បារាំង៖ ការសួរដេញដោលរវាងបេក្ខជនប្រធានាធិបតី និងការបែងចែកពេលវេលាឲ្យស្មើគ្នា លើបណ្តាញព័ត៌មាន
ចុះផ្សាយនៅថ្ងៃ៖
ស្តាប់ - ០៥:៣៣
នៅបាំងតែមួយខែទៀតប៉ុណ្ណោះ ថ្ងៃបោះឆ្នោត ជ្រើសរើសប្រធានាធិបតីបារាំង ជុំទីមួយ នឹងមកដល់។ បេក្ខជនឈរឈ្មោះទាំងអស់មាន១១រូប ដែលមកពីគណបក្ស និងចលនានយោបាយផ្សេងៗគ្នា។ កាលពីល្ងាចថ្ងៃចន្ទ ទី២០មីនា ទូរទស្សន៍ប៉ុស្តិលេខ១របស់បារាំង បានរៀបចំការជជែកដេញដោលគ្នា រវាងបេក្ខជនឈរឈ្មោះសំខាន់ៗ តែ៥រូបប៉ុណ្ណោះ ដែលការនេះ បានធ្វើឲ្យបេក្ខជនផ្សេងទៀត មានការប្រកាន់ខឹង។ មានការចោទសួរ អំពីភាពអយុត្តិធម៌ នៃការផ្តល់ឱកាស ដល់ការឃោសនា បង្ហាញពីកម្មវិធីនយោបាយ របស់បេក្ខជនឈរឈ្មោះទាំងអស់ ពីសំណាក់ បណ្តាញព័ត៌មានបារាំង។
យើងអាចចាត់ទុកថា ការឃោសនាបោះឆ្នោតប្រធានាធិបតីបារាំង ទើបតែបានចាប់ផ្តើមកាលពីយប់ថ្ងៃចន្ទ ទី២០ មីនា តាមរយៈកម្មវិធីជជែកសួរដេញដោល រវាងអ្នកនិយាយកម្មវិធីទូរទស្សន៍ពីរនាក់ និងបេក្ខជនឈរឈ្មោះ៥នាក់ ដែលស្ថានីយ៍ទូរទស្សន៍ប៉ុស្តិលេខ១ TF1 បានរៀបចំឡើង។ និយាយដូច្នេះ ព្រោះថាកន្លងមក ថ្វីបើការឃោសនាបោះឆ្នោត បានចាប់ផ្តើមមែន ក៏ប៉ុន្តែបរិយាកាសឃោសនានេះ គឺពោរពេញដោយរឿងអាស្រូវ រឿងរ៉ាវប្តឹងផ្តល់នៅតុលាការ របស់បេក្ខជនមួយចំនួន ដែលមិនអាចធ្វើឲ្យមតិសាធារណៈ អាចមានលទ្ធភាពស្វែងយល់ឲ្យបានស៊ីជំរៅ ពីកម្មវិធីនយោបាយ និងទស្សនវិស័យរបស់បេក្ខជនឈរឈ្មោះនីមួយៗ បានទេ ព្រោះរឿងអាស្រូវទាំងនោះ បានមកបំពុលឆាកនយោបាយបារាំង។
ស្ថានីយ៍ទូរទស្សន៍TF1 អញ្ជើញតែបេក្ខជនធំៗ៥រូប
ស្ថានីយ៍ទូរទស្សន៍ TF1 បានរៀបចំកម្មវិធីជជែកដេញដោល កាលពីយប់ថ្ងៃចន្ទ ដោយបានជ្រើសរើសបេក្ខជនឈរឈ្មោះប្រធានាធិបតី តែ៥រូបប៉ុណ្ណោះ។ បេក្ខជនទាំង៥រូបនោះ មានដូចជាលោក François Fillon លោកស្រី Marine le Pen លោក Emmanuel Macron លោក Jean-Luc Mélenchon និងលោក Benoit Hamon។ បេក្ខជនទាំង៥រូបនេះ ត្រូវគេស្គាល់ថា ជាបេក្ខជនសំខាន់ ដែលកំពុងមានប្រជាប្រិយភាពច្រើនជាងគេ។
ចំណែកបេក្ខជន៦រូបផ្សេងទៀត មានដូចជាលោក Philippe Poutou លោកស្រី Nathalie Arthaud លោក Nicolas Dupont-Aignan លោក François Asselineau លោក Jean Lassalle និងលោក Jacques Cheminade ដែលគេស្គាល់ថា ជាបេក្ខជនតូចៗនោះ មិនត្រូវបានស្ថានីយ៍ទូរទស្សន៍នេះ អញ្ជើញឲ្យចូលរួមទេ។
កន្លងមក ក្នុងពេលមានការឃោសនាបោះឆ្នោតម្តងៗនៅប្រទេសបារាំង គេតែងតែមានការប្រុងប្រយ័ត្នណាស់ ដោយត្រូវធ្វើយ៉ាងណា ផ្តល់ឱកាស និងពេលវេលា ឲ្យបេក្ខជននីមួយៗ អាចមានលទ្ធភាពធ្វើបទបង្ហាញពីកម្មវិធីនយោបាយរបស់ខ្លួន ឲ្យបានស្មើៗគ្នា មិនថានៅតាមស្ថាប័នព័ត៌មានរដ្ឋរឺឯកជនទេ។ ក្នុងកម្មវិធីសួរដេញដោល រវាងបេក្ខជនឈរឈ្មោះម្តងៗ គឺអ្នកគ្រប់គ្រងកម្មវិធីទូរទស្សន៍តែងតែ បែងចែកពេលវេលានិយាយ ទៅឲ្យបេក្ខជន ឲ្យស្មើគ្នា ចៀងវៀងការរិះគន់ ថាបណ្តាញព័ត៌មាន រឺស្ថានីយ៍ទូរទស្សន៍ណាមួយ លំអៀងទៅកាន់បេក្ខជនណាមួយ។
បេក្ខជនឈរឈ្មោះបោះឆ្នោត មានតំលៃ និងសិទ្ធិស្មើគ្នា
ក៏ប៉ុន្តែ ការសម្រេចរៀបចំកម្មវិធីជជែកដេញដោល របស់ទូរទស្សន៍ TF1 ដោយអញ្ជើញតែបេក្ខជនធំៗ៥រូបនេះ ត្រូវបានមតិសាធារណៈបារាំង រិះគន់ជាខ្លាំង។ ល្គិកណា បេក្ខជនឈរឈ្មោះនីមួយៗ ត្រូវបានក្រុមប្រឹក្សារដ្ឋធម្មនុញ្ញ សម្រេចទទួលស្គាល់ជាផ្លូវការថា ជាបេក្ខជនឈរហើយ នោះបេក្ខជនទាំងអស់ មិនថាមកពីបក្សណា ធំរឺតូច មានអ្នកគាំទ្រ តិចរឺច្រើន ទេ គឺត្រូវតែទទួលបាន ការផ្តល់តំលៃឲ្យស្មើៗគ្នា ពីសំណាក់បណ្តាញព័ត៌មាន វិទ្យុនិងទូរទស្សន៍។
លោក Nicolas Dupont-Aignan បេក្ខជនមួយរូប ក្នុងចំណោមបេក្ខជន៦រូប ដែលមិនត្រូវបានស្ថានីយ៍ទូរទស្សន៍ TF1 អញ្ជើញឲ្យចូលរួម កាលពីយប់ថ្ងៃចន្ទនោះ បានចេញមកតវ៉ាខ្លាំងក្លាជាងគេ។ លោកបានថ្លែងថា ស្ថានីយ៍ទូរទស្សន៍មួយនេះ គ្មានសិទ្ធិអ្វី មកសម្រេចជ្រើសរើសថា បេក្ខជនណា សំខាន់ជាងបេក្ខជនណាទេ។ ប្រជាជនបារាំងមានសិទ្ធិស្តាប់ និងស្វែងយល់ពីបេក្ខជនទាំងអស់ ដូចៗគ្នា។
លោក Nicolas Dupont-Aignan ក៏បានដាក់ពាក្យប្តឹងទៅ ក្រុមប្រឹក្សារដ្ឋ តែត្រូវបានក្រុមប្រឹក្សារដ្ឋសម្រេចថា ស្ថានីយ៍ទូរទស្សន៍ TF1 មិនបានធ្វើអ្វីឲ្យផ្ទុយនឹងគោលការណ៍សមភាពរវាងបេក្ខជនឈរឈ្មោះទេ។ បើតាមការអះអាងរបស់ស្ថានីយ៍ទូរទស្សន៍TF1 គឺថ្វីបើគេមិនបានអញ្ជើញបេក្ខជនផ្សេងទៀត ក្នុងកម្មវិធីដេញដោល កាលពីថ្ងៃចន្ទទី២០មែន តែគេបាន និងមានគម្រោងអញ្ជើញបេក្ខជនទាំងនោះ ឲ្យចូលរួមក្នុងកម្មវិធីដ៏ទៃទៀត។ ជាក់ស្តែងស្ថានីយ៍ទូរទស្សន៍នេះ បានអញ្ជើញលោក Nicolas Dupont-Aignan កាលពីថ្ងៃសៅរ៍ទី ១៨ មីនា ក្នុងកម្មវិធីព័ត៌មានពេលយប់។ ក៏ប៉ុន្តែ ដើម្បីសំដែងការមិនពេញចិត្តរបស់ខ្លួន លោក Nicolas Dupont-Aignan បានចូលរួមនិយាយតែប៉ុន្មានម៉ាត់ ហើយក៏ដើរចេញ ទាំងកណ្តាលកម្មវិធី បន្ទាប់ពីបានរិះគន់ ពីភាពលំអៀង របស់ស្ថានីយ៍ទូរទស្សន៍នេះ។
ការតទល់យោបល់រវាងបេក្ខជន ជាឱកាសឲ្យមហាជនធ្វើការប្រៀបធៀប៖
ជាការពិត វាជាការលំបាកណាស់ ក្នុងការស្វែងរកសមភាព គុណគូរឲ្យដឹងថាបេក្ខជននីមួយៗ មានពេលវេលាបច្ចេញមតិយោបល់ និយាយបង្ហាញពីកម្មវិធីនយោបាយរបស់ខ្លួន បានស្មើៗគ្នាៗនោះ។ គ្មានច្បាប់ណា កំណត់ថា ស្ថានីយ៍ទូរទស្សន៍មួយ ត្រូវតែហៅបេក្ខជនម្តង មកទាំងអស់នោះទេ។ អ្វីៗគឺវាឈរលើគោលការណ៍មនសិការួម របស់ស្ថាប័ននីមួយៗ។
ការជជែកដេញដោល តទល់យោបល់រវាងអ្នកនយោបាយ រឺបេក្ខជនឈរឈ្មោះបោះឆ្នោត គឺជាទំលាប់នៅតាមប្រទេសប្រជាធិបតេយ្យធំៗ។ យើងទទួលស្គាល់ថា កម្មវិធីជជែកដេញដោល ពីបញ្ហានយោបាយ គឺមានច្រើនរាប់មិនអស់ ជារៀងរាល់ថ្ងៃ មិនថាតាមកញ្ចក់ទូរទស្សន៍ រឺតាមវិទ្យុ។ បេក្ខជនឈរឈ្មោះ រឺវាគ្មិនជាច្រើន ត្រូវបានអញ្ញើញឲ្យចូលរួម ជាប្រចាំ ដោយអ្នករៀបចំកម្មវិធី។ ចំណុចនេះវាគ្មានបញ្ហាទេ។
ក៏ប៉ុន្តែអ្វីដែលចោទ គឺកម្មវិធីជជែកដេញដោលធម្មតា វាខុសពីកម្មវិធីជជែកតទល់យោបល់ រវាងបេក្ខជនឈរឈ្មោះ។ កម្មវិធីសួរឆ្លើយដេញដោយ រវាងបេក្ខជនឈរឈ្មោះបោះឆ្នោត គឺជាឱកាសតែមួយគត់ ដែលអាចឲ្យមហាជន មើលឃើញ ស្តាប់ឮ និងធ្វើការប្រៀបធៀប រវាងបេក្ខជននីមួយៗ។ ដូច្នេះវាចាំបាច់ណាស់ ដែលកម្មវិធីរបៀបនេះ ត្រូវតែមានការចូលរួម ពីគ្រប់បេក្ខជនទាំងអស់ ព្រមគ្នា។ ក៏ប៉ុន្តែសម្រាប់អ្នករៀបចំកម្មវិធីខ្លះ ក៏បានលើកឡើងពីការលំបាក ក្នុងការចាត់ចែងកម្មវិធីជជែកដេញដោយ រវាងបេក្ខជនទាំងអស់ព្រមគ្នា ព្រោះថាបេក្ខជនឈរឈ្មោះបោះឆ្នោតប្រធានាធិបតីបារាំងលើកនេះ មានដល់ទៅ១១នាក់ ឯណោះ។
ដោយឡែក បើតាមការគ្រោងទុក នឹងមានកម្មវិធីជជែកតទល់យោបល់រវាងបេក្ខជនទាំង១១រូប ចំនួនពីរលើក មុននឹងថ្ងៃបោះឆ្នោតជុំទីមួយមកដល់។ លើកទីមួយគឺនៅថ្ងៃទី ៤មេសា ដែលរៀបចំឡើងរួមគ្នា ដោយស្ថានីយ៍ទូទស្សន៍ BFMនិងទូរទស្សន៍ CNews ហើយមួយលើកទៀត រៀបចំដោយស្ថានីយ៍ទូរទស្សន៍រដ្ឋបារាំង ប៉ុស្តិលេខ២ (France 2) គឺនៅថ្ងៃទី២០មេសា មុនថ្ងៃបោះឆ្នោត៣ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ