ១៥០ពាន់លានដុល្លារត្រឡប់ទៅវិញ ចំណែកឯយើងវិញ គ្មានទទួលបានផលចំណេញអ្វីទាល់តែសោះ! កិច្ចព្រមព្រៀងនេះ នឹងត្រូវចារទុកក្នុងប្រវត្តិសាស្រ្តថា ជាកិច្ចព្រមព្រៀងដ៏អន់បំផុត ដែលយើងបានចុះ។
“ភាពអាម៉ាស់មួយទៀត គឺក្រោយពេលដែលលោកប្រធានាធិបតីអូបាម៉ា ប្រកាសពីខ្សែបន្ទាត់ក្រហម រឿងអាវុធគីមីនៅស៊ីរី ក៏ប៉ុន្តែ ពិភពលោកទាំងមូលសុទ្ធតែបានមើលឃើញថា វាគ្រាន់តែជាការប្រកាសគំរាមតែមាត់ទទេ ដោយគ្មានអត្ថន័យអ្វីទាំងអស់។
“នៅលីប៊ី ស្ថានកុងស៊ុលរបស់យើង ដែលជានិមិត្តរូបនៃមុខមាត់របស់អាមេរិក នៅជុំវិញពិភពលោក ត្រូវបានគេដុតបំផ្លាញ... ពលរដ្ឋអាមេរិកលែងមានសុវត្ថិភាព... ពិភពលោកទាំងមូលលែងមានសុវត្ថិភាព... នេះគឺជាអ្វីដែលបានបន្សល់ទុកដោយលោកស្រីហ៊ីឡារី គ្លីនតុន គឺមានតែការស្លាប់ ការបំផ្លិចបំផ្លាញ ភេរវកម្ម និងភាពទន់ខ្សោយ។ ក៏ប៉ុន្តែ មរតកដែលបន្សល់ទុកដោយលោកស្រីហ៊ីឡារី គ្លីនតុន មិនចាំបាច់ត្រូវតែជាមរតក សម្រាប់ប្រជាជាតិអាមេរិកទាំងមូលនោះទេ។ ចំណុចសំខាន់ ដែលខ្ញុំចង់និយាយនៅពេលនេះ គឺថា អ្វីៗគ្រប់យ៉ាងត្រូវតែផ្លាស់ប្តូរ ហើយត្រូវតែផ្លាស់ប្តូរភ្លាមៗនៅពេលឥឡូវនេះ!”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ