អង្គការសិទ្ធិមនុស្សចោទរដ្ឋាភិបាលវៀតណាម ថារំលោភសិទ្ធិមនុស្សធ្ងន់ធ្ងរ
នៅថ្ងៃអង្គារ ទី៤កុម្ភៈនេះ អង្គការក្រៅរដ្ឋាភិបាលវៀតណាម និងអង្គការអន្តរជាតិជាច្រើន ទទួលបន្ទុកផ្នែកសិទ្ធិមនុស្ស បានរៀបចំសិក្ខាសាលាមួយ នៅទីក្រុងហ្សឺណែវ ដើម្បីពិភាក្សាអំពីស្ថានភាពសិទ្ធិមនុស្សនៅវៀតណាម។ សិក្ខាសាលានេះធ្វើឡើង តែមួយថ្ងៃប៉ុណ្ណោះ មុនពេលក្រុមប្រឹក្សាសិទ្ធិមនុស្សនៃអង្គការសហប្រជាជាតិ ត្រួតពិនិត្យរបាយការណ៍ស្តីពីស្ថានភាពសិទ្ធិមនុស្សនៅវៀតណាម។ អង្គការសិទ្ធិមនុស្សទាំងនេះ លើកឡើងថា ស្ថានភាពសិទ្ធិមនុស្សនៅវៀតណាម កំពុងធ្លាក់ក្នុងភាពដុនដាបកាន់តែខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
សិក្ខាសាលាស្តីពីស្ថានភាពសិទ្ធិមនុស្សនៅវៀតណាម រៀបចំដោយអង្គការសិទ្ធិមនុស្សវៀតណាម និងអង្គការអន្តរជាតិជាច្រើន នៅទីក្រុងហ្សឺណែវ ថ្ងៃអង្គារនេះ មានទិសដៅជំរុញសហគមន៍អន្តរជាតិ អោយចាប់អារម្មណ៍ពីបញ្ហារំលោភសិទ្ធិមនុស្ស នៅវៀតណាម។ សិក្ខាសាលានេះ ធ្វើឡើងតែមួយថ្ងៃប៉ុណ្ណោះ មុនពេលក្រុមប្រឹក្សាសិទ្ធិមនុស្សអង្គការសហប្រជាជាតិត្រួតពិនិត្យរបាយការណ៍សិទ្ធិមនុស្សរបស់រដ្ឋាភិបាលវៀតណាម។
យោងតាមអង្គការសិទ្ធិមនុស្សទាំងនេះ ស្ថានភាពសិទ្ធិមនុស្សនៅវៀតណាម កំពុងតែធ្លាក់ក្នុងភាពដុនដាប ធ្ងន់ធ្ងរ ពីមួយថ្ងៃទៅមួយថ្ងៃ។ យោងតាមអង្គការ Human Rights Watch មនុស្សពី១៥០នាក់ទៅ២០០នាក់ កំពុងជាប់ឃុំនៅវៀតណាម។ គ្រាន់តែក្នុងឆ្នាំ២០១៣ តែមួយឆ្នាំប៉ុណ្ណោះ មានមនុស្ស៦៣នាក់ ត្រូវបានអាជ្ញាធរឃាត់ខ្លួន ដោយសារតែពួកគេធ្វើសកម្មភាពគាំទ្រសិទ្ធិមនុស្ស។
វៀតណាមជាប្រទេសមួយក្នុងចំណោមប្រទេសនៅអាស៊ីអាគ្នេយ៍ ដែលបំបិទនិងបង្ក្រាបសេរីភាពនៃការបញ្ចេញមតិ និងសេរីភាពសារព័ត៌មាន។ វៀតណាមនៅតែបន្តប្រើមាត្រាច្បាប់មួយចំនួននៃក្រមព្រហ្មទណ្ឌ ដើម្បីបង្ក្រាបសកម្មជនដែលដើរផ្ទុយពីបន្ទាត់នយោបាយរដ្ឋាភិបាល។ យោងតាមអង្គការការពារសិទ្ធិមនុស្ស ប្រជាជនវៀតណាមគ្មានសិទ្ធិធ្វើការជួបជុំគ្នានោះទេ សកម្មជនប្រឆាំងខ្លះ ត្រូវបានគេឈ្នានិស បំភិតបំភ័យ រងការធ្វើទារុណកម្ម និងជាប់ឃុំ ដើម្បីទទួលការកាត់ទោស។
បក្សកុម្មុយនិស្តវៀតណាមដឹកនាំប្រទេស តាំងតែពីឆ្នាំ១៩៧៥ ម្ល៉េះ។ កាលពីចុងខែវិច្ឆិកាកន្លងទៅ តាមរយៈវិសោធនកម្មរដ្ឋធម្មនុញ្ញ បក្សកុម្មុយនិស្តបានពង្រឹងអំណាចនយោបាយរបស់ខ្លួន កាន់តែខ្លាំងថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ