លោកឌុយទែរតេប្រកាសជាផ្លូវការ ផ្តាច់សម្ព័ន្ធភាពជាមួយអាមេរិក
ក្នុងដំណើរទស្សនកិច្ចផ្លូវរដ្ឋ នៅក្រុងប៉េកាំង ថ្ងៃព្រហស្បតិ៍នេះ ប្រធានាធិបតីហ្វីលីពីនឌុយទែរតេបានប្រកាសជាផ្លូវការ កាត់ផ្តាច់សម្ព័ន្ធភាពជាមួយសម្ព័ន្ធមិត្តអាមេរិក។ លោកឌុយទែរតេបានលើកឡើងថា៖ ខ្ញុំសូមប្រកាសចែកផ្លូវជាមួយអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ក្នុងឱកាសដំណើរទស្សនកិច្ច៤ថ្ងៃ នៅចិន លោកឌុយទែរតេបានប្រកាសកាត់ផ្តាច់សម្ព័ន្ធភាពជាមួយអាមេរិកយ៉ាងដូច្នេះ នៅក្នុងវេទិកាសេដ្ឋកិច្ចមួយ ធ្វើអោយសាធារណជននៅទីនោះ ទះដៃអបអរសាទរ។
កាលពីថ្ងៃពុធ ប្រធានាធិបតីហ្វីលីពីនទើបតែបានរិះគន់អាមេរិក ថាមានវត្តមាននៅហ្វីលីពីនដើម្បីប្រយោជន៍ផ្ទាល់ខ្លួន។ លោកឌុយទែរតេ ប្រាប់កាលពីថ្ងៃពុធដែរថា៖ ដល់ពេលដែលត្រូវនិយាយលាគ្នាហើយ មិត្ត។
ក្នុងដំណើរទស្សនកិច្ចនៅចិន លោកឌុយទែរតេ បានប្រកាសលើកសំណុំរឿងជម្លោះដែនទឹករវាងចិននិងហ្វីលីពីន លើកយកទៅពិភាក្សាមើលពេលក្រោយទៀត។ លោកឌុយទែរតេប្រាប់ថា លោកផ្តល់អាទិភាពលើកិច្ចសហប្រតិបត្តិការសេដ្ឋកិច្ចជាមួយចិនជាចំបង។
ជំហរផ្តាច់ទំនាក់ទំនងជាមួយអាមេរិក ជំហរមិនជជែកពីរឿងជម្លោះដែនទឹកជាមួយចិន ធ្វើអោយចិនពេញចិត្ត លោកឌុយទែរតេជាខ្លាំង។ នៅទីលានធានអានមេន ប្រធានាធិបតីស៊ី ជីនពីង បានចេញមុខទទួលលោកឌុយទែរតេ យ៉ាងឧឡារិក។ លោកស៊ី ជីនពីង បានលើកឡើងវិញ នូវសារៈសំខាន់នៃការពិភាក្សាទ្វេភាគី លើជម្លោះដែនទឹកនៅសមុទ្រចិន។
ប្រធានាធីបតីអាគីណូ អាណត្តិមុន បានប្តឹងចិនរឿងជម្លោះដែនទឹក រហូតតុលាការក្រុងឡាអេសម្រេចក្តីអោយហ្វីលីពីនឈ្នះចិន។ តែប្រធានាធិបតីថ្មី ឌុយទែតេមិនអើពើរឿងនេះទេ។ លោកសុខចិត្តយកចិត្តយកថ្លើមចិន ជាជាងអាមេរិក និងប្រទេសលោកខាងលិច ព្រោះខុសពីប្រទេសលោកខាងលិច ចិនមិនបានរិះគន់យុទ្ធនាការកំចាត់ឧក្រិដ្ឋជនគ្រឿងញៀននៅហ្វីលីពីនទេ។
លោកស៊ី ជីនពីង បានប្រកាសជួយសង់ហេដ្ឋារចនាសម្ព័ន្ធអោយហ្វីលីពីន។ លោកឌុយទែរតេវិញ ក៏បានជំរុញអោយអ្នកវិនិយោគចិន និងជនជាតិចិន ចូលមករកស៊ីរឺធ្វើទេសចរ នៅហ្វីលីពីនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ