សហភាពអឺរ៉ុបនឹងបើកការចរចាលើការធ្វើពាណិជ្ជកម្មសេរីជាមួយវៀតណាម
កាលពីថ្ងៃព្រហស្បតិ៍ ម្សិលមិញនេះ សហភាពអឺរ៉ុបបានចេញសេចក្តីសម្រេចមួយ អនុញ្ញាតឲ្យគណៈកម្មការអឺរ៉ុបបើកកិច្ចចរចាអំពីការធ្វើពាណិជ្ជកម្មសេរីជាមួយវៀតណាម។ វៀតណាមនឹងក្លាយជាប្រទេសទីបី ក្នុងតំបន់អាស៊ាន ដែលបើកការចរចាទ្វេភាគី លើការធ្វើពាណិជ្ជកម្មសេរី ជាមួយសហភាពអឺរ៉ុប។
ចុះផ្សាយនៅថ្ងៃ៖
ស្តាប់ - ០១:៣៦
នៅក្នុងសេចក្តីថ្លែងការណ៍ កាលពីម្សិលមិញ ក្រុមប្រឹក្សាអឺរ៉ុប (ដែលមានសមាសភាពជាប្រមុខរដ្ឋ ឬប្រមុខរដ្ឋាភិបាលនៃប្រទេសជាសមាជិកសហភាពអឺរ៉ុប) បានបញ្ជាក់ថា កិច្ចចរចាលើកិច្ចព្រមព្រៀងពាណិជ្ជកម្មសេរីជាមួយវៀតណាម នឹងចាប់បើកធ្វើ នៅក្នុងពេលឆាប់ៗខាងមុខនេះ។
គួរបញ្ជាក់ថា កាលពីឆ្នាំ២០០៧ សហភាពអឺរ៉ុបបានព្រមព្រៀងបើកកិច្ចចរចាលើកិច្ចព្រមព្រៀងពាណិជ្ជកម្មសេរីក្នុងក្របខ័ណ្ឌតំបន់ជាមួយអាស៊ាន។ ក៏ប៉ុន្តែ ក្រោយពីបានចរចាគ្នាបាន ៦លើក សហភាពអឺរ៉ុប និងអាស៊ានបានសម្រេចផ្អាកការចរចានេះទៅវិញ នៅខែឧសភា ឆ្នាំ២០០៩។ នៅខែធ្នូ ឆ្នាំ២០០៩ សហភាពអឺរ៉ុបក៏បានសម្រេចធ្វើការចរចាជាមួយប្រទេសសមាជិកអាស៊ាន ក្នុងក្របខ័ណ្ឌទ្វេភាគីវិញ។
ចាប់ពីពេលនោះមក មានប្រទេសសមាជិកអាស៊ានចំនួនពីរហើយ ដែលបានបើកការចរចាពាណិជ្ជកម្មសេរីជាមួយសហភាពអឺរ៉ុប គឺសិង្ហបុរី ចាប់បើកការចរចានៅដើមឆ្នាំ២០១០ និងម៉ាឡេស៊ី ចាប់បើកការចរចា នៅចុងឆ្នាំ២០១០។ វៀតណាម នឹងត្រូវក្លាយជាប្រទេសអាស៊ានទី៣ ដែលចរចាលើកិច្ចព្រមព្រៀងពាណិជ្ជកម្មសេរី ជាមួយសហភាពអឺរ៉ុប។
នៅក្នុងអំឡុងជំនួបកំពូលធុរកិច្ចអាស៊ាន-សហភាពអឺរ៉ុប ដែលបើកធ្វើនៅប្រទេសកម្ពុជា កាលពីខែមីនាកន្លងទៅនេះ តំណាងសហភាពអឺរ៉ុបបានថ្លែងថា នៅពេលនេះ សហភាពអឺរ៉ុបចរចាជាលក្ខខណៈទ្វេភាគីជាមួយប្រទេសសមាជិកអាស៊ាន ក៏ប៉ុន្តែ គោលដៅចម្បងរបស់សហភាពអឺរ៉ុប គឺចង់ចុះកិច្ចព្រមព្រៀងពាណិជ្ជកម្មសេរី ជាមួយអាស៊ាន ក្នុងក្របខ័ណ្ឌតំបន់។
គួរបញ្ជាក់ថា បន្ទាប់ពីចិន សហភាពអឺរ៉ុប គឺជាដៃគូពាណិជ្ជកម្មដ៏ធំលំដាប់ទីពីររបស់អាស៊ាន។ ចំណែកអាស៊ានវិញ គឺជាដៃគូពាណិជ្ជកម្មលំដាប់ទី៣របស់សហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ