សហភាពអឺរ៉ុបដាក់ឱសានុវាទ៣ខែ ឲ្យក្រិកត្រួតពិនិត្យព្រំដែនឲ្យល្អ
ក្នុងខណៈពេលដែលជនភៀសខ្លួន នៅតែបន្តរត់ឆ្លងចូលមកអឺរ៉ុប ក្រិកដែលជាប្រទេសនៅជួរមុខ កំពុងតែត្រូវបានគេស្តីបន្ទោស ថាបានអនុវត្តការត្រួតពិនិត្យព្រំដែន ដោយគ្មានការប្រុងប្រយ័ត្ន បណ្តោយឲ្យជនភៀសខ្លួន ទាំងស្របច្បាប់ទាំងខុសច្បាប់ របូតចូលមកអឺរ៉ុប។ នៅថ្ងៃសុក្រទី ១២កុម្ភៈ គណៈកម្មការអឺរ៉ុប បានបោះឆ្នោតសម្រេចដាក់ឱសានុវាទ៣ខែ ដើម្បីឲ្យអាជ្ញាធរក្រិក រៀបចំធ្វើការកែតម្រូវ ពុំនោះទេ សហភាពអឺរ៉ុបនឹងចាត់វិធានការទៅតាមការកំណត់ របស់ច្បាប់តំបន់ឆិនហ្គែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ក្នុងនាមជាប្រទេសស្ថិតនៅជួរមុខ ដែលជាព្រំដែនខាងក្រៅនៃតំបន់ឆិនហ្គែន ក្រិកមានតួនាទីត្រួតពិនិត្យព្រំដែនឲ្យបានតឹងរឹង ព្រោះថាបើសិនជាក្រិកចេញក្រដាសស្នាម អនុញ្ញាតិ ឲ្យជនបរទេសម្នាក់ចូល មានន័យថាជននោះនឹងមានសិទ្ធិដើរហើរពាសពេញតំបន់ឆិនហ្គែន ពោលគឺពេញសហភាពអឺរ៉ុបទាំងមូលតែម្តង។ ដូច្នេះហើយ ទើបនៅថ្ងៃទី១២ កុម្ភៈ គណៈកម្មការអឺរ៉ុបបានធ្វើការប្រជុំសម្រេច ដាក់ចេញនូវអនុសាស្រ្តចំនួនជាង៥០ ដើម្បីជម្រុញឲ្យក្រិក អនុវត្តការត្រួតពិនិត្យព្រំដែនឲ្យបានល្អប្រសើរ។
ក្នុងចំណោមអនុសាសន៍របស់សហភាពអឺរ៉ុប គឺមានដូចជា ការបង្កើនការយាមកាមនៅព្រំដែនសមុទ្រ ការដាក់បន្ថែមបុគ្គលិក ដើម្បីបង្កើនការត្រួតពិនិត្យ និងឆែកឆេរអត្តសញ្ញាណជនភៀសខ្លួន ឲ្យបានល្អិនល្អន់ មុននឹងចេញក្រដាសអនុញ្ញាតិ ឲ្យធ្វើដំណើរបន្តទៅមុខទៀត។ កិច្ចការនេះ ត្រូវដើរទន្ទឹមគ្នា ជាមួយនឹងការសហការគ្នា ផ្តល់ព័ត៌មានភ្លាមៗ ដើម្បីផ្ទៀងផ្ទាត់អត្តសញ្ញាណរបស់ជនភៀសខ្លួន ជាមួយនឹងតារាងឈ្មោះជនសង្ស័យ ជាបណ្តាញភេរវកម្ម ដែលមានស្រាប់ ក្នុងតារាងទិន្ន័យ របស់នគរបាលអឺរ៉ុប និងនគរបាល Interpole។ បន្ថែមពីនេះ ក្រិកត្រូវតែត្រួតពិនិត្យឆែកឆេរគ្រប់ជនភៀសខ្លួនទាំងអស់ ជាស្វ័យប្រវត្តិ ដោយឥតរើសមុខ។ នេះបើតាមឯកសារ ទទួលបានដោយភ្នាក់ងារព័ត៌មានបារាំង។
អនុសាសន៍ ទាំងអម្បាលម៉ាណនេះ គឺក្រិកមានពេលអនុវត្តវា ក្នុងរយៈពេល៣ខែ ពុំនោះទេ សហភាពអឺរ៉ុប នឹងអនុវត្តទៅតាមមាត្រា២៦ នៃក្រមឆិនហ្គែន។ តាមមាត្រានេះ ចែងថាសហភាពអឺរ៉ុបអាចអនុញ្ញាតិឲ្យប្រទេសសមាជិកមួយ រឺច្រើន ដែលមានព្រំដែនខាងក្នុងតំបន់ឆិនហ្គែន ឲ្យធ្វើការត្រួតពិនិត្យនៅតាមព្រំដែនបាន ក្នុងរយៈពេល៦ខែ អាចបន្តទៀតក្នុងករណីចាំបាច់។
សន្តិសុខរបស់តំបន់ឆិនហ្គែនទាំងមូល កំពុងជួបគ្រោះថ្នាក់ ដោយសារតែក្រិក បណ្តែតបណ្តោយ មិនធ្វើនូវអ្វីដែលជាកាតព្វកិច្ចរបស់ខ្លួន។ នេះគឺជាសេចក្តីប្រកាសរបស់គណៈកម្មការអឺរ៉ុប។ យ៉ាងណាក៏ដោយ រដ្ឋាភិបាលក្រិកបានតវ៉ា តាមរយៈលិខិតមួយ ដោយបានសង្កត់ធ្ងន់ថា ការធ្វេសប្រហែល ក្នុងកិច្ចការត្រួតពិនិត្យជនភៀសខ្លួន វាមិនមែនជាចេតនា រឺការខ្វះការប្រុងប្រយត័្ន របស់អាជ្ញាធរក្រិកទេ ក៏ប៉ុន្តែគឺដោយសារតែក្រិកគ្មានលទ្ធភាពធ្វើឲ្យបានល្អ ព្រោះតែវិបត្តិសេដ្ឋកិច្ច។ រដ្ឋាភិបាលក្រិក គ្មានប្រាក់ឯណា ទៅផ្គត់ផ្គង់បុគ្គលិក ទៅទិញសម្ភារៈបន្ថែម ដើម្បីចាត់ចែងកិច្ចការត្រួតពិនិត្យ ឲ្យបានសព្វជ្រុងជ្រោយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ