អ្នកកាសែតបារំាងពីរនាក់ជាប់ចោទពីបទសម្លុតទារលុយ ៣លានអឺរ៉ូពីស្តេចម៉ារ៉ុកម៉ូហាម៉េដទី៦
នៅក្នុងប្រទេសបារំាង អ្នកកាសែតបារំាងពីរនាក់ គឺលោកស្រី Catherine Graciet និងលោក Eric Laurent ដែលជាប់សង្ស័យពីបទបានសម្លុតទារលុយចំនួន ៣លានអឺរ៉ូពីស្តេចម៉ារ៉ុកម៉ូហាម៉េដទី៦ ទើបត្រូវបានតុលាការបារំាងចោទប្រកាន់ជាផ្លូវការ តែដោះលែងឲ្យមានសេរីភាពក្រោមការតាមដាន ឃ្លំាមើលនៅថ្ងៃសៅរិ៍ ទី២៩ សីហានេះ។ គួររម្លឹកជូនថា អ្នកកាសែតបារំាងទំាងពីររូបត្រូវបានចាប់ខ្លួនកាលពីថ្ងៃព្រហស្បតិ៍ ទី២៧ សីហាក្នុងទីក្រុងប៉ារីសពីបទសង្ស័យបានសម្លុតទារលុយពីរាជានិយមម៉ារ៉ុកជាថ្មូរនឹងការមិនចេញផ្សាយសៀវភៅមួយក្បាលដែលលោក Eric Laurent បានសរសេរទាក់ទងនឹងស្តេចម៉ារ៉ុកម៉ូហាម៉េដទី៦។
ចុះផ្សាយនៅថ្ងៃ៖
ស្តាប់ - ០៦:០០
អ្វីៗបានចាប់ផ្តើមដំបូងក្នុងថ្ងៃទី២៣ កក្កដាកន្លងទៅ។ នៅក្នុងថ្ងៃទី២៣ កក្កដា អ្នកកាសែតបារំាងលោក Eric Laurent បានទាក់ទង និងជូនព័ត៌មានដល់រាជានិយមម៉ារ៉ុកថា លោកត្រៀមខ្លួននឹងចេញផ្សាយសៀវភៅមួយក្បាលដែលជាស្នាដៃរបស់លោក និងដែលសៀវភៅនោះបានផ្តោតសំខាន់លើរាជានិយមម៉ារ៉ុក និយាយជារួម និងលើស្តេចម៉ារ៉ុកម៉ូហាម៉េដទី៦ និយាយដោយឡែក។ ប៉ុន្មានថ្ងៃក្រោយមក ក៏មានជំនួបរវាងលោក Eric Laurent និងមេធាវីរបស់ស្តេចម៉ារ៉ុកនៅក្នុងទីក្រុងប៉ារីស។ នៅក្នុងជំនួបនោះ លោក Eric Laurent បានសុខចិត្តមិនបញ្ចេញសៀវភៅស្តីពីស្តេចម៉ារ៉ុកដែលលោកបានសរសេរ ជាថ្នូរនឹងទឹកប្រាក់ចំនួន ៣លានអឺរ៉ូ។
តែក្នុងពេលដំណាលគ្នានោះ ប្រទេសម៉ារ៉ុកក៏បានដាក់ពាក្យប្តឹងរូបលោក Laurent និងលោកស្រី Catherine នៅក្នុងប្រទេសបារំាង។ នៅពេលនោះ តុលាការបារំាងក៏បានបើកការស៊ើបអង្កេតបឋម។ បន្ទាប់មក ជំនួបរវាងអ្នកកាសែតបារំាងទំាងពីររូប និងមេធាវីស្តេចម៉ារ៉ុកក៏បានធ្វើឡើងជាបន្តបន្ទាប់ តែស្ថិតក្រោមការតាមដាន ឃ្លាំមើលពីក្រុមប៉ូលិសបារំាង។ គឺទើបតែនៅថ្ងៃទី២៧ សីហាថ្មីៗនេះទេដែលអ្នកកាសែតបារំាងទំាងពីរនាក់ត្រូវបានចាប់ខ្លួននៅក្នុងភោជនីយដ្ឋានមួយក្នុងទីក្រុងប៉ារីស ចំពេលដែលពួកគេកំពុងមានជំនួបជាថ្មីជាមួយមេធាវីស្តេចម៉ារ៉ុក។
តែអ្វីដែលអ្នកកាសែតទំាងពីររូបមិនបានដឹងនោះគឺថា រាល់កិច្ចសន្ទនាគ្រប់យ៉ាងជាមួយនឹងមេធាវីស្តេចម៉ារ៉ុក តំាងពីការទាមទារឲ្យបង់លុយកក់ចំនួន ៤០ ០០០អឺរ៉ូត្រូវបានគេលួចថតទំាងអស់។ មេធាវីរបស់លោកស្រី Catherine បានបញ្ជាក់ថា ពិតជាមានការព្រមព្រៀងរឿងទឹកលុយ ៤០ ០០០អឺរ៉ូរវាងម៉ារ៉ុក និងអ្នកកាសែតបារំាងទំាងពីរនាក់មែន តែថា នេះជាឆាកល្ខោនមួយរៀបចំដោយម៉ារ៉ុកដើម្បីដាក់អន្ទាក់លើរូបអ្នកកាសែតបារំាងទំាងពីរនាក់ប៉ុណ្ណោះ។
គួរជម្រាបជូនថា អ្នកកាសែតបារំាងទំាងពីរនាក់ គឺលោកស្រី Catherine Graciet និងលោក Eric Laurent ធ្លាប់បានសរសេរសៀវភៅមួយស្តីពីស្តេចម៉ារ៉ុកម៉ូហាម៉េដទី៦ កាលពីឆ្នំា ២០១២ ដែលមានចំណងជើងថា « Le roi prédateur » ដែលអាចប្រែក្រៅផ្លូវការថា « ស្តេចរំពា »។ ទីបំផុតនៅថ្ងៃនេះ តុលាការបារំាងបានចោទប្រកាន់អ្នកកាសែតទំាងពីរជាផ្លូវការ តែដោះលែងឲ្យមានសេរីភាព ក្រោមការតាមដាន ឃ្លំាមើល។
ទំនាក់ទំនងរវាងបារំាង និងម៉ារ៉ុក ជាទំនាក់ទំនងមិនសូវរលូន
មកដល់ពេលនេះ នៅមិនទាន់មានប្រតិកម្មអ្វីពីរដ្ឋាភិបាលបារំាង និងម៉ារ៉ុកនៅឡើយទេជុំវិញរឿងរ៉ាវទាក់ទងនឹងអ្នកកាសែតបារំាងទំាងពីររូប និងរាជានិយមម៉ារ៉ុក។ អ្វីដែលគេកត់សម្គាល់ឃើញនារយៈពេលប៉ុន្មានថ្ងៃនេះ គឺការឆ្លើយឆ្លងគ្នារវាងក្រុមមេធាវីរបស់អ្នកកាសែតបារំាងជាប់ចោទទំាងពីររូប និងមេធាវីរបស់ស្តេចម៉ារ៉ុកម៉ូហាម៉េដទី៦ ព្រមទំាងដំណើរការរបស់តុលាការបារំាងនៅក្នុងរឿងក្តីនេះ។ សំណួរដែលគ្រប់គ្នាកំពុងចោទពេលនេះគឺថា តើរឿងរ៉ាវថ្មីមួយនេះនឹងអាចបញ្ឆេះឲ្យមានវិបត្តិការទូតជាថ្មីរវាងបារំាង និងម៉ារ៉ុកដែរ ឬទេ?
គេនៅមិនទាន់ហ៊ានទាញសេចក្តីសន្និដ្ឋានយ៉ាងម៉េចទេ។ តែសម្រាប់ប្រទេសបារំាង និងប្រទេសម៉ារ៉ុក គឺគ្មាននរណាម្នាក់ចង់ឃើញរឿងរ៉ាវថ្មីមួយនេះចូលទៅបំពុលទំនាក់ទំនងផ្លូវទូតរវាងគ្នាជាថ្មីឡើយ។ គួររម្លឹកជូនថា គឺទើបតែនៅដើមឆ្នំា ២០១៥ នេះប៉ុណ្ណោះដែលទីក្រុងប៉ារីស និងទីក្រុងរ៉ាបាបានភ្ជាប់ទំនាក់ទំនងការទូតរវាងគ្នាឡើងវិញ បន្ទាប់ពីបានបែរខ្នងដាក់គ្នាអស់រយៈពេល ១ឆ្នំា។ ១ឆ្នំាដែលបារំាង និងម៉ារ៉ុកមើលមុខគ្នាមិនចំ និងថែមទំាងបានព្យួរចោលនូវរាល់កិច្ចសហប្រតិបត្តិទំាងអស់រវាងគ្នា។
វិបត្តិការទូតពេញ ១ឆ្នំាដោយសារតែផ្ទុះរឿងរ៉ាវចំនួនពីរក្នុងឆ្នំា ២០១៤ តែមួយ ទី១ គឺការដែលក្រុមប៉ូលិសបារំាងបានចូលទៅក្នុងគេហដ្ឋានរបស់ឯកអគ្គរាជទូតម៉ារ៉ុកប្រចំាក្រុងប៉ារីសដើម្បីផ្តល់ព័ត៌មានពីដីការកោះហៅលោកប្រធានការិយាល័យស៊ើបការសម្ងាត់ម៉ារ៉ុកអាប់ដែលឡាទី្វ ហាមូឈី (Abdellatif Hammouchi) ពីតុលាការបារំាង និងទី២ គឺការដែលប៉ូលីសព្រំដែនបារំាងនៅអាកាសយានដ្ឋានក្រុងប៉ារីសចាប់ឆែកឆេរលោករដ្ឋមន្រ្តីការបរទេសម៉ារ៉ុក។
បារំាង និងម៉ារ៉ុកត្រូវការគ្នាមិនអាចខ្វះបាននៅក្នុងវិស័យតុលាការ
ទោះបីជាមានភាពរកំារកូសយ៉ាងណាក៏ដោយ ក៏បារំាង និងម៉ារ៉ុកត្រូវការគ្នាមិនអាចខ្វះបាននៅក្នុងវិស័យតុលាការ ពិសេសកិច្ចសហប្រតិបត្តិការផ្នែកច្បាប់ព្រហ្មទ័ណ្ឌ និងច្បាប់គ្រួសារ។ នេះក៏ដោយសារថាបច្ចុប្បន្ន មានពលរដ្ឋបារំាងពី៦០ ០០០ ទៅ ៨០ ០០០នាក់កំពុងរស់នៅក្នុងប្រទេសម៉ារ៉ុក និងមានប្រជាជនម៉ារ៉ុកជាង ១លាន ៣សែននាក់កំពុងរស់នៅក្នុងប្រទេសបារំាង។ មួយវិញទៀត មានអនុសញ្ញាជាច្រើនដែលប៉ារីស និងរ៉ាបាបានចុះហត្ថលេខារួមគ្នាស្តីពីច្បាប់ព្រហ្មទ័ណ្ឌ ឬមួយក៏ច្បាប់គ្រួសារ។
គឺផ្តើមពីទំនាក់ទំនងផ្លូវទូត និងផ្លូវច្បាប់មិនអាចខ្វះបាននេះហើយដែលបារំាង និងម៉ារ៉ុកបានព្យាយាមបញ្ជៀសយករឿងរបស់បុគ្គលទៅឡូកឡំ និងទុកឲ្យតុលាការធ្វើការតាមច្បាប់។ ប៉ារីស និងរ៉ាបាសុទ្ធតែយល់ដូចគ្នាថា មានតែការយោគយល់ និងការទុកចិត្តគ្នាទៅវិញទៅមកទេដែលភាគីទំាងពីរអាចបន្តកិច្ចសហប្រតិបត្តិការនៅលើវិស័យជាច្រើនរវាងគ្នា ពិសេសវិស័យសេដ្ឋកិច្ចដែលបារំាង ជាដៃគូសេដ្ឋកិច្ចទី១ របស់ម៉ារ៉ុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ