ប្រទេសអឺរ៉ុប៦ ចង់ឲ្យអឺរ៉ុបបង្កើតអង្គភាពឃ្លាំមើលការលាងលុយកខ្វក់
ធនាគារ និងគ្រិះស្ថានហិរញ្ញវត្ថុធំៗនៅអឺរ៉ុប កំពុងតែរងនូវការចោទប្រកាន់ជាច្រើន ពីបទចូលរួមធ្វើសកម្មភាពលាងលុយកខ្វក់ ឬ លាងសម្អាតមូលធន ដែលមានប្រភពមិនស្របច្បាប់ ឲ្យក្លាយជាមូលធនស្របច្បាប់។ ប្រឈមនឹងបញ្ហានេះ ប្រទេសអឺរ៉ុប ចំនួន៦ បានរួមគ្នាធ្វើលិខិតចំហរមួយ អំពាវនាវឲ្យសហភាពអឺរ៉ុប បង្កើតអង្គភាពពិសេសមួយ ដែលមានតួនាទីឃ្លាំមើលគ្រិះស្ថានហិរញ្ញវត្ថុ ទាក់ទិននឹងសកម្មភាពលាងលុយកខ្វក់ទាំងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
នៅក្នុងលិខិតប្រកាសមួយ ចុះហត្ថលេខាដោយតំណាងរដ្ឋាភិបាលអាល្លឺម៉ង់ បារាំង អ៊ីតាលី អេស្ប៉ាញ ហូឡង់ និងឡេតូនី បានលើកឡើងថា សហភាពអឺរ៉ុប ត្រូវតែបង្កើត អង្គភាពពិសេសមួយ ដែលមានអំណាចកណ្តាល ក្នុងការឃ្លាំមើលរាល់សកម្មភាពលាងលុយកខ្វក់ ឬលាងមូលធនដែលមានប្រភពមិនស្របច្បាប់ នៅតាមគ្រិះស្ថានហិរញ្ញវត្ថុនានា នៅទូទាំងសហភាពអឺរ៉ុប។
នៅក្នុងលិខិតប្រកាសនេះ ប្រទេសទាំង៦បានលើកឡើងនូវករណីមួយចំនួន ដែលបង្ហាញពីសកម្មភាព និងបណ្តាញលាងលុយកខ្វក់ នៅតាមធនាគារមួយចំនួន នៅក្នុងប្រទេសឡេតូនី ប្រទេសម៉ាល់តិ៍ និងប្រទេសឈីព្រ ជាដើម។ ជាក់ស្តែង ធនាគារ Danske Bank ដែលជាធនាគារធំជាងគេបង្អស់នៅដាណឺម៉ាក បានទទួលស្គាល់ថា សាខាខ្លួននៅប្រទេសអេសតូនី បានធ្វើចាត់ចែងការផ្ទេរប្រាក់ចំនួន២០ម៉ឺនលានអឺរ៉ូ រវាងឆ្នាំ២០០៧ ដល់ឆ្នាំ ២០១៥ ទាំងដែលដឹងថាប្រាក់ទាំងនោះ មានប្រភពគួរឲ្យសង្ស័យខ្លាំង។ ធនាគារនៅតាមប្រទេសអឺរ៉ុបខាងជើង មួយចំនួនធំ សុទ្ធតែមានជាប់ពាក់ព័ន្ធនឹងករណីលាងលុយកខ្វក់ ដ៏ធំសម្បើម។
ប្រទេសទាំង៦ ដែលជាអ្នកផ្តើមគំនិត បង្កើតអង្គភាពពិសេសឃ្លាំមើលការលាងលុយកខ្វក់នេះ បានអះអាងថា កន្លងមក គោលនយោបាយជាតិ តាមប្រទេសនីមួយៗ ក្នុងការទប់ស្កាត់បញ្ហានេះ បានជួបបរាជ័យជាប្រចាំ ហើយសកម្មភាពលាងលុយកខ្វក់ កាន់តែរីកធំទៅៗ ពាក់ព័ន្ធរវាងប្រទេសជាច្រើន ដោយសារតែសាខារបស់គ្រិះស្ថានហិរញ្ញវត្ថុ។ ផលប្រយោជន៍ហិរញ្ញវត្ថុ រវាងរដ្ឋាភិបាល ជាមួយធនាគារឯកជនខ្លះ បានបង្កជាឧបសគ្គ ដល់ការទប់ស្កាត់បញ្ហានេះ ឲ្យមានប្រសិទ្ធិភាព។ ទោះយ៉ាងនេះក្តី ប្រទេសទាំង៦នេះ បានទទួលស្គាល់ថា ការងាររបស់អង្គភាពពិសេសនេះ អាចត្រូវបានប្រគល់ ឲ្យស្ថិតនៅក្រោមបង្គាប់ នៃអាជ្ញាធរធនាគារអឺរ៉ុប (ABE) តែត្រូវតែមានកញ្ចប់ថវិកាបន្ថែម ឲ្យគ្រប់គ្រាន់។
គួរកត់សំគាល់ថា អាជ្ញាធរធនាគារអឺរ៉ុបនេះ ទើបតែត្រូវបានធ្វើកំណែទម្រង់មួយចំនួនធំ ដើម្បីពង្រឹងតួនាទីក្នុងការប្រយុទ្ធប្រឆាំងនឹងការលាងលុយកខ្វក់។ ជាច្រើនខែមកហើយ ដែលបារាំង អេស្ប៉ាញ និងអ៊ីតាលី បានទាមទារឲ្យមានការពង្រឹងវិធានការ ដើម្បីទប់ស្កាត់ការលាងលុយកខ្វក់ តែជានិច្ចជាកាល អាល្លឺម៉ង់ តែងតែបដិសេធរាល់ការធ្វើកំណែទំរង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ