គ្មានហេតុផលណាមួយដែលអាមេរិកត្រូវផ្តាច់ជំនួយឲ្យកងទ័ពអេហ្ស៊ីប !
ចុះផ្សាយនៅថ្ងៃ៖
ស្តាប់ - ០៥:៥១
តំាងពីក្រោយរដ្ឋប្រហារយោធាទម្លាក់លោកប្រធានាធិបតីអេហ្ស៊ីបមហាម៉ាត់ ម៉រស៊ី និងក្រោយព្រឹត្តិការណ៍វាយបង្រ្កាបយ៉ាងហិង្សាលើក្រុមសកម្មជនអ្នកគំាទ្រលោកម៉រស៊ីដែលបានបណ្តាលឲ្យមានមនុស្សស្លាប់ជាង ៩០០នាក់មក សហភាពអឺរ៉ុប និងអាមេរិកបានចាប់ផ្តើមពិចារណាលើជំនួយសេដ្ឋកិច្ច និងយោធារបស់ខ្លួនចំពោះប្រទេសអេហ្ស៊ីប។ នៅថ្ងៃពុធ ទី២១ សីហានេះ រដ្ឋមន្រ្តីការបរទេសអឺរ៉ុបបើកសម័យប្រជុំវិសាមញ្ញមួយក្នុងទីក្រុងព្រុចសែល។ ចំណែកអាមេរិកបានព្រមានព្យួរជំនួយយោធារបស់ខ្លួនចំពោះយោធាអេហ្ស៊ីប។ តែរដ្ឋាភិបាលអេហ្ស៊ីបមិនបារម្ភ និងថា អត់ពីអាមេរិកទៅ ក៏ខ្លួនមិនស្លាប់ដែរ។
វិធានការដែលសហភាពអឺរ៉ុបលើកយកទៅជជែកអាចមានពីរយ៉ាង ទីមួយ បញ្ឈប់ ឬមួយក៏ព្យួរចោលមួយរយៈនូវជំនួយហិរញ្ញវត្ថុមួយភាគរបស់ខ្លួនចំពោះអេហ្ស៊ីប និងទីពីរ ពិនិត្យមើលឡើងវិញនូវកិច្ចព្រមព្រៀងដែលសហភាពអឺរ៉ុប និងអេហ្ស៊ីបបានចុះហត្ថលខារវាងគ្នាលើផ្នែកសន្តិសុខ និងការពារ។ តែប្រភពការទូតបានបញ្ជាក់ថា សហភាពអឺរ៉ុបព្យាយាមចៀសវាងមិននិយាយដល់ការដាក់ទ័ណ្ឌកម្ម ដូចដែលអឺរ៉ុបបានធ្វើចំពោះប្រទេសអ៊ីរ៉ង់ ឬមួយក៏កូរ៉េខាងជើងទាក់ទងនឹងសំណុំរឿងនុយក្លេអ៊ែរទេ។
នៅពេលនេះ អឺរ៉ុបហាក់ដូចនៅមិនទាន់បានឯកភាពគ្នាលើវិធានការរួមលើប្រទេសអេហ្ស៊ីបទេ។ ប្រទេសខ្លះយល់ថា អឺរ៉ុបគួរតែកាត់បន្ថយ ឬមួយក៏បញ្ជូនជំនួយរបស់ខ្លួនតក់ៗ ដោយផ្អែកលើស្ថានការណ៍វិវត្តជាក់ស្តែង។ សម្រាប់ប្រទេសខ្លះទៀតយល់ឃើញថា គេត្រូវតែចាត់វិធានការតឹងតែងពីដំបូងដើម្បីដាក់គំនាបលើរដ្ឋអំណាចអេហ្ស៊ីបបច្ចុប្បន្នឲ្យគោរពនូវនីតិរដ្ឋ និងឆន្ទៈរបស់ប្រជាជនអេហ្ស៊ីបភាគច្រើនដែលចង់បានស្ថិរភាព និងសន្តិភាពនៅក្នុងប្រទេស។
យ៉ាងណាក៏ដោយ នៅចំពោះមុខ អឺរ៉ុបហាក់ដូចជាបាននឹងកំពុងព្យាយាមដើរតួនាទីជាអ្នកសម្រុះសម្រួលរវាងភាគីជម្លោះអេហ្ស៊ីប គឺកងទ័ព និងក្រុមភាតរអ៊ីស្លាម។
គួរបញ្ជាក់ជូនថា សហភាពអឺរ៉ុប ជាគឺអ្នកផ្តល់ជំនួយមួយយ៉ាងសំខាន់ និងក៏ជាដៃគូពាណិជ្ជកម្មទីមួយរបស់ប្រទេសអេហ្ស៊ីប។ ក្នុងខែវិច្ឆិកា ឆ្នំា ២០១២ អឺរ៉ុបបានប្រកាសពីគម្រោងកម្មវិធីជំនួយជួយលើកតម្កើងជីវភាពរស់នៅរបស់ប្រជាជនអេហ្ស៊ីបដែលមានទឹកប្រាក់សរុប ៥ ០០០លានអឺរ៉ូសម្រាប់កម្មវិធីឆ្នំា ២០១២-២០១៤។ នៅក្នុងជំនួយលើវិស័យយោធាវិញ គឺមិនសូវច្រើនដូចអាមេរិកទេ គឺមានប្រមាណតែ ១៤០លានអឺរ៉ូប៉ុណ្ណោះ រីឯអាមេរិកបានផ្តល់ទៅឲ្យទាហានអេហ្ស៊ីបក្នុងមួយឆ្នំាៗរហូតដល់ទៅ ១ ៣០០លានដុល្លារ។
ជំនួយអាមេរិកចំពោះអេហ្ស៊ីប ជា« ប្រាក់ឧបត្ថម្ភដើម្បីសន្តិភាព » រវាងអ៊ីស្រាអែល និងអេហ្ស៊ីប
ជំនួយអាមរិកចំពោះអេហ្ស៊ីបបានចាប់ផ្តើមកាលពី ៣៥ឆ្នំាមុន ពោលគឺក្នុងសម័យកិច្ចព្រមព្រៀងសន្តិភាពរវាងរវាងអ៊ីស្រាអែល និងអេហ្ស៊ីបដែលចុះហត្ថលេខាដោយលោកប្រធានាធិបតីអេហ្ស៊ីប Anouar el-Sadate និងលោកនាយករដ្ឋមន្រ្តីអ៊ីស្រាអែល Menahem Begin កាលពីឆ្នំា ១៩៧៩ នៅ Camp David ក្នុងទឹកដីអាមេរិកំាង ក្រោមអធិបតីភាពរបស់លោកប្រធានាធិបតីអាមរិក Jimmy Carter នាសម័យនោះ។ ជាថ្នូរនឹងកិច្ចព្រមព្រៀងសន្តិភាពរវាងអ៊ីស្រាអែល និងអេហ្ស៊ីបសម័យនោះ អាមេរិកបានសន្យាផ្តល់ជំនួយឲ្យយោធាអេហ្ស៊ីបក្នុងមួយឆ្នំាៗចំនួន ១ ៣០០លានដុល្លារ។ ជាទូទៅ គេច្រើនហៅជំនួយអាមេរិកចំពោះកងទ័ពអេហ្ស៊ីប ថាជាប្រាក់ឧបត្ថម្ភដើម្បីសន្តិភាពរវាងអ៊ីស្រាអែល និងអេហ្ស៊ីប ក៏ដូចជាអ៊ីស្រាអែលជាមួយបណ្តាប្រទេសអារ៉ាប់មួយចំនួនក្នុងតំបន់។ គួរបញ្ជាក់ថា គឺដោយសារតែការធ្វើសម្បទានសនិ្តភាពជាមួយអ៊ីស្រាអែលនាពេលនោះឯង ដែលបានធ្វើឲ្យលោកប្រធានាធិបតីអេហ្ស៊ីប Anouar el-Sadate ទទួលការធ្វើឃាតនៅប៉ុន្មានឆ្នំា ក្រោយមក។ ម្យ៉ាងទៀត ជំនួយយ៉ាងសម្បើមរបស់អាមេរិកនៅក្នុងប្រទេសអារ៉ាប់មួយនេះបានអនុញ្ញាតឲ្យអាមរិករក្សា និងអាចបន្តរក្សាឥទ្ធិពលរបស់ខ្លួននៅក្នុងតំបន់ មានទំាងឥទ្ធិពលនយោបាយ សេដ្ឋកិច្ច និងយោធា។
គ្មានហេតុផលណាមួយដែលអាមេរិកត្រូវផ្តាច់ជំនួយឲ្យកងទ័ពអេហ្ស៊ីប !
ប្រសិនបើអាមេរិកផ្តាច់ ឬមួយក៏ព្យួរជំនួយរបស់ខ្លួនចំពោះអេហ្ស៊ីបនឹងធ្វើឲ្យអាមេរិកខាតបង់ធំ។ ចូរកុំភ្លេចថា អេហ្ស៊ីបគឺជាប្រទេសដែលមានចំនួនប្រជាជនច្រើនជាងគេនៅក្នុងពិភពអារ៉ាប់។ ដូច្នេះ ការសម្រេចបិទ ឬមួយក៏ព្យួរចោលជំនួយរបស់ខ្លួននឹងធ្វើឲ្យអាមរិកបាត់បង់ឥទ្ធិពលនៅក្នុងតំបន់ដែលខ្លួនបានថែរក្សាតំាងពី ៣៥ឆ្នំាកន្លងទៅ។
ពិតណាស់ថា រដ្ឋបាលរបស់លោកអូបាម៉ាអាចប្រើវិធានការគាបសង្កត់លើរដ្ឋអំណាចអេហ្ស៊ីបសព្វថ្ងៃ ដោយគំរាមបិទក្បាលរ៉ូប៊ីណេជំនួយចំពោះអេហ្ស៊ីប។ តែអ្វីដែលអាមេរិកគួរតែពិចារណាឲ្យបានជ្រៅជ្រះបន្តិចនោះគឺថា អត់ពីខ្លួនទៅ ក៏អេហ្ស៊ីបមិនស្លាប់ដែរ។ មានប្រទេសជាច្រើន ពិសេសបណ្តាប្រទេសក្នុងពិភពអារ៉ាប់ដូចគ្នាបានផ្តល់ និងកំពុងផ្តល់ជំនួយឲ្យអេហ្ស៊ីបក្នុងទឹកប្រាក់យ៉ាងច្រើន គឺច្រើនជាងអាមរិកផ្តល់ឲ្យទៅទៀត។ ជាក់ស្តែង នៅក្រោយថ្ងៃរដ្ឋប្រហារទម្លាក់លោកម៉រស៊ី ប្រទេសអារ៉ាប៊ីសាអូឌីតបានផ្តល់ជាង ៧ ០០០លានដុល្លារ អេមីរ៉ាតអារ៉ាប់រួមចំនួនជាង ៤ ០០០លានដុល្លារ និងប្រទេសកាតារបានផ្តល់ចំនួន ១ ០០០លានដុល្លារ តំាងពីមុនថ្ងៃរដ្ឋប្រហារ។
គិតជាសរុបទៅ ជំនួយថ្មីៗតែ៣ប្រទេសនេះ គឺស្មើនឹងជំនួយរបស់អាមរិកក្នុងរយៈពេល ១០ឆ្នំា។ ក្រៅពីប្រទេសក្នុងពិភពអារ៉ាប់ ក៏នៅមានអ្នកចង់ដណ្តើមឥទ្ធិពលពីអាមេរិកដែរ រួមមាន ចិន និងរុស្ស៊ីជាដើម។ ទីក្រុងប៉េកំាង និងម៉ូស្គូដែលបាននិងកំពុងដើរផ្លូវកណ្តាល តាមរយៈការស្រែកកុំឲ្យមានការលូកដៃចូលជ្រៀតជ្រែកកិច្ចការផ្ទៃក្នុងរបស់អេហ្ស៊ីប។
ដូច្នេះ វាពិតជាគ្មានហេតុផលណាមួយដែលអាមរិកត្រូវបិទក្បាលរ៉ូប៊ីណេជំនួយចំពោះអេហ្ស៊ីបទេ។ ផ្ទុយទៅវិញ អាមេរិកគួរតែពង្រឹងបន្ថែមនូវឥទ្ធិពលរបស់ខ្លួន ព្រោះថា នៅពេលដែលឥទ្ធិពលនេះបែរជាធ្លាក់ទៅក្នុងកណ្តាប់ដៃអ្នកផ្សេង ពិសេសក្នុងប្រទេសអារ៉ាប់ដែលជាអ្នកប្រឆំាងអាមរិក និងអ៊ីស្រាអែល គឺតំបន់ដើមបូព៌ាទំាងមូលតែម្តងដែលនឹងប្រឈមគ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ