ស៊ីរី៖កិច្ចចរចាសន្តិភាពក្នុងទីក្រុងហ្សឺណែវទទួលបរាជ័យមុនបើកកិច្ចចរចា?
នៅថ្ងៃសុក្រ ទី២៩ មករានេះ កិច្ចចរចាដើម្បីស្វែងរកសន្តិភាពឲ្យប្រទេសស៊ីរីបានចាប់ផ្តើមដូចដែលបានគ្រោងទុកនៅក្នុងទីក្រុងហ្សឺណែវ ប្រទេសស្វីស។ កិច្ចចរចានេះបានរៀបចំដោយអង្គការសហប្រជាជាតិ និងដែលត្រូវចូលរួមដោយគ្រប់ភាគីពាក់ព័ន្ធទាំងអស់ ពិសេសភាគីជម្លោះផ្ទៃក្នុងនៅស៊ីរី។ តែទីបំផុតនាល្ងាចថ្ងៃព្រហស្បតិ៍ ទី២៨ មករា ក្រុមប្រឆាំងស៊ីរីបានបដិសេធមិនទៅចូលរួមនៅក្នុងកិច្ចចរចា។ សូមជម្រាបជូនថា អស់រយៈពេល ៥ឆ្នាំមកហើយដែលស៊ីរីបានធ្លាក់ក្នុងសង្រ្គាមស៊ីវិល និងដែលមានមនុស្សស្លាប់ជាង ២៦០ ០០០នាក់។ តាំងពីពេលនោះមក សហគមន៍អន្តរជាតិធ្លាប់បានរៀបចំសន្និសីទអន្តរជាតិជាច្រើនដង តែទទួលបរាជ័យជានិច្ច។
ចុះផ្សាយនៅថ្ងៃ៖
ស្តាប់ - ០៥:២៩
ក្រុមប្រឆាំងស៊ីរីដែលបានបដិសេធមិនទៅចូលរួមនៅក្នុងកិច្ចចរចាថ្ងៃនេះមានឈ្មោះថា ឧត្តមក្រុមប្រឹក្សាដើម្បីកិច្ចចរចាដែលបានប្រសូត្រឡើងក្នុងខែធ្នូ ឆ្នាំ ២០១៥នៅក្នុងទីក្រុងរីយ៉ាដ ប្រទេសអារ៉ាប៊ីសាអូឌីត។ សមាសភាពនៅក្នុងឧត្តមក្រុមប្រឹក្សាដើម្បីកិច្ចចរចានោះមានគ្នាប្រមាណជា ១០០នាក់ដែលតំណាងដោយឥស្សរជននយោបាយ និងយោធារបស់ក្រុមប្រឆាំងស៊ីរី។ នៅប៉ុន្មានខែមុនថ្ងៃបើកកិច្ចចរចា លោកស្តាហ្វាន មីស្ទ៊ូរ៉ា ប្រេសិតពិសេសរបស់អង្គការសហប្រជាជាតិសម្រាប់ស៊ីរីមិនបានប្រាប់ឲ្យដឹងពីវត្តមាន និងអត្តសញ្ញាណក្រុមប្រឆាំងណាពិតប្រាកដទេ។
តែឧត្តមក្រុមប្រឹក្សាដើម្បីកិច្ចចរចាធ្លាប់បានអះអាងថា ពួកគេជាក្រុមប្រឆាំងស៊ីរីស្របច្បាប់តែមួយគត់។ នារយៈពេលប៉ុន្មានសប្តាហ៍កន្លងទៅ ឧត្តមក្រុមប្រឹក្សាដើម្បីកិច្ចចរចានេះបានដាក់ចេញនូវលក្ខខណ្ឌចំនួន ៣ ទី១ បញ្ឈប់ការទម្លាក់គ្រាប់បែកពីទ័ពរដ្ឋាភិបាលស៊ីរី ទី២ ដកការឡោមព័ទ្ធរបស់ទ័ពស៊ីរីចេញពីតំបន់មួយចំនួន និងទី៣ បើកឲ្យមានការបញ្ជូនជំនួយមនុស្សធម៌ទៅឲ្យជនស៊ីវិល។ តែឧត្តមក្រុមប្រឹក្សាដើម្បីកិច្ចចរចាបានកត់សម្គាល់ឃើញថា គ្មានលក្ខខណ្ឌណាមួយក្នុងចំណោមលក្ខខណ្ឌទាំង ៣ ត្រូវបានគោរពទេ។
នេះជាមូលហេតុដែលបានជម្រុញឲ្យក្រុមប្រឆាំងសម្រេចក្នុងនាទីចុងក្រោយមិនទៅចូលរួមនៅក្នុងកិច្ចចរចានាថ្ងៃនេះ។
កិច្ចចរចាសន្តិភាពនៅតែបើកធ្វើ ទោះបីគ្មានវត្តមានក្រុមប្រឆាំង
អវត្តមានក្រុមប្រឆាំងពេលនេះមិនបានធ្វើឲ្យគេភ្ញាក់ផ្អើលប៉ុន្មានទេ ហើយក៏មិនទាន់ជាក្តីអស់សង្ឃឹមដែរ។ ជាការពិត វត្តមានគ្រប់ភាគីជម្លោះផ្ទៃក្នុងនៅក្នុងកិច្ចចរចាជារឿងមួយដែលគ្រប់គ្នាចង់បាន និងអាចថា ជាឱកាសដ៏ល្អប្រសើរមួយដើម្បីអាចជជែកគ្នាត្រង់ទៅត្រង់មកក្នុងគោលដៅស្វែងរកកិច្ចព្រមព្រៀងរួមដែលអាចទទួលយកបានទាំងអស់គ្នា។ សូមជម្រាបជូនថា កិច្ចចរចាដើម្បីសន្តិភាពស៊ីរីដែលបានបើកប្រជុំថ្ងៃនេះត្រូវបានគ្រោងទុកអស់ជាច្រើនខែ និងដែលរូបលោកប្រេសិតពិសេសស្តាហ្វាន មីស្ទូរ៉ាបានព្យាយាមប្រមែប្រមូលគ្រាប់ភាគីជម្លោះផ្ទៃក្នុងទាំងអស់ឲ្យចូលអង្គុយតុចរចា។
ឧត្តមក្រុមប្រឹក្សាដើម្បីកិច្ចចរចាដែលតំណាងឲ្យក្រុមប្រឆាំងស៊ីរីក៏បានប្រាប់ឲ្យដឹងពីការចូលរួមរបស់ខ្លួនដែរ តែបែរជាបានបដិសេធនៅនាទីចុងក្រោយទៅវិញ។ គេអាចនិយាយបានថា ទង្វើរបស់ក្រុមប្រឆាំងរបៀបនេះជារឿងដែលលោកប្រេសិតពិសេសរបស់អង្គការសហប្រជាជាតិសម្រាប់ស៊ីរីមិនបានរង់ចាំទេ តែទន្ទឹមគ្នានេះ លោកក៏មិនសូវជាបារម្ភប៉ុន្មានដែរ ព្រោះដំណើរការនៃកិច្ចចរចានឹងមានរយៈពេល ៦ខែ។ ចំណែកឧត្តមក្រុមប្រឹក្សាដើម្បីកិច្ចចរចាក៏មិនបានបដិសេធយ៉ាងដាច់អហង្ការដែរ គ្រាន់តែថា ពួកគេបានទាមទារឲ្យបំពេញលក្ខខណ្ឌមួយចំនួនជាមុនសិន។
ដូច្នេះឃើញថា ការខ្វែងគំនិតគ្នាបានផ្តោតសំខាន់លើរបៀបវារៈនៃកិច្ចចរចា។ សម្រាប់លោកស្តាហ្វាន មីស្ទូរ៉ា អ្វីដែលសំខាន់ពេលនេះ គឺបើកទ្វារកិច្ចចរចាដោយលោកមិនចង់លើកពេលទៅថ្ងៃក្រោយទៀតទេ។ លោកស្តាហ្វានយល់ឃើញថា ការអូសបន្លាយនឹងរឹតតែធ្វើឲ្យស្ថានការណ៍ដុនដាបកាន់តែខ្លាំង។
ដំណោះស្រាយតាមផ្លូវនយោបាយជាជម្រើសអាទិភាព
នៅក្នុងកាលៈទេសៈសព្វថ្ងៃ ដំណោះស្រាយឲ្យវិបត្តិស៊ីរីតាមផ្លូវនយោបាយត្រូវបានមើលឃើញថា គឺជម្រើសអាទិភាពតែមួយគត់។ គួរជម្រាបជូនថា តំាងពីវិបត្តិស៊ីរីបានផ្ទុះឡើងក្នុងខែមីនា ឆ្នាំ ២០១១ មក អាមេរិក និងបារាំងធ្លាប់បានគិតគូរចង់ប្រើកម្លាំងវាយរំលំរបបរបស់លោកប្រធានាធិបតីស៊ីរីអាសាដ។ អាមេរិក និងបារំាងយល់ឃើញថា ការប្រើវេទិកាអន្តរជាតិដើម្បីទម្លាក់លោកអាសាដ គឺជារឿងមួយមិនអាចទៅរួចទេ ព្រោះមានចិន និងរុស្ស៊ីជួយការពារ។ តែទីបំផុតលោកប្រធានាធិបតីអាមេរិកអូបាម៉ាបានសម្រេចផ្អាកទៅវិញ។
អវត្តមានអន្តរាគមន៍អន្តរជាតិតាមផ្លូវយោធាទម្លាក់លោកអាសាដ គឺជារឿងដែលគ្រប់គ្នាចាត់ទុកជាជម្រើសដ៏ល្អមួយ។ បើមិនដូច្នោះទេ ស្ថានការណ៍នៅស៊ីរីនឹងធ្លាក់ដុនដាបពិបាកគ្រប់គ្រងនៅចំពោះមុខកំណើនឥទ្ធិពលរបស់អង្គការរដ្ឋអ៊ីស្លាម។ ចូរកុំភ្លេចថា របបលោកអាសាដសព្វថ្ងៃក៏បានចូលរួមប្រយុទ្ធប្រឆាំងនឹងពួកជីហាតអង្គការរដ្ឋអ៊ីស្លាមដែរ។ ដូច្នេះ គឺមានតែតាមផ្លូវចរចាដោយមានការចូលរួមពីគ្រប់ភាគីជម្លោះផ្ទៃក្នុងទំាងអស់ទេដែលអាចបញ្ចប់វិបត្តិនៅស៊ីរីបាន។ អ្វីដែលសហគមន៍អន្តរជាតិចង់បានពេលនេះ គឺបង្កើតរដ្ឋាភិបាលអន្តរកាលមួយដោយមានវត្តមានភាគីជម្លោះទំាងអស់។
ជាការពិត ក្រោមភ្នែក ច្រមុះរបស់ក្រុមប្រឆាំងស៊ីរី ក៏ដូចជាប្រទេសលោកខាងលិចមួយចំនួន បុគ្គលលោកប្រធានាធិបតីស៊ីរីអាសាដនៅបន្តចោទជាបញ្ហាដដែល។ តែនៅក្នុងកាលៈទេសៈសព្វថ្ងៃ ពិសេសប្រឈមនឹងការគំរាមកំហែងរបស់អង្គការរដ្ឋអ៊ីស្លាម លោកអាសាដមិនមែនជាផ្ទាំងស៊ីបអាទិភាពទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ