បារាំងឈឺក្បាល ថាតើត្រូវយកពួកជីហាតជនជាតិបារាំង ពីស៊ីរីចូលស្រុកវិញ ឬយ៉ាងណា?
ចុះផ្សាយនៅថ្ងៃ៖
ស្តាប់ - ០៤:៥៦
តើត្រូវសម្រេចយ៉ាងណា ទាក់ទិននឹងក្រុមជីហាតភេរវកម្មអ៊ីស្លាម ជនជាតិបារាំង ដែលកំពុងស្ថិតនៅក្នុងកណ្តាប់ដៃរបស់កងកម្លាំងគួដ ក្នុងទឹកដីស៊ីរី? កន្លងមក រដ្ឋាភិបាលបារាំង ធ្លាប់បានលើកឡើងថា ជនជីហាតបារាំង ដែលទៅធ្វើសង្រ្គាមនៅស៊ីរី និងអ៊ីរ៉ាក់ គឺនឹងត្រូវ ទទួលការកាត់ទោសនៅទីនោះ។ ក៏ប៉ុន្តែស្ថានការណ៍បានផ្លាស់ប្តូរ បន្ទាប់ពីអាមេរិក បានសម្រេចដកទ័ពចេញពីស៊ីរី ដែលធ្វើឲ្យក្រុមចលនាប្រជាធិបតេយ្យស៊ីរី និងកងកម្លាំងគួដ អាចប្រឈមនឹងគ្រោះថ្នាក់។ ពួកជីហាតជនជាតិបារាំង ដែលបច្ចុប្បន្ន ស្ថិតក្រោមការឃុំឃាំងរបស់ក្រុមទាំងនេះ អាចនឹងត្រូវរត់បែកខ្ចាត់ខ្ចាយ ហើយអាចវិលត្រលប់ចូលស្រុក បង្កគ្រោះថ្នាក់ក៏ថាបាន។
តើគួរយកជនជីហាត ដែលធ្លាប់បានធ្វើសកម្មភាពភេរវកម្មនៅបារាំង និងបានធ្វើសង្រ្គាមជ្រុលនិយម នៅស៊ីរី និងអ៊ីរ៉ាក់ ត្រលប់មកបារាំងវិញ ដែរឬទេ? តើត្រូវចំណាយប្រាក់រាប់លាន និងពេលពេលា ដើម្បីយកជនទាំងនោះ ចូលស្រុកវិញ ឬយ៉ាងណា? មតិរបស់ប្រជាជនបារាំង ភាគខ្លះ បានលើកឡើងថា មិនត្រូវយកជនជាតិបារាំង ជាជនជីហាតទាំងនោះចូលស្រុកវិញទេ ព្រោះជនទាំងនោះ បានសម្រេចចិត្តធ្វើភេរកម្មប្រឆាំងនឹងប្រទេសឯង។
បើយោងតាមប្រភពពីក្រសួងមហាផ្ទៃបារាំង បច្ចុប្បន្នមានជនជីហាត ជាជនជាតិបារាំងប្រមាណ១៣០នាក់ ដែលកំពុងជាប់ឃុំនៅស៊ីរី ក្នុងនោះជាង៥០នាក់ជាមនុស្សធំ ហើយកុមារប្រមាណ៨០នាក់។ ក្នុងចំណោមមនុស្សធំ មានភាគច្រើនជាភេទស្រី ហើយដែលក្នុងចំណោមស្រ្តីទាំងនោះ មានអ្នកខ្លះគឺជាភេរវជនជីហាត ដ៏សកម្មទៀតផង។ ជនទាំងនេះ បច្ចុប្បន្នកំពុងជាប់ឃុំ នៅតាមទីតាំងផ្សេងៗគ្នា នៅតំបន់ភាគឥសាន្តស៊ីរី ដែលជាតំបន់រំដោះ ស្ថិតក្រោមការកាន់កាប់របស់ក្រុមគួដ និងកងកម្លាំងប្រជាធិបតេយ្យស៊ីរី។ យោងតាមប្រភពច្បាស់ការដដែល ក្រៅពីជនជនជាតិបារាំង ដែលជាប់ឃុំទាំងនេះ គឺនៅមានជនជីហាតជនជាតិបារាំង ប្រមាណ២៥០នាក់ផ្សេងទៀត ដែលកំពុងសំងំនៅរាយប៉ាយ ក្នុងតំបន់Idlib និងតំបន់Hajine។
កន្លងមករដ្ឋាភិបាលបារាំង ធ្លាប់បានប្រកាន់ជំហរថា ជនជីហាតជនជាតិបារាំង ដែលត្រូវគេចាប់ខ្លួនបាននៅស៊ីរី និងនៅអ៊ីរ៉ាក់ នឹងត្រូវទុកឲ្យប្រឈមមុខ នឹងការជំនុំជំរះនៅទីនោះ។ លើកលែងតែកុមារ ដែលជាកូនៗរបស់ជនជីហាតទាំងនោះ ដែលរដ្ឋាភិបាលបារាំង អាចនឹងពិនិត្យករណីម្តងមួយៗ ដើម្បយកត្រលប់មកវិញ។ ជម្រើសនេះ ធ្លាប់ត្រូវបានមតិខ្លះរិះគន់ផងដែរ ថាវាអាចផ្ទុយពីសន្ធិសញ្ញាអន្តរជាតិ ចំពោះការដែលបំបែកក្មេង ចេញពីឪពុកម្តាយ។ ហើយមួយវិញទៀត ស្ថាប័នយុត្តិធម៌ នៅស៊ីរី និងនៅអ៊ីរ៉ាក់ ស្ថិតក្នុងភាពទន់ជ្រាយណាស់ មិនអាចកាត់ទោសជនទាំងនោះ តាមផ្លូវយុត្តិធម៌ត្រឹមត្រូវបានទេ។
គួរកត់សំគាល់ថា រដ្ឋាភិបាលបារាំងហាក់ចាប់ផ្តើម យកជម្រើសទាំងអស់ មកពិចារណាឡើងវិញ គឺនៅពេលដែលលោកដូណាល់ ត្រាំបានសម្រេច នៅចុងខែធ្នូ ថាដកទ័ពអាមេរិក ចេញពីស៊ីរី។ ការដកទ័ពអាមេរិកនេះ ត្រូវបានក្រុមអ្នកវិភាគយុទ្ធសាស្ត្ររំពឹងថា នឹងធ្វើឲ្យក្រុមគួដ និងកងកម្លាំងប្រជាធិបតេយ្យស៊ីរី អស់បង្អែក ហើយប្រឈមនឹងគ្រោះថ្នាក់ខ្ពស់។ កងទ័ពរដ្ឋាភិបាលបាឆា អាល់អាសាដ ក៏ដូចជាកងទ័ពតួកគី កំពុងរងចាំឱកាសនេះ ដើម្បីវាយដណ្តើមតំបន់កាន់កាប់របស់ពួកគេ។ បើក្រុមគួដ និងកងកម្លាំងប្រជាធិបតេយ្យស៊ីរី បាក់ទ័ពរត់ប្រសេកប្រសាច នោះមានន័យថា ក្រុមជីហាតជនជាតិបារាំង ដែលស្ថិតក្នុងការឃុំឃាំងរបស់ពួកគេ ពិតជាអាចរបូត ហើយរត់គេចខ្លួនទៅកន្លែងផ្សេង។
កាលពីថ្ងៃទី២៩មករា លោករដ្ឋមន្ត្រីក្រសួងការបរទេសបារាំង បានបើកការពិចារណាជាផ្លូវការ ស្តីពីរៀបចំ យកជនជីហាតទាំងនោះត្រលប់មកបារាំងវិញ។ លោករដ្ឋមន្ត្រីលើកឡើងថា ដោយយោងទៅលើស្ថានការណ៍ដែលអាចនឹងចលាចល នៅស៊ីរី បារាំងកំពុងពិចារណា គ្រប់ជំរើសទាំងអស់ ដើម្បីចៀសវាងកុំឲ្យជនជីហាតដ៏គ្រោះថ្នាក់ទាំងនោះ របូតរួចខ្លួនទៅបាន។ គ្រោះថ្នាក់មួយទៀតនោះ គឺជនជីហាតបារាំងទាំងនោះ អាចរត់ឆ្លងទៅតួកគី ហើយអាចបន្លំខ្លួន ត្រលប់មកធ្វើសកម្មភាពនៅបារាំងវិញ។
ជាការពិត បើតាមប្រភពស្និទនឹងរដ្ឋាភិបាល បានលើកឡើងថា មន្ត្រីជំនាញពាក់ព័ន្ធ បានប្រជុំគ្នា រកមធ្យោបាយ ជាច្រើនសប្តាហ៍មកហើយ ដែលក្នុងនោះគឺមានជម្រើស ដែលយកជនជីហាតទាំងនោះ មកបារាំង ដើម្បីទទួលការជំនុំជំរះ ហើយយកទៅដាក់ឃុំ។ ក៏ប៉ុន្តែមន្ត្រីការទូតបារាំងដដែល បានអះអាងថា មកទល់ពេលនេះ គេនៅពុំទាន់បានសម្រេច ថាយកដំណោះស្រាយមួយណានៅឡើយទេ។
គិតមកត្រឹមពេលនេះ បារាំងគ្រាន់តែបានសម្រេច បញ្ជូនមកបារាំងវិញ នូវកុមារដែលគ្មានអាណាព្យាបាល ឬកំព្រាឪពុកម្តាយ។ តែយ៉ាងណាក៏ដោយ ប្រភពពីក្រសួងការបរទេសបារាំងដដែល អះអាងថា ការរំដោះមនុស្ស មិនថាក្មេង ឬមនុស្សចាស់ ចេញពីតំបន់ភាគខាងជើងស៊ីរី យកមកបារាំងវិញ គឺមិនមែនជារឿងដែលងាយធ្វើនោះទេ។
ក្រសួងមហាផ្ទៃ ក្រសួងការបរទេស និងក្រសួងយុត្តិធម៌បារាំង បានប្រជុំគ្នាជាច្រើនលើកមកហើយ ដើម្បីពិភាក្សាផ្នែកច្បាប់ ទាក់ទិននឹងការឃុំខ្លួន ក្នុងករណីដែលជនជីហាតទាំងនោះ ត្រូវបានបញ្ជូនមកដល់ទឹកដីបារាំងវិញ។ លោករដ្ឋមន្ត្រីក្រសួងមហាផ្ទៃបារាំង បានអះអាង កាលពីថ្ងៃទី២៩មករាថា ជនជីហាតទាំងនោះ បើសិនជាត្រូវបញ្ជូនខ្លួនមកដល់បារាំងវិញ និងត្រូវរុញបញ្ចូលគុកទាំងអស់។
ក៏ប៉ុន្តែ ទោះយ៉ាងនេះក្តី អ្នកវិភាគខ្លះ បានលើកឡើងថា មានករណីជនជីហាតខ្លះ ដែលការជុំនំជំរះ កាត់ទោស ហើយឈានទៅឃុំខ្លួន អាចនឹងជួបឧបសគ្គច្រើន ដោយសារតែ ពុំមានភស្តុតាងគ្រាប់គ្រាន់។ តើបារាំង ត្រូវធ្វើយ៉ាងណា? បើមិនចាប់បញ្ជូនមកវិញ ក៏លំបាក ព្រោះជនទាំងនោះ អាចរបូតរួចខ្លួន ហើយអាចបង្កគ្រោះថ្នាក់ ទៅថ្ងៃមុខ។ តែបើចាប់មកហើយ ក៏លំបាក ព្រោះបារាំងជាប្រទេសគោរពសិទ្ធិមនុស្ស ហើយដែលមិនអាចចេះតែឃុំខ្លួនមនុស្ស ទទេៗបែបនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ