លោកDonald Trump ចោទសួរពីតួនាទីអាមេរិកក្នុងអង្គការអូតង់
លោកDonald Trump ជាបេក្ខជនបក្សសាធារណរដ្ឋ សម្រាប់ការបោះឆ្នោតប្រធានាធិបតីអាមេរិក បានលើកឡើងថា បើលោកជាប់ឆ្នោតជាប្រធានាធិបតីអាមេរិក មុននឹងលោកសម្រេចអោយអាមេរិកជួយប្រទេសសមាជិកអូតង់ណាមួយ លោកត្រូវមើលមុនសិនថា តើប្រទេសនោះបានបំពេញកាតព្វកិច្ចខ្លួនត្រឹមត្រូវរឺទេ។
ចុះផ្សាយនៅថ្ងៃ៖
ស្តាប់ - ០១:៤៥
យោងតាមការចុះផ្សាយរបស់សារព័ត៌មានញូយក ថែមស៍ កាលពីយប់ថ្ងៃពុធ លោកដូណាល់ ត្រុំ បេក្ខជនមកពីបក្សសាធារណរដ្ឋសម្រាប់ការបោះឆ្នោតប្រធានាធិបតីអាមេរិក បានលើកឡើងថា លោកចង់កែប្រែចំណុចមួយចំនួន ក្នុងអង្គការអូតង់ ប្រសិនបើលោកជាប់ឆ្នោតជាប្រធានាធិបតីអាមេរិក ក្នុងពេលខាងមុុខ។
លោកត្រុំ ត្រៀមខ្លួន តំរូវអោយសមាជិកអូតង់និមួយៗ ចូលរួមវិភាគទានអោយបានសមស្រប សម្រាប់ដំណើរការអង្គការអូតង់ ព្រោះកន្លងមក អាមេរិកចេញថវិកាខ្លួនច្រើនជាងគេ ក្នុងអង្គការអូតង់។ ក្នុងបទសម្ភាសផ្តល់ទៅសារព័ត៌មានញូយក ថែមស៍ លោកត្រុំ លើកឡើងថា បើលោកក្លាយជាប្រធានាធិបតីអាមេរិក ហើយបើរុស្ស៊ីវាយប្រហារប្រទេសសមាជិកអូតង់ណាមួយ មុននឹងលោកសម្រេចអោយអាមេរិកចូលអន្តរាគមន៍ជួយប្រទេសនោះ លោកត្រូវមើលសិនថា តើសមាជិកអូតង់មួយនោះបានបំពេញកាតព្វកិច្ចត្រឹមត្រូវដែរទេ។
អូតង់ទើបសម្រេចអោយមានការពង្រឹងសន្តិសុខ នៅតាមប្រទេសសមាជិកខ្លួន មានប៉ូឡូញ និងប្រទេសតំបន់បាល់ទិក ដើម្បីប្រឈមនឹងរុស្ស៊ី។ ប្រទេសតំបន់បាល់ទិកបានប្រតិកម្មនឹងការលើកឡើងរបស់លោកដូណាល់ ត្រុំ។
ប្រធានាធិបតីអេស្តូនីគាំទ្រ អោយគ្រប់ប្រទេសសមាជិកអូតង់ បំពេញកាតព្វកិច្ចបានស្មើៗគ្នា។ ប្រធានាធិបតីអេស្តូនីលើកឡើងថា អេស្តូនីជាប្រទេសមួយក្នុងចំណោមប្រទេសសមាជិក៥របស់អូតង់ ដែលបានចំណាយថវិកា២ភាគរយ នៃផលិតផលជាតិសរុបក្នុងស្រុក សម្រាប់វិស័យការពារជាតិ។ ប្រធានាធិបតីលីទុយអានីវិញ បានរំលឹកថា នៅឆ្នាំ២០១៨ខាងមុខ លីទុយអានីនឹងចំណាយ២ភាគរយ នៃផលិតផលជាតិសរុបក្នុងស្រុក សម្រាប់ផ្នែកការពារជាតិខ្លួនដែរ។
ដោយឡែក ទាក់ទងនយោបាយការបរទេសអាមេរិក លោកដូណាល់ត្រុំ លើកឡើងថា បើលោកជាប់ឆ្នោតជាប្រធានាធិបតី អាមេរិកនឹងមិនដាក់សម្ពាធលើតួកគី រឺក៉៏លើប្រទេសដែលប្រកាន់របបផ្តាច់ការទេ ករណីមានការបង្ក្រាបសកម្មជនប្រឆាំងនយោបាយ។ សម្រាប់លោកត្រុំ អាមេរិកត្រូវដោះស្រាយបញ្ហាផ្ទាល់ខ្លួនខ្លួនឯងជាមុនសិន មុននឹងដោះស្រាយបញ្ហាប្រទេសដទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ