សេរ៉ូមព្យាបាលមេរោគអេបូឡាចាក់លើអ្នកជំងឺអាមេរិក អាចស្រោចស្រង់អាហ្វ្រិកខាងលិចពីរោគអេបូឡា?
ចុះផ្សាយនៅថ្ងៃ៖
ស្តាប់ - ០៦:០៨
ស្ថានភាពជំងឺជនជាតិអាមេរិកពីររូបដែលបានឆ្លងមេរោគអេបូឡា នៅប្រទេសលីបេរីយ៉ា ហាក់បានធូរស្រាលឡើងវិញ ក្រោយពីគ្រូពេទ្យបានប្រើសេរ៉ូមមួយប្រភេទ ឈ្មោះថា ZMapp ចាក់ទៅលើពួកគេ។ អង្គការសុខភាពពិភពលោកបានអំពាវនាវអោយអាជ្ញាធរប្រើប្រាស់សេរ៉ូមនេះ ជួយអ្នកជំងឺនៅអាហ្វ្រិកខាងលិចដែលឆ្លងមេរោគអេបូឡា។
មេរោគអេបូឡាដែល រាលដាលខ្លាំងជាងគេនៅប្រទេសសៀរ៉ាឡេអូន លីបេរីយ៉ា និងហ្គីណេ បានសម្លាប់មនុស្សជិត៩០០នាក់ហើយ។ ក្នុងចំណោមករណីជំងឺសរុប១៦០៣ករណី នីហ្សេរីយ៉ា មានករណីជំងឺ១ករណីដែរ។ ពេលនេះ អាជ្ញាធរសៀរ៉ាឡេអូនពង្រាយកងទ័ពរាប់រយនាក់ នៅតាមមជ្ឈមណ្ឌលប្រឆាំងមេរោគអេបូឡាផ្សេងៗក្នុងស្រុក។ មជ្ឈមណ្ឌលទាំងនេះ ជាទីកន្លែងទុកទទួលនិងអ្នកជំងឺអេបូឡា អោយនៅដោយឡែកពីគេ ចៀសវាងការឆ្លងរាលដាលកាន់តែធ្ងន់ធ្ងរ។
ពលរដ្ឋអាមេរិក២រូប ដែលឆ្លងមេរោគអេបូឡា មានស្ថានភាពធូរស្រាល ក្រោយបានទទួល ការចាក់សេរ៉ូម ZMapp ក្នុងខ្លួន
សេរ៉ូមZmapp មានអង់ទីគ័រ ៣ប្រភេទ ផលិតឡើងដោយក្រុមហ៊ុនមួយ មានទីតាំងក្នុងរដ្ឋកាលីហ្វរនី សហរដ្ឋអាមេរិក។ បើយោងតាមទូរទស្សន៍ស៊ីអិនអិន សេរ៉ូមនេះអាចផលិតមកពីកោសិកាសត្វកណ្តុរ។ គេធ្លាប់យកអង់ទីគ័រនេះ ទៅពិសោធន៍លើសត្វស្វា៤ក្បាលដែលកើតរោគអេបូឡា ហើយស្វាទាំង៤នោះបានរស់មានជីវិត ប្រហែលអាចមកពីអង់ទីគ័រនេះឯង។ គេមិនដែលយកអង់ទីគ័រនេះ ទៅពិសោធន៍លើមនុស្សទេ។ ទើបតែពេលមានពលរដ្ឋអាមេរិក២រូប បានឆ្លងរោគអេបូឡា នៅប្រទេសលីបេរីយ៉ា ទើបគេសុំអោយអ្នកជំងឺអាមេរិកទាំង២នាក់នេះ ប្រើសាកល្បង។ ពលរដ្ឋអាមេរិកឆ្លងរោគអេបូឡានេះ មានម្នាក់ ជាស្ត្រីចំណាស់៦០ឆ្នាំ ឈ្មោះ ណាន់ស៊ី និងម្នាក់ទៀតជាគ្រូពេទ្យអាយុ៣៣ឆ្នាំ ឈ្មោះ កិន។ អ្នកទាំង២នេះបំរើការអោយអង្គការមនុស្សធម៌មួយកន្លែង។ ឧទាហរណ៍ ជាក់ស្តែង គឺថាគ្រូពេទ្យកិន មានអាការៈដុនដាបខ្លាំង មុនបានទទួលការចាក់សេរ៉ូមនេះ ក្នុងខ្លួន។ ប៉ុន្តែ ក្រោយចាក់សេរ៉ូមហើយបានបន្តិច គាត់ហាក់ធូរស្រាលច្រើន គឺរហូតអាចក្រោកឡើងទៅងូតទឹកខ្លួនឯង មុននឹងឡើងយន្តហោះត្រលប់ទៅសហរដ្ឋអាមេរិកវិញ។ ចំណែក អ្នកស្រីណាន់ស៊ីក៏បានធូរស្រាលបន្តិចដែរ ក្រោយទទួលសេរ៉ូមនេះក្នុងខ្លួន។
ទោះយ៉ាងនេះក្តី អាជ្ញាធរផ្នែកសុខភាពអាមេរិកនៅប្រុងប្រយ័ត្ន ព្រោះថា គេមិនអាចសន្និដ្ឋានថា អង់ទីគ័រប្រើលើអ្នកជំងឺទាំង២នេះ អាចមានប្រសិទ្ធភាពទាំងស្រុងនោះទេ ព្រោះថា អ្នកជំងឺអេបូឡាមានតែ២នាក់ប៉ុណ្ណោះ ដូច្នេះ អ្នកជំងឺផ្សេងទៀត អាចទទួលប្រតិកម្មពីសេរ៉ូមខុសពីអ្នកទាំង២នេះ ក៏ថាបាន។ ហើយគេក៏មិនអាចចេះតែយកសេរ៉ូមទៅចាក់លើមនុស្សគ្រប់គ្នានោះដែរ បើគ្មានការអនុញ្ញាតពីសាម៉ីខ្លួនផ្ទាល់។ ដូច្នេះ អាជ្ញាធរមិនអាចសម្រេចចិត្តភ្លាមៗថា ត្រូវចាយលុយរាប់លាន រាប់សែន ដើម្បីផលិតសេរ៉ូមនេះដែរ។
ម្យ៉ាងទៀត បើទោះជាត្រូវផលិតសេរ៉ូមនេះ ដើម្បីជួយអ្នកឆ្លងមេរោគអេបូឡា នៅអាហ្វ្រិកខាងលិចក៏ដោយ ដំណើរការផលិតប្រហែលពិបាក។ បញ្ហាគឺថា ដើម្បីផលិតបានសេរ៉ូមនេះ គេត្រូវការពេលច្រើនខែ ហើយច្រើនខែនេះទៀតសោត គេអាចផលិតបានអង់ទីគ័រប្រឆាំងអេបូឡានេះ ក្នុងបរិមាណតិចតួចប៉ុណ្ណោះ។ ហើយបើទោះជាផលិតបានបរិមាណច្រើន ក៏ត្រូវរង់ចាំរាប់ឆ្នាំ ដើម្បីទទួលបានការអនុញ្ញាតអោយចេញអង់ទីគ័រនេះប្រើដែរ គឺគេត្រូវរង់ចាំដល់ពាក់កណ្តាលឆ្នាំ២០១៥ឯណោះ។ ដូច្នេះ គឺចាំយូរ ខណៈពេលនេះ យើងគ្រប់គ្នាកំពុងភ័យខ្លាចអេបូឡារាលដាលទូទាំងពិភពលោក។ គួរបញ្ជាក់ដែរថា ក្រៅពីសេរ៉ូមZMapp នេះ ក៏មានអង់ទីគ័រប្រឆាំងអេបូឡាផ្សេងៗទៀតដែរ ដែលគេកំពុងពិនិត្យមើល ប៉ុន្តែអង់ទីគ័រទាំងនោះ កំពុងស្ថិតក្នុងការពិនិត្យដំណាក់កាលដំបូងប៉ុណ្ណោះ។
ប្រទេសលោកខាងលិចមិនសូវចាប់អារម្មណ៍ពីទំហំគ្រោះថ្នាក់បង្កឡើងដោយមេរោគអេបូឡា
នៅប្រទេសជឿនលឿន ដូចជានៅអឺរ៉ុប គេមានប្រព័ន្ធការពារសុខភាពខ្ពស់ បើមានជនណាម្នាក់ឆ្លងមេរោគពិសេសអ្វីមួយ គេមានបន្ទប់ រឺទីកន្លែងពិសេស ដាក់អ្នកជំងឺនោះ អោយនៅដាច់ឆ្ងាយពីគេ មានសេវាពេទ្យតាមដានអ្នកជំងឺទាន់ពេលវេលា។
ផ្ទុយទៅវិញ តាមប្រទេសក្រីក្រនៅអាហ្វ្រិក រឺក៏ប្រទេសដែលមិនទាន់មានសេវាព្យាបាលទំនើប ការឆ្លងមេរោគគឺខ្ពស់ណាស់។ អត្រាស្លាប់ដោយជំងឺអេបូឡា គឺមានពី៦០ ទៅ៩០ភាគរយឯណោះ។ មេរោគនេះងាយឆ្លងណាស់ គ្រាន់តែប៉ះពាល់អ្នកជំងឺ ក៏ឆ្លងដែរ។ អ្នកដែលឆាប់រងគ្រោះជាងគេ គឺបុគ្គលិកពេទ្យជួយមើលថៃអ្នកជំងឺអេបូឡានោះឯង។ យើងឃើញថា រចនាសម្ព័ន្ធផ្នែកព្យាបាល ក្នុងស្រុកអាហ្វ្រិកមួយចំនួន នៅអន់ខ្សោយនៅឡើយ មិនទាន់មានស្តង់ដាដូចអឺរ៉ុបទេ។ បុគ្គលិកពេទ្យ គ្រូពេទ្យនៅខ្វះសម្ភារៈពេទ្យ ខ្វះស្រោមដៃ ដើម្បីពិនិត្យអ្នកជំងឺ រឺក៏ខ្វះទឹកស្អាតប្រើប្រាស់ជាដើម។ បុគ្គលិកពេទ្យអាហ្វ្រិកក៏មិនទាន់មានការបណ្តុះបណ្តាលគ្រប់គ្រាន់ ក្នុងវិជ្ជាជីវៈខ្លួនដែរ។ ដូច្នេះ បើប្រហែស វាអាចឆ្លងទៅដល់តំបន់ផ្សេង ប្រទេសផ្សេងទៀតបាន។ ដូច្នេះ អាចមានមហន្តរាយធំបាន។
រោគអេបូឡាកំពុងគំរាមសេដ្ឋកិច្ចនៅអាហ្វ្រិកខាងលិច
មេរោគអេបូឡាកំពុងគំរាមវិស័យសំខាន់ៗ ក្នុងសេដ្ឋកិច្ចនៅអាហ្វ្រិកខាងលិច ដូចជាកសិកម្ម រឺក៏រ៉ែជាដើម។ សៀរ៉ាឡេអូន ហ្គីណេ និងលីបេរីយ៉ា ដែលមានការឆ្លងរាលដាលមេរោគអេបូឡាច្រើនជាងគេនោះ កំពុងបារម្ភខ្លាំងណាស់។ យោងតាមធនាគារពិភពលោក និងមូលនិធិរូបិយវត្ថុអន្តរជាតិ មេរោគអេបូឡានេះ អាចធ្វើអោយកំណើននៅប្រទេសហ្គីណេ ធ្លាក់ពិន្ទុ ធ្លាក់ពី៤,៥ភាគរយ មកនៅត្រឹម៣,៥ភាគរយ។ ក្នុងស្រុកអាហ្វ្រិកវិញ សម្ភារៈពេទ្យ រឺគ្រឿងអនាម័យប្រើការពារមិនអោយឆ្លងរោគអេបូឡា បានឡើងថ្លៃខ្ពស់។ ត្រីក៏ឡើងថ្លៃខ្ពស់ដែរ ព្រោះថា អាជ្ញាធរលែងអោយមានការនាំចូលសាច់សត្វ ដូចជាសត្វស្វា រឺក៏ប្រជៀវ ក្នុងស្រុកទៀតហើយ ព្រោះសាច់សត្វទាំងនេះអាចផ្ទុកមេរោគអេបូឡា ចម្លងទៅមនុស្ស។
កាលពីថ្ងៃចន្ទ ធនាគារពិភពលោកបានសម្រេចផ្តល់ជំនួយបន្ទាន់២០០លានដុល្លារ ដល់ប្រទេសលីបេរីយ៉ា សឿរ៉ាឡេអូន និងហ្គីណេ ដែលរងការប៉ះពាល់ពីមេរោគអេបូឡា ធ្ងន់ធ្ងរជាងគេ។ ជំនួយនេះ គឺសម្រាប់ទិញសម្ភារៈពេទ្យ បង់ថ្លៃបុគ្គលិកព្យបាលអ្នកជំងឺ រឺក៏ជួយដោះស្រាយ សម្រាលបញ្ហាហិរញ្ញវត្ថុដល់ប្រជាជនក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ