កិច្ចព្រមព្រៀងពាណិជ្ជកម្ម អឺរ៉ុប-Mercosur ត្រូវកសិករអឺរ៉ុបចាត់ទុកថា គ្មានតុល្យភាព
កាលពីថ្ងៃសៅរ៍ទី២៩មិថុនា សហភាពអឺរ៉ុបបានអបអរសាទរ ចំពោះលទ្ធផលវិជ្ជមាន បន្ទាប់ពីសម្រេចបាន នូវកិច្ចព្រមព្រៀងពាណិជ្ជកម្មមួយ ជាមួយនឹងក្រុមប្រទេសអាមេរិកខាងត្បូង៤ប្រទេស ដែលហៅកាត់ថា Mercosur។ តែយ៉ាងណា ប្រជាកសិករអឺរ៉ុប ក៏ដូចជាអង្គការក្រៅរដ្ឋាភិបាល បានបរិហារថា កិច្ចព្រមព្រៀងនេះ ជាកិច្ចព្រមព្រៀងដែលគ្មានតុល្យភាព ហើយគេមិនអាចទទួលយកវាបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់
ប្រទេសអាមេរិកឡាទីនទាំង៤ មានប្រេស៊ីល អាហ្សង់ទីន អ៊ុយរូហ្កា និងប៉ារ៉ាហ្កាយ បានសន្យាថានឹងបើកទីផ្សារឲ្យធំ ទទួលយកទំនិញឧស្សាហកម្មរបស់អឺរ៉ុប មានដូចជាផលិតរថយន្ត ផលិតផលសារធាតុគីមី ផលិតផលឱសថ ព្រមទាំងបើកចំហរទីផ្សារសាធារណៈ។ ជាថ្នូរវិញ សហភាពអឺរ៉ុប បានសន្យាបើកចំហរទីផ្សារ ទទួលយកផលិតផលកសិកម្ម របស់ប្រទេសទាំង៤នេះ។ ផលិតផលកសិកម្មទាំងនោះ មានជាអាទិ៍ ស្ករ អាល់កុលអេតាណុល សាច់សត្វស្លាប និងសាច់គោជាដើម។
ក៏ប៉ុន្តែ Copa Cogeca សហជីពកសិករធំបំផុតនៅអឺរ៉ុប បានលើកឡើងថា កិច្ចព្រមព្រៀងនេះ គឺជាកិច្ចព្រមព្រៀងដ៏អយុត្តិតធម៌ ព្រោះទន្ទឹមពេលដែលសហភាពអឺរ៉ុប ដាក់កំហិតយ៉ាងខ្លាំង នូវក្រិត្យក្រមស្តង់ដា ឲ្យកសិករអឺរ៉ុបគោរព តែសហភាពអឺរ៉ុប បែរជាបិទភ្នែក ឲ្យប្រទេសអាមេរិកខាងត្បូង នាំផលិតផលចូល ដែលមិនមានស្តង់ដាអនាម័យ និងបរិស្ថានទៅវិញ។
នាយកសហជីពកសិករអាល្លឺម៉ង់ បានចាត់ទុកកិច្ចព្រមព្រៀងនេះ ថាពុំមានវិសមភាពទាល់តែសោះ ហើយវានឹងជះផលអាក្រក់ ដល់កសិដ្ឋានធនតូចជាលក្ខណៈគ្រួសារ នៅតាមប្រទេសអឺរ៉ុប។ ដូចគ្នាដែរ លោកស្រីប្រធានសហជីពកសិករបារាំង បានលើកឡើងថា កិច្ចព្រមព្រៀងដែលគ្មានតុល្យភាពនេះ នឹងបើកផ្លូវឲ្យកសិករអឺរ៉ុប ត្រូវប្រឈមនឹងការប្រកួតប្រជែងមិនស្មោះត្រង់ ហើយអ្នកបរិភោគវិញ ក៏ត្រូវរងគ្រោះ ដោយការបោកប្រាស់។
ក្រៅពីការរិះគន់ពីសំណាក់សហជីពកសិករអឺរ៉ុប អង្គការក្រៅរដ្ឋាភិបាលប្រមាណ៣៤០អង្គភាព ទាំងអឺរ៉ុប ទាំងអាមេរិកខាងត្បូង បានសរសេរលិខិតរួមគ្នាមួយ ដើម្បីប្រឆាំងនឹងកិច្ចព្រមព្រៀងពាណិជ្ជកម្មសេរីនេះ។ អង្គការទាំងនោះ បានលើកឡើងថា មានបញ្ហាប្រឈមពីរ ដែលកិច្ចព្រមព្រៀងនេះ មិនបានគិតដល់ គឺបញ្ហាបរិស្ថានធម្មជាតិ និងបញ្ហាសិទ្ធិមនុស្សនៅអាមេរិកខាងត្បូង។
គួរកត់សំគាល់ថា បើផ្អែកតាមការសន្និដ្ឋាន ប្រទេសអាមេរិកឡាទិនទាំង៤ អាចនាំចូលសាច់គោ មកអឺរ៉ុប ចំនួនជិត១០ម៉ឺនតោន ជាមួយពន្ធអនុគ្រោះ ដែលមានកំរិតចំនួន៧,៥%។ បញ្ហានេះ នឹងបន្ថែមការលំបាកដល់កសិដ្ឋានអឺរ៉ុប ដែលជួបវិបត្តិរួចស្រេចទៅហើយ។ ជាងនេះទៀត ការចិញ្ចឹមសត្វនៅតាមប្រទេសអាមេរិកខាងត្បូង ធ្លាប់ត្រូវបានគេដឹងថា បានប្រើប្រាស់នូវសារធាតុគីមី អកម៉ូនថ្នាំផ្សះ ដើម្បីពន្លឿនការរីកធំធាត់របស់សត្វ ដែលបញ្ហានេះ អាចបង្កហានិភ័យដល់អ្នកបរិភោគ។
គួរកត់សំគាល់ថា ជាមួយនឹងការរិះគន់ផ្ទួនៗគ្នានេះ កិច្ចព្រមព្រៀងពាណិជ្ជកម្មរវាងអឺរ៉ុប និងក្រុមប្រទេស Mencosur អាចនឹងជួបឧបសគ្គច្រើន ដោយវាត្រូវឆ្លងកាត់ការបោះឆ្នោតអនុម័តទទួលយក ពីប្រទេសសមាជិកទាំង២៧ ព្រមទាំងពីសំណាក់សភាអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ