សង្គ្រាមប្រឆាំងជំងឺអេបូឡាត្រូវការពេលយូរ ខណៈករណីជំងឺថ្មីលេចចេញនៅភាគកណ្តាលអាហ្វ្រិក
ក្នុងពេលចុះទៅសៀរ៉ាឡេអូន នៅថ្ងៃចន្ទម្សិលមិញ មន្ត្រីអង្គការសហប្រជាជាតិទទួលបន្ទុកយុទ្ធនាការប្រឆាំងជំងឺអេបូឡា បានប្រាប់ថា សង្គ្រាមប្រឆាំងជំងឺអេបូឡា អាចត្រូវចំណាយពេលរហូតដល់៦ខែ។ សាធារណរដ្ឋប្រជាធិបតេយ្យកុងហ្គោ បានជួបករណីមួយថ្មីទៀត នៅភាគនិរតី ស្ថិតក្នុងតំបន់អាហ្វ្រិកកណ្តាល។ ជាករណីដាច់ដោយឡែក ពីករណីរាតត្បាតនៅអាហ្វ្រិកខាងលិច។ រហូតពេលនេះ ជំងឺអេបូឡាបានសម្លាប់មនុស្សយ៉ាងហោច១៤២៧នាក់ ៦២៤នាក់នៅលីបេរីយ៉ា ៤០៦នាក់នៅហ្គីណេ ៣៩២នាក់ នៅសៀរ៉ាឡេអូន និង៥នាក់នៅនីហ្សេរីយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
វេជ្ជបណ្ឌិត ដាវីត ណាបារ៉ូ ជាមន្ត្រីអង្គការសហប្រជាជាតិទទួលបន្ទុកយុទ្ធនាការប្រឆាំងជំងឺអេបូឡា ប្រាប់ថា ការកំចាត់ជំងឺអេបូឡា មិនមែនគ្រាន់តែជាការប្រយុទ្ធធម្មតាទេ តែគឺជាសង្គ្រាមដែលតំរូវអោយគ្រប់គ្នាធ្វើការជាមួយគ្នា ប្រកបដោយប្រសិទ្ធភាព។ យោងតាមវេជ្ជបណ្ឌិតណាបារ៉ូ សង្គ្រាមប្រឆាំងអេបូឡា អាចចំណាយពេលរហូតដល់៦ខែឯណោះ។
បន្ទាប់ពីវាយប្រហារអាហ្វ្រិកខាងលិច ពេលនេះជំងឺអេបូឡាបានបើកឆាកថ្មីនៅតំបន់អាហ្វ្រិកកណ្តាល។ គេបានរកឃើញករណីជំងឺអេបូឡាថ្មីមួយទៀត ក្នុងតំបន់ដាច់ស្រយាល នៅភាគនិរតីសាធារណរដ្ឋប្រជាធិបតេយ្យកុងហ្គោ។ អង្គការសុខភាពពិភពលោក និងអាជ្ញាធរកុងហ្គោគិតដូចគ្នាថា នេះជាករណីអេបូឡាដាច់ដោយឡែក ខុសស្រឡះពីករណីជំងឺដែលកំពុងរាតត្បាតនៅអាហ្វ្រិកខាងលិច។ នៅកុងហ្គោ អាជ្ញាធរកំពុងដាក់អ្នកជំងឺជាង១០នាក់ អោយនៅដាច់ពីគេ។ ហើយអ្នកដែលបានប៉ះពាល់អ្នកជំងឺអេបូឡា ជាង៨០នាក់ទៀត ក៏កំពុងត្រូវគេតាមដានសុខភាពដែរ។ ពេលនេះសាធារណរដ្ឋប្រជាធិបតេយ្យកុងហ្គោ ត្រូវការជំនួយហិរញ្ញវត្ថុ២លានដុល្លារ ពីសហគមន៍អន្តរជាតិ។
គួររំលឹកថា មេរោគអេបូឡា ត្រូវបានរកឃើញក្នុងឆ្នាំ១៩៧៦ នៅសាធារណរដ្ឋប្រជាធិបតេយ្យកុងហ្គោ។ កាលពីដើមឆ្នាំ អេបូឡាបានវាយប្រហារប្រទេសហ្គីណេ មុននឹងរាលដាលទៅដល់លីបេរីយ៉ា និងសៀរ៉ាឡេអូន បន្ទាប់មកទៀត រាលដាលដល់នីហ្សេរីយ៉ា។ ថ្មីៗនេះ គ្រូពេទ្យលីបេរីយ៉ាម្នាក់ និងសង្ឃកាតូលិកអេស្ប៉ាញ ដែលបានទទួលសេរ៉ូមZmapp អាមេរិកយកទៅព្យាបាល បានស្លាប់បាត់បង់ជីវិតហើយ។ បន្ទាប់ពីសង្ឃកាតូលិកអេស្ប៉ាញ បុគ្គលិកពេទ្យស្ម័គ្រចិត្តជនជាតិអង់គ្លេសអាយុ២៩ឆ្នាំម្នាក់ ជាពលរដ្ឋអឺរ៉ុបទី២ដែលបានឆ្លងជំងឺអេបូឡា។ ពលរដ្ឋអង់គ្លេសរូបនោះបានឆ្លងជំងឺអេបូឡា នៅសៀរ៉ាឡេអូន ហើយត្រូវបានបញ្ជូនទៅព្យាបាលនៅក្រុងឡុងដ៍ប្រទេសអង់គ្លេស។
ម្សិលមិញ ជប៉ុនបានប្រកាសថា ត្រៀមបញ្ជូនថ្នាំគ្រាប់T-៧០៥ យកទៅព្យាបាលជំងឺអេបូឡា ករណីមានសំណើសុំពីអង្គការសុខភាពពិភពលោក។ ថ្នាំT-៧០៥នេះ កំពុងត្រូវគេធ្វើតេស្តគ្លីនិកនៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ