ភ្នាក់ងារស៊ើបការណ៍សម្ងាត់អាល្លឺម៉ង់លួចស្តាប់ទូរស័ព្ទរដ្ឋមន្ត្រីការបរទេសអាមេរិក
យោងតាមសារពត៌មានអាល្លឺម៉ង់ បានឲ្យដឹងនៅថ្ងៃសៅរ៍ទី១៦ សីហា ថា ភ្នាក់ងារស៊ើបការណ៍សម្ងាត់អាល្លឺម៉ង់បានលបស្តាប់សម្លេងសន្ទនាទូរស័ព្ទរបស់លោក ចន ឃេរី ដែលជារដ្ឋមន្ត្រីក្រសួងការបរទេសសហរដ្ឋអាមេរិក។ ដំណឹងនេះលេចលឺឡើង បន្ថែមពីលើ រឿងអាស្រូវកន្លងមក ដែលថាភ្នាក់ងារស៊ើបការសម្ងាត់អាមេរិកបានលបស្តាប់ទូរស័ព្ទរបស់លោកស្រី អង់ហ្គេឡា មែកគែល តែថាពេលនេះ ខាងអាល្លឺម៉ង់ជាអ្នកលបស្តាប់ថ្នាក់ដឹកនាំអាមេរិកវិញម្តង។
ចុះផ្សាយនៅថ្ងៃ៖
ស្តាប់ - ០១:៥៥
សារពត៌មានអាល្លឺម៉ង់ Der Spiegel បានបញ្ចេញពត៌មានសម្ងាត់របស់ខ្លួន ថា ភ្នាក់ងារស៊ើបការណ៍សម្ងាត់អាល្លឺម៉ង់ បានធ្វើការលបស្តាប់ការសន្ទនាទូរស័ព្ទរបស់លោក ចន ឃេរី។ ដោយមិនបានបង្ហើបឲ្យដឹងពីប្រភពពត៌មាន សារពត៌មាននេះបានសរសេរថា ភ្នាក់ងារស៊ើបការណ៍អាល្លឺម៉ង់ បានលបស្តាប់តែម្តងប៉ុណ្ណោះ នូវការសន្ទនាតាមទូរស័ព្ទរបស់លោក ចន ឃេរី កាលពីឆ្នាំ២០១៣ ក្នុងពេលដែលលោកបានពិភាក្សាតាមទូរស័ព្ទ ពីបញ្ហាវិបត្តិនៅតំបន់មជ្ឈឹមបូព៌ា។
ពត៌មានបានលេចលឺឡើង បន្ទាប់ពីមានរឿងអាស្រូវមួយទៀតផងដែរ ដែលថា ភ្នាក់ងារស៊ើបការណ៍សម្ងាត់អាល្លឺម៉ង់ បានលបស្តាប់ទូរស័ព្ទរបស់លោកស្រី ហេឡារី ក្លីនតុន។ មានកាសែតក្នុងស្រុក និងបណ្តាញទូរទស្សន៍អាល្លឺម៉ង់ចំនួនបី ដែលបានផ្សព្វផ្សាយពត៌មានចុងក្រោយនេះ ដោយផ្អែកលើ ឯកសារដែលបានផ្តល់ឲ្យដោយគេញសម្ងាត់របស់CIAអាមេរិក។ សារពត៌មានបានបន្ថែមថា វាជាការស្តាប់ដោយច្រឡំ។ តែទោះជាយ៉ាងណា ការច្រឡំនេះ ហាក់ដូចជាចៃដន្យពេក ព្រោះច្រឡំចំលោកស្រី ហេឡារី ក្លីនតុន ដែលជាអតីតរដ្ឋមន្ត្រីការបរទេស ពេលគាត់កំពុងស្ថិតក្នុងយន្តហោះផ្លូវការរបស់រដ្ឋាភិបាលអាមេរិក។
មិនត្រឹមតែប៉ុណ្ណោះ មិនមែនមានតែថ្នាក់ដឹកនាំធំៗរបស់អាមេរិកប៉ុណ្ណោះទេ ដែលត្រូវ ភ្នាក់ងារស៊ើបការណ៍សម្ងាត់អាល្លឺម៉ង់លបស្តាប់ទូរស័ព្ទ។ កាសែតអាល្លឺម៉ងបានសរសេរឲ្យដឹងផងដែរថា រដ្ឋាភិបាលអល្លឺម៉ង់បានបញ្ជាឲ្យភ្នាក់ងារនេះ លបស្តាប់ទូរស័ព្ទរបស់ថ្នាក់ដឹកនាំទួរគី ព្រោះថាទួរគីជាដៃគូយ៉ាងសំខាន់ របស់អាមេរិកក្នុងអង្គការអូតង់។
សារធារណៈជននៅមិនទាន់ភ្លេចទេថា កាលពីឆ្នាំទៅ រឿងអាស្រូវដែលភ្នាក់ងារស៊ើបការណ៍អាមេរិកលបស្តាប់ទូរស័ព្ទលោកស្រីប្រមុខរដ្ឋអាល្លឺម៉ង់ បានធ្វើឲ្យមតិសាធារណៈទូទៅនៅអាល្លឺម៉ង់ មានការខឹងសម្បារជាខ្លាំង។ រឿងរ៉ាវនេះ បាននាំឲ្យទំនាក់ទំនងរបស់មហាអំណាចពិភពលោកទាំងពីរល្អក់កករ ហើយរហូតមកដល់ពេលនេះ នៅមិនទាន់មានការដោះស្រាយមន្ទិលសង្ស័យទាំងអស់នេះនៅឡើយទេ។ ភាពមិនទុកចិត្តគ្នា និងការការពារផលប្រយោជន៍រៀងៗខ្លួនឲ្យខាងតែបាន បានជំរុញឲ្យមហាអំណាចធំៗលួចស្តាប់គ្នាទៅវិញទៅមក ចង់បានពត៌មានតែរៀងៗខ្លួន។ ពោលគឺទំលាប់ចាស់កាលពីសម័យសង្រ្គាមត្រជាក់ នៅមិនទាន់ត្រូវគេបោះបង់ចោលនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ