បារាំងបើកយុទ្ធនាការថ្នាក់ជាតិ ដើម្បីប្រយុទ្ធប្រឆាំងនឹងអំពើហិង្សាក្នុងគ្រួសារ
ចាប់ពីថ្ងៃទី៣កញ្ញ រដ្ឋាភិបាលបារាំង បានផ្តើមបើកយុទ្ធនាការថ្នាក់ជាតិ ដើម្បីប្រយុទ្ធប្រឆាំង នឹងអំពើហិង្សាក្នុងគ្រួសារ។ អំពើហិង្សា ដែលហាក់បានកើនឡើងខ្លាំង ដោយគិតចាប់ពីដើមឆ្នាំ២០១៩នេះ គឺមានស្ត្រីប្រមាណ១០០នាក់ ដែលបានរងគ្រោះស្លាប់បាត់បង់ជីវិត។ យុទ្ធនាការនេះ ដឹកនាំដោយមន្ត្រីជំនាញរបស់រដ្ឋាភិបាលបារាំង ព្រមទាំងអង្គការសមាគម តំណាងសមត្ថកិច្ចនគរបាល មេធាវី ចៅក្រមផងដែរ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ក្រោមធិបតីភាព លោក Edouard Philippe នាយករដ្ឋមន្ត្រីបារាំង យុទ្ធនាការថ្នាក់ជាតិដើម្បីប្រយុទ្ធប្រឆាំងនឹងអំពើហិង្សាក្នុងគ្រួសារ បានចាប់ផ្តើមបើកទ្វារពិភាក្សាគ្នា។ ក្នុងចំណោមភ្ញៀវចូលរួមប្រមាណ៨០នាក់ ក្នុងនោះមានរដ្ឋមន្ត្រីបារាំង នៃក្រសួងពាក់ព័ន្ធ តំណាងអង្គការសមាគម តំណាងនគរបាល មេធាវី ចៅក្រម នឹងតំណាងជនរងគ្រោះដោយអំពើហិង្សាក្នុងគ្រួសារ។ ភាគីទាំងអស់ និងធ្វើការពិភាក្សាគ្នា លើប្រធានបទធំៗ ទាក់ទិននឹងការទប់ស្កាត់អំពើហិង្សា ការការពារនិងទំនុកបម្រុងជនរងគ្រោះ និងការផ្តន្ទាទោសលើជនបង្កអំពើហិង្សាក្នុងគ្រួសារ។
តំណាងខុទ្ទកាល័យ លោកនាយករដ្ឋមន្ត្រីបារាំអ បានអះអាងថា អ្វីដែលរដ្ឋាភិបាលចង់បាន គឺការជជែក ដោះដូរយោបល់ សហការគ្នា រវាងក្រសួងពាក់ព័ន្ធ ដែលមានក្រសួងមហាផ្ទៃ ក្រសួងយុត្តិធម៌ ជាដើម។ តាមការគ្រោងទុក ក្រោយកិច្ចប្រជុំនៅថ្ងៃទី៣កញ្ញានេះ លោកនាយករដ្ឋមន្ត្រី Edouard Philippe នឹងធ្វើការប្រកាសអំពីវិធានការបន្ទាន់មួយចំនួន ដើម្បីការពារជនរងគ្រោះ ដោយអំពើហិង្សាក្នុងគ្រួសារ។ បន្ទាប់មកទៀត វិធានការស៊ីជំរៅ ភាគីពាក់ព័ន្ធនឹងធ្វើការរួមគ្នា ដើម្បីកំណត់។
ក្រុមសមាគមការពារស្ត្រីរងគ្រោះ បានលើកឡើងថា ពួកគេសង្ឃឹមថាក្រោយបិទបញ្ចប់យុទ្ធនាការនេះ រដ្ឋាភិបាល និងដាក់ចុះនូវផែនការជាក់ច្បាស់មួយ អមដោយទឹកប្រាក់ចាំបាច់ យ៉ាងហោច៥០០លានអឺរ៉ូ។ ដោយឡែក កាលពីសប្តាហ៍មុន លោកស្រីMarlène Schiappa រដ្ឋលេខាទទួលបន្ទុកសមភាពស្ត្រី-បុរស បានបញ្ជាក់ថា រដ្ឋាភិបាលបានសម្រេចផ្តល់កញ្ចប់ប្រាប់១លានអឺរ៉ូ ដើម្បីប្រយុទ្ធប្រឆាំងនឹងអំពើមនុស្សឃាតលើស្ត្រីភេទ។ តែយ៉ាងណា ទឹកប្រាក់នេះ ត្រូវបានអង្គការ សមាគម លើកឡើងថាមិនគ្រប់គ្រាន់ទេ។
លោកស្រី Anne-Cécile Mailfert តំណាងមូលនិធីដើម្បីស្ត្រី បានលើកឡើងថា អ្វីដែលសង្គមស៊ីវីល ចង់បាននាពេលនេះ គឺរដ្ឋាភិបាល ត្រូវបង្កើតឲ្យមានទីកន្លែងស្នាក់នៅបន្ថែមទៀត យ៉ាងហោចណាស់ ២០០០កន្លែង សម្រាប់ស្ត្រីដែលគេចចេញពីអំពើហិង្សានៅក្នុងគ្រួសារ។ បន្ថែមពីនេះ រដ្ឋាភិបាលត្រូវពង្រីក ការផ្សព្វផ្សាយ ស្តីអំពីអំពើហិង្សាផ្លូវភេទ នៅតាមសាលារៀន ព្រមទាំងត្រូវបង្កើតឲ្យមាន ជំនួយប្រឹក្សាផ្នែកច្បាប់ ដាច់ដោយឡែកសម្រាប់អ្នករង។ ជាមួយគ្នានេះ អាជ្ញាធរនគរបាល ដែលទទួលពាក្យបណ្តឹង ត្រូវធ្វើការឲ្យបានម៉ដ្ឋចត់ មិនមែនបណ្តែតបណ្តោយ ធ្វើឲ្យជនរងគ្រោះមានអារម្មណ៍ថា ការដាក់ពាក្យប្តឹង ឬមិនដាក់ គឺដូចតែគ្នា ព្រោះនរគបាលមិនអើពើ។
គួរកត់សម្គាល់ថា គិតចាប់ពីដើមឆ្នាំ២០១៩នេះមក មានជនរងគ្រោះជាស្ត្រី ចំនួន១០១នាក់ បានស្លាប់ដោយអំពើហិង្សាក្នុងគ្រួសារ នៅប្រទេសបារាំង។ កាលពីឆ្នាំ២០១៨ មានករណីមនុស្សឃាតលើស្ត្រីភេទ ចំនួន១២១ករណី។ អង្គការសមាគម ធ្វើការក្នុងបញ្ហានេះ បានសង្ឃឹមថា យុទ្ធនាការនេះ នឹងមិនមែនគ្រាន់តែជាធ្វើលេងៗ ដើម្បីយកមុខរបស់រដ្ឋាភិបាលទៅចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ