ប្រជាពលរដ្ឋ៣០០គ្រួសារព្រមានប្រើសិទ្ធិស្វ័យការពារបើគ្មានដំណោះស្រាយរឿងបូមខ្សាច់នៅកោះកាពិខេត្តកោះកុង
ប្រជាពលរដ្ឋ៦នាក់ តំណាងឱ្យប្រជាពលរដ្ឋ៣០០គ្រួសារមកពីឃុំកោះកាពិ ស្រុកកោះកុង ខេត្តកោះកុង នៅព្រឹកថ្ងៃព្រហស្បតិ៍នេះ បានធ្វើដំណើរមកដល់រដ្ឋសភា ដើម្បីដាក់ញត្តិស្វែងរកការអន្តរាគមន៍ពីរដ្ឋសភា បញ្ឈប់សកម្មភាពបូមខ្សាច់នៅតំបន់នោះ។ តំណាងប្រជាពលរដ្ឋក៍បានស្នើសុំឱ្យរដ្ឋសភា កោះហៅតំណាងក្រុមហ៊ុនបូមខ្សាច់និងអាជ្ញាធរពាក់ព័ន្ធមកសាកសួរ។
ចុះផ្សាយនៅថ្ងៃ៖
ស្តាប់ - ០២:១០
ញត្តិរបស់ប្រជាពលរដ្ឋទាំង៦នាក់ តំណាងឱ្យប្រជាពលរដ្ឋ៣០០គ្រួសារ ត្រូវបានទទួលដោយលោក គង់ សភា សមាជិកគណៈកម្មការទី១នៃរដ្ឋសភា នៅព្រឹកថ្ងៃទី២៣មេសា បន្ទាប់ពីពួកគេបានទៅដល់រដ្ឋសភា ដោយមានការចោមរោមពីអ្នកសារព័ត៌មាន។ លោក គង់ សភា បានសន្យាជួយដោះស្រាយជូនដល់ប្រជាពលរដ្ឋ តែមិនបានកំណត់ពេលវេលាច្បាស់លាស់នោះទេ។
ញត្តិរបស់ប្រជាពលរដ្ឋដែលដាក់ជូនរដ្ឋសភានៅថ្ងៃនេះ បានលើកឡើងថា បច្ចប្បន្ននេះក្រុមហ៊ុនអ៊ីនធើណាសិនណលរ៉េនបូ ខូអិលធីឌី (IRC)បានប្រើប្រាស់សាឡង់ដល់ទៅ១៨គ្រឿង ដើម្បីធ្វើសកម្មភាពបូមខ្សាច់យ៉ាងអនាធិបតេយ្យ ដើម្បីដឹកចេញទៅកាន់ប្រទេសសិង្ហបុរី។ ក្នុងនោះសាឡង់៨គ្រឿង ប្រើសម្រាប់ចាប់យកខ្សាច់ពីព្រែក និង១០គ្រឿងទៀតប្រើសម្រាប់ដឹកជញ្ជូន។ ក្រុមប្រជាពលរដ្ឋបានបញ្ជាក់ថា សកម្មភាពបូមខ្សាច់នេះ កំពុងធ្វើឲ្យប៉ះពាល់យ៉ាងធ្ងន់ធ្ងរដល់ជីវចម្រុះ និងជីវភាពរស់នៅរបស់ប្រជាពលរដ្ឋ ក្នុងនោះ រួមមានការបំផ្លិចបំផ្លាញព្រៃកោងកាង និងជីវចម្រុះក្រោមទឹក, បំផ្លាញដល់មច្ឆាជាតិ ប្រភពស្បៀង និងឧបករណ៍នេសាទ, ធ្វើឱ្យបំពុលដល់ទឹក បាក់ឆ្នេរ និងបាត់កោះតូចៗ ដូចជាកោះកាប៉ុងជាដើម។ តំណាងប្រជាពលរដ្ឋក៍បានស្នើសុំឱ្យរដ្ឋសភា កោះហៅតំណាងក្រុមហ៊ុន និងអាជ្ញាធរពាក់ព័ន្ធមកសាកសួរជុំវិញសំណុំរឿងនេះដែរ។
លោក ជា រតនា តំណាងប្រជាពលរដ្ឋម្នាក់ក្នុងចំនោម៦នាក់បានថ្លែងប្រាប់វិទ្យុបារាំងអន្តរជាតិRFIថា ប្រជាពលរដ្ឋទាំង៣០០គ្រួសារនឹងបាត់បង់អាជីពជាអ្នកនេសាទ ប្រសិនបើអាជ្ញាធរមិនប្រញ៉ាប់ប្រញ៉ាល់ដោះស្រាយជូនដល់ប្រជាពលរដ្ឋទេនោះ ហើយអ្វីជាវិធានការបន្ទាន់នៅចំពោះមុខក្រោយពីការដាក់ញត្តិនៅពេលនេះ ប្រជាពលរដ្ឋទាំង៣០០គ្រួសារ នឹងប្រើសិទ្ធិស្វ័យការពារ ដោយការពារមិនឱ្យសាឡង់ទាំងនោះ ចូលមកបូមខ្សាច់នៅតំបន់កោះកាពិទៀតទេ។ ប្រជាពលរដ្ឋបានអះអាងថា ក្រុមហ៊ុនបូមខ្សាច់នេះ មិនមានអាជ្ញាប័ណ្ណនោះទេ។
សូមបញ្ជាក់ថា ក្រៅពីការដាក់ញត្តិសុំអន្តរាគមន៍ពីរដ្ឋសភានៅពេលព្រឹកហើយ ប្រជាពលរដ្ឋទាំង៦នាក់តំណាងឱ្យប្រជាពលរដ្ឋទាំង៣០០គ្រួសារ ក៍បានបន្តដំណើរយកញត្តិទៅដាក់ និងសុំអន្តរាគមន៍ពីក្រសួងរ៉ែ និងថាមពលជាបន្តទៀត។ ក្រសួងរ៉ែ និងថាមពល ដែលទើបតែទទួលបានភ្លើងខៀវពីរដ្ឋាភិបាលក្នុងការគ្រប់គ្រង់ការធ្វើអាជីវកម្មខ្សាច់នៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ