Oxfam៖ មនុស្ស៨នាក់ដែលមានជាងគេបំផុត មានទ្រព្យសរុបលើសមនុស្ស ពាក់កណ្តាលសកលលោក
ក្នុងឱកាសវេទិកាសេដ្ឋកិច្ចពិភពលោក ដែលនឹងចាប់ផ្តើមឡើងនៅថ្ងៃនេះ នៅទីក្រុងដាវ៉ូស ប្រទេសស្វីស អង្គការ Oxfam ដែលជាអង្គការប្រយុទ្ធប្រឆាំងនឹងភាពក្រីក្រ បានចេញរបាយការណ៍មួយ ដោយបានសន្និដ្ឋានថា មនុស្សជាងពាក់កណ្តាលនៃសកលលោកយើងនេះ បើសរុបទ្រព្យសម្បតិ្តទៅ គឺមានស្មើមនុស្សដែលមានជាងគេបំផុត តែ៨នាក់ ប៉ុណ្ណោះ។ មានន័យថា ពិភពលោកយើង ពោរពេញទៅដោយគម្លាតគ្នា រវាងអ្នកក្រីក្រ ជាងពាក់កណ្តាលពិភពលោក និងអ្នកមានមហាសេដ្ឋីមួយក្តាប់តូច ដែលមានទ្រព្យមហាសាល។ គម្រូសេដ្ឋកិច្ចបច្ចុប្បន្ន មិនបានធ្វើឲ្យគម្លាតគ្នានេះ រួញខើចទេ ផ្ទុយទៅវិញ អ្នកមានកាន់តែមានទៅ ឯអ្នកក្រ កាន់តែក្រទៅ។
ចុះផ្សាយនៅថ្ងៃ៖
ស្តាប់ - ០២:០៣
"វាជារឿងមួយមិនអាចទទួលយកបានទេ ដែលភាពមានបាន របស់សកលលោកយើង ត្រូវប្រមូលផ្តុំទៅក្នុងកណ្តាប់ដៃរបស់មនុស្សតែបួន ដប់នាក់"។ នេះគឺជាការលើកឡើងរបស់លោកស្រី Manon Aubry អ្នកនាំពាក្យអង្គការOxfam។ លោកស្រីបន្តថា រាល់ថ្ងៃនេះ នៅលើសកលលោកយើង មនុស្សម្នាក់ ក្នុងចំណោម៦នាក់ រកប្រាក់ចំណូលមិនបាន២ដុល្លារផង ក្នុងមួយថ្ងៃ។
សម្តីរបស់លោកស្រី ត្រូវបានស្រង់ចេញ ពីលិខិតជូនដំណឹងរបស់អង្គការនេះ ដោយផ្អែកលើរបាយការណ៍ថ្មីមួយ ស្តីពីគំលាតគ្នារវាងអ្នកមាននឹងអ្នកក្រ នៅទូទាំងសកលលោក។ យោងតាមរបាយការណ៍របស់ Oxfam បានបង្ហាញថា មនុស្ស៨នាក់ ដែលមានជាងគេលើលោក មានទ្រព្យសម្បត្តិសរុបទាំងអស់ លើសទ្រព្យសម្បត្តិរបស់មនុស្សជាងពាក់កណ្តាល នៃពិភពលោក។ មនុស្សទាំង៨នាក់នេះ គឺរបាយការណ៍Oxfam បានស្រង់ចេញពីតារាងតួលេខ របស់ទស្សនាវត្តី Forbes ៖ ១-Bill Gates (Microsoft) ២-Amancio Ortega (Inditex) 3-Warren Buffet (Berkshire Hathaway) 4-Carlos Slim (Telmex) 5-Jeff Bezos (Amazon) 6-Mark Zuckerberg (Facebook) 7-Larry Ellisson (Oracle) 8-Michael Bloomberg (Bloomberg LP)
របាយការណ៍របស់អង្គការ Oxfam បានរិះគន់ពីប្រព័ន្ធសេដ្ឋកិច្ចបច្ចុប្បន្ន ដែលក្រុមហ៊ុន គិតតែនាំគ្នាកើបប្រាក់ចំណេញ បន្ទាបប្រាក់ខែរបស់បុគ្គលិក ហើយផ្ទុយទៅវិញ ប្រមូលប្រាក់ចំណេញឲ្យម្ចាស់ភាគហ៊ុន។ របាយការណ៍ ក៏បានលើកឡើងពីការរៀបចំដែលរដ្ឋកាត់បន្ថយពន្ធឲ្យក្រុមហ៊ុន រឺក៏ការគេចពន្ធ យកប្រាក់ចំណេញទៅលាក់ជាដើម។ ធ្វើបែបនេះ គឺឲ្យរដ្ឋបាត់បង់ចំណូលថវិកា ដែលត្រូវការដើម្បីយកទៅបំរើសេវាសាធារណៈ និងកិច្ចការសង្គមនានា បំរើដល់ជីវភាពរបស់ប្រជាជនក្រីក្រ។ អង្គការនេះ បានអំពាវនាវ ឲ្យរដ្ឋាភិបាល មហាសេដ្ឋី និងម្ចាស់ភាគហ៊ុនទាំងអស់ ឲ្យពិចារណា ធ្វើកំណែទម្រង់ប្រព័ន្ធសេដ្ឋកិច្ច ដែលជាសេដ្ឋកិច្ចដើម្បីជីវភាពមនុស្ស មិនមែនដើម្បីភាពមានបានរបស់ម្ចាស់ក្រុមហ៊ុន រឺក៏អ្នកមានអំណាចទេ។
សូមបញ្ជាក់ថា អង្គការ Oxfam គឺជាអង្គការក្រៅរដ្ឋាភិបាលមួយដ៏ចំបង ហើយតែងតែធ្វើការបរិហារអំពីគំលាតគ្នារវាងអ្នកក្រ និងអ្នកមាន អំពីប្រព័ន្ធសេដ្ឋកិច្ចទីផ្សារសេរីជ្រុលហួសហេតុ ដែលគិតតែចំណេញដើម្បីក្រុមហ៊ុន ដើម្បីម្ចាស់ភាគហ៊ុន។ ជារៀងរាល់លើក ក្នុងពេលដែលប្រទេសទូទាំងពិភពលោក បើកវេទិកាសេដ្ឋកិច្ច នៅទីក្រុងដាវ៉ូស ប្រទេសស្វីស គឺអង្គការនេះ តែងតែចេញរបាយការណ៍មួយ ដើម្បីដាល់តឿន ពញ្ញាក់ស្មារតីរបស់ថ្នាក់ដឹកនាំសកលលោក ឲ្យងៀកមកគិតគូរពីជីវភាពជាក់ស្តែងរបស់ប្រជាជនក្រីក្រ មិនមែនអភិវឌ្ឍន៍សេដ្ឋកិច្ច ដើម្បីចំណេញមានបានសម្រាប់តែអ្នកមាន មួយក្តាប់តូចនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ