លោកម៉ាក្រុង៖ បារាំងចង់បានកិច្ចសន្យាសកលមួយ ដើម្បីការពារប្រយោជន៍រួម របស់មនុស្សជាតិ
ដូចការគ្រោងទុក កាលពីល្ងាចថ្ងៃពុធទី ២៤មករា លោកប្រធានាធិបតីបារាំង អេម៉ានុយអែល ម៉ាក្រុង បានថ្លែងសន្ទរកថា ចំពោះមុខអង្គមហាសន្និបាទ នៃវេទិកាសេដ្ឋកិច្ចពិភពលោក ក្រុងដាវ៉ូ ប្រទេសស្វីស។ ក្នុងសន្ទរកថា ដែលគេរំពឹងរងចាំស្តាប់នោះ លោកប្រធានាធិបតីបារាំង បានលើកឡើងថា បារាំងត្រលប់មកវិញហើយ ត្រលប់មកជាមួយនឹងគំនិតថ្មី ដែលចង់ឃើញពិភពលោកយើង ចាប់ដៃគ្នា ទទួលខុសត្រូវរួមគ្នា ដើម្បីការពារ នូវអ្វីដែលជាផលប្រយោជន៍រួម របស់មនុស្សជាតិ គឺសុខភាព ការអប់រំ សន្តិភាព និងបរិស្ថានធម្មជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ក្នុងសន្ទរកថាជាភាសាបារាំងផង ជាភាសាអង់គ្លេសផង នៅចំពោះមុខថ្នាក់ដឹកនាំប្រទេស និងថ្នាក់ដឹកនាំក្រុមហ៊ុន ប្រមាណជា១៦០០នាក់ លោក ម៉ាក្រុង បានលើកឡើងជាដំបូង នូវលទ្ធផលវិជ្ជមាន នៃកំណែទម្រង់សេដ្ឋកិច្ច និងទីផ្សារការងាររបស់បារាំង។ ដោយសារតែក្រុមហ៊ុនធំៗរបស់បារាំង មានចំណែកយ៉ាងធំ ក្នុងកម្លាំងសេដ្ឋកិច្ចសកលលោកទាំងមូល ដូច្នេះកំណែទម្រង់ទាំងនោះ នឹងផ្តល់សន្ទុះដល់សេដ្ឋកិច្ចសកលដែរ។ « France is back » បារាំង ត្រលប់មកវិញហើយ ! នេះជាឃ្លា ដែលលោកម៉ាក្រុង បានបន្លឺឡើង ក្រោមសំឡេងទះដៃកងរំពង។
បន្តមកទៀត លោកម៉ាក្រុង បានលើកឡើងអំពីរបាយការណ៍របស់អង្គការ Oxfarm ដែលរបាយការណ៍នេះ បានទាញសញ្ញាអាសន្ន អំពីគំលាតរវាងអ្នកមាន និងអ្នកក្រ ដែលមានកាន់តែខ្លាំងទៅៗ។ លោកម៉ាក្រុង និយាយថា កំណើនសេដ្ឋកិច្ច មិនមែនជាកម្មវត្ថុចុងក្រោយនោះទេ។ វាគ្រាន់តែជាមធ្យោបាយតែប៉ុណ្ណោះ។ កំណើនសេដ្ឋកិច្ច ជាមធ្យោបាយឲ្យប្រជាជនងើបផុតពីភាពក្រីក្រ ទទួលបានការអប់រំល្អ ទទួលបានសន្តិសុខ និងទទួលបានការគាំព៌ាល្អ ក្នុងវិស័យសុខាភិបាល។ ទាំងនេះ ទើបជាកម្មវត្ថុចុងក្រោយ ដែលថ្នាក់ដឹកនាំទាំងអស់ចង់បាន។
សំដីខាងលើនេះ គឺលោកម៉ាក្រុង ចង់សំដៅទៅដល់មនុស្សប្រមាណជា១%នៃភពផែនដីយើង ដែលមានទ្រព្យ មានធនធានមហាសាល ក៏ប៉ុន្តែគិតចង់តែពីបោះទុនរកស៊ីកើបចំណេញ ដោយមិនខ្វល់ពីអ្នកក្រីក្រ។ លោកម៉ាក្រុង ក៏បានឆ្លៀតនិយាយបញ្ឆិតបញ្ឆៀង ទៅឲ្យក្រុមហ៊ុនមួយចំនួន ដែលបោះទុនវិនិយោគ គឺដើម្បីដែលកើបប្រមូលផល បូមកកាយធនធានធម្មជាតិជាដើម ពេលដែលកកាយអស់ហើយ វិចបង្វិចរត់ទៅកន្លែងមួយទៀត ទុកឲ្យប្រជាជនម្ចាស់ស្រុក រស់រងទុក្ខ ដោយមិនបានទទួលផល។
ដើម្បីទប់ស្កាត់បញ្ហាទាំងអស់នេះ លោកម៉ាក្រុង បានលើកឡើងថា ពិភពលោកយើង ត្រូវតែចាប់ដៃគ្នា ធ្វើកិច្ចសន្យាសកល រួមគ្នាមួយ រវាងរដ្ឋាភិបាល និងក្រុមហ៊ុនទាំងអស់។ កិច្ចសន្យាសកលនេះ ត្រូវតែផ្តល់អទិភាព ដើម្បីការពារទ្រព្យសម្បត្តិរួម ផលប្រយោជន៍រួម របស់មនុស្សជាតិយើង។ ផលប្រយោជន៍រួមនោះ គឺគ្មានអ្វីក្រៅពី ប្រព័ន្ធអប់រំ ប្រព័ន្ធសុខាភិបាល ការការពារធនធានធម្មជាតិ បរិស្ថាននោះទេ។ លោកបន្ថែមថា ម្នាក់ៗ ទាំងរដ្ឋ ទាំងឯកជន ត្រូវប្រឹងប្រែងរៀងៗខ្លួន ធ្វើយ៉ាងណា ឲ្យកំណើនសេដ្ខកិច្ច ក្លាយជាកំណើនជីវភាព កំណើនចំណេះដឹង និងសុខមាលភាព របស់ប្រជាជនទាំងអស់គ្នា។
ជាចុងក្រោយ លោកម៉ាក្រុង ក៏បានឆ្លៀត និយាយដាក់កំហិត ឲ្យក្រុមហ៊ុនអន្តរជាតិធំៗទាំងអស់ ឲ្យគោរពច្បាប់វិន័យ វិធានពន្ធដានៅតាមប្រទេសដែលខ្លួនរកស៊ី មិនត្រូវកិបកេង លួចបន្លំ គេចពន្ធនោះឡើយ។ លោកម៉ាក្រុងសន្យាថា ការប្រយុទ្ធប្រឆាំង និងការគេចវេសមិនបង់ពន្ធ គឺជាអាទិភាព របស់រដ្ឋាភិបាលបារាំង ក៏ដូចជារបស់សហភាពអឺរ៉ុបទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ