ដែនដីស្វយ័ត Gibraltar ក្លាយជាកម្មវត្ថុជម្លោះថ្មី រវាងអង់គ្លេស និងសហភាពអឺរ៉ុប
ចុះផ្សាយនៅថ្ងៃ៖
ដែនដីស្វយ័ត Gibraltar របស់អង់គ្លេស ដែលស្ថិតនៅជ្រោយខាងត្បូងបង្អស់ នៃប្រទេសអេស្ប៉ាញ កំពុងតែក្លាយជាកម្មវត្ថុនៃជម្លោះថ្មីមួយទៀត ក្នុងសំណុំរឿងផ្តាច់ខ្លួន របស់អង់គ្លេសចេញពីសហភាពអឺរ៉ុប។ សហភាពអឺរ៉ុប បានបញ្ជាក់ថា អេស្ប៉ាញ គឺជាអ្នកមានសិទ្ធិសម្រេចជាមួយអង់គ្លេស ទាក់ទិនទៅនឹងការអនុវត្តកិច្ចព្រមព្រៀងផ្តាច់ខ្លួន របស់អង់គ្លេស ចេញពីសហភាពអឺរ៉ុប នៅតំបន់ស្វយ័តនេះ។ តែលោករដ្ឋមន្ត្រីការបរទេសអង់គ្លេស បានឆ្លើយបកមកវិញថា គេមិនអាចតថ្លៃតំបន់ស្វយ័ត Gibraltar បានទេ។ ដោយឡែក រដ្ឋបាលស្វយ័តរបស់ Gibraltar បានធ្វើការចោទប្រកាន់ទៅលើរដ្ឋាភិបាលអេស្ប៉ាញ ថាបានបំផុសបំផុលរឿងនេះ ដើម្បីឆ្លៀតឱកាសនេះ ទាមទារគ្រប់គ្រងតំបន់ Gibraltar។
សហភាពអឺរ៉ុប ផ្តល់សិទ្ធិឲ្យអេស្ប៉ាញ
តំបន់ Gibraltarគឺជាដែនដីស្ថិតក្រោមការកាន់កាប់របស់ចក្រភពអង់គ្លេស តាំងតែពីឆ្នាំ១៧១៣ ម្លេះ តែដែនដីនេះ មានភូមិសាស្ត្រនៅជ្រោយខាងត្បូងបង្អស់របស់អេស្ប៉ាញ ទល់មុខនឹងប្រទេសម៉ារ៉ុក។ ប្រភពនៃបញ្ហានាពេលនេះ គឺ វាទាក់ទិនទៅនឹងការចាកចេញរបស់អង់គ្លេស ចេញពីសហភាពអឺរ៉ុប។
កាលពីថ្ងៃទី ៣១មីនា ឯកសារមួយរបស់ក្រុមប្រឹក្សាអឺរ៉ុប បានសរសេរថា “នៅក្រោយពេលអង់គ្លេសចេញពីសហភាពអឺរ៉ុប រាល់កិច្ចព្រមព្រៀងទាំងអស់រវាង សហភាពអឺរ៉ុប និងអង់គ្លេស អាចអនុវត្ត នៅដែនដីស្វយ័ត Gibraltar បាន ល្គិកណា មានការព្រមព្រៀង ពីអេស្ប៉ាញជាមុន”។ ក្នុងន័យនេះ គឺមានន័យថា សហភាពអឺរ៉ុប បានផ្តល់អំណាច ទៅឲ្យរដ្ឋាភិបាលអេស្ប៉ាញ ជាអ្នកចរចាជាមួយអង់គ្លេស ដើម្បីកំណត់ពីលក្ខខណ្ឌនានា ទាក់ទិននឹងការអនុវត្តកិច្ចព្រមព្រៀងផ្សេងៗ រវាងអង់គ្លេសនិងសហភាពអឺរ៉ុប នៅតំបន់ Gibraltar។
អញ្ចឹងមានន័យថា អេស្ប៉ាញ អាចមានសិទ្ធិរារាំង មិនឲ្យតំបន់ Gibraltar អនុវត្តកិច្ចព្រមព្រៀង ជាមួយសហភាពអឺរ៉ុប។ កន្លែងនេះហើយ ដែលបានកើតជាការមួរម៉ៅក្តៅក្រហាយ ពីសំណាក់ រដ្ឋាភិបាលអង់គ្លេស ក៏ដូចជារដ្ឋបាលស្វយ័តរបស់ Gibraltar។
តំបន់ Gibraltar មិនអាចដាក់លក់ឡៃឡុងបានទេ!
នៅថ្ងៃអាទិត្យនេះ សារព័ត៌មាន Sunday Telegraph បានស្រង់សំដីលោក Boris Johnson រដ្ឋមន្ត្រីក្រសួងការបរទេសអង់គ្លេស ដែលបាននិយាយថា ដែនដី Gibraltar មិនអាចត្រូវយកមកដាក់ដេញថ្លៃ លក់ឡៃឡុងបានទេ។ លោក បន្ថែមថា គោលជំហររបស់រដ្ឋាភិបាលអង់គ្លេស គឺត្រូវតែម៉ឺងម៉ាត់ មិនអាចចុះញ៉ម សហភាពអឺរ៉ុប រឺអេស្ប៉ាញបានទេ។ គាត់ឆ្លៀតរំលឹកថា ដែនដី Gibraltar នេះ គឺអេស្ប៉ាញ បានប្រគល់ ឲ្យស្ថិតក្រោមការគ្រប់គ្រងរបស់អង់គ្លេស តាំងតែពីឆ្នាំ១៧១៣ ម្លេះ។
លោក Boris Johnson បានពន្យល់ថា កាលជំនាន់ ឆ្នាំ១៩៧៣ នៅពេលអង់គ្លេស បានចូលជាសមាជិកសហភាពអឺរ៉ុប ដែលកាលនោះអេស្ប៉ាញ នៅមិនទាន់ក្លាយជាសមាជិកអឺរ៉ុបទេ ក៏កិច្ចព្រមព្រៀងនានា ក្នុងក្របខណ្ឌអឺរ៉ុប ត្រូវបានអនុវត្តជាធម្មតា នៅ Gibraltar កាលជំនាន់នោះ។ដូច្នេះ បើបញ្ច្រាសទៅវិញ ដូចស្ថានភាពនាពេលនេះ ក៏មិនត្រូវមានបញ្ហាអ្វីមកចោទដែរ។ Gibraltar ជាដែនដីអង់គ្លេស អេស្ប៉ាញ គ្មានសិទ្ធិអ្វីមកហារស្តីទេ។
ដោយឡែក លោក Fabian Picardo ប្រមុខរដ្ឋបាលស្វយ័តនៃតំបន់ Gibraltar បាននិយាយធ្ងន់ជាងនេះទៅទៀត ដោយបានចោទថា រដ្ឋាភិបាលអេស្ប៉ាញ មានគំនិតពិសពុល ឆក់ឱកាសដែលអង់គ្លេសចេញពីសហភាពអឺរ៉ុប ដើម្បីកេងចំណេញ ចង់ដណ្តើមយកតំបន់Gibraltar មកគ្រប់គ្រង។ លោកម្នាក់នេះ ថា វាពិតណាស់ គឺ រដ្ឋាភិបាលអេស្ប៉ាញ ដែលជាអ្នកទៅចាក់សហភាពអឺរ៉ុប ឲ្យសម្រេចគោលជំហរយ៉ាងដូច្នេះ។
ការពារប្រយោជន៍កូនចៅខ្លួន ជារឿងធម្មតា!
មន្ត្រីធំម្នាក់នៃគណកម្មការអឺរ៉ុប បានឆ្លើយ ដោយសុំមិនបញ្ចេញឈ្មោះថា វាជារឿងធម្មតាទេ ដែលសហភាពអឺរ៉ុប ត្រូវប្រកាន់គោលជំហរ ការពារផលប្រយោជន៍របស់សមាជិកខ្លួន។ អេស្ប៉ាញ គឺជាសមាជិកអឺរ៉ុប ចំនែកអង់គ្លេស លែងជាសមាជិកអឺរ៉ុបទៀតហើយ។ មួយវិញទៀត ការចាកចេញរបស់អង់គ្លេស បានបង្កជាបញ្ហាប្រទាំងប្រទើស ផ្នែកច្បាប់បែបនេះ ច្រើនកន្លែងផ្សេងទៀត មិនមែនមានតែតំបន់ Gibraltar នេះមួយទេ ព្រោះចក្រភពអង់គ្លេស សំបូរដែនដីស្វយ័តណាស់។ ជាក់ស្តែង តំបន់អៀរឡង់ខាងជើង និងតំបន់អេកូស រឺស្កុតឡែន ជាដើម។
ចំណែកអេស្ប៉ាញវិញ បានបញ្ជាក់តាមរយៈអ្នកនាំពាក្យរដ្ឋាភិបាលខ្លួនថា អេស្ប៉ាញពេញចិត្តនឹងការសម្រេចគោលជំហរ របស់សហភាពអឺរ៉ុប។ រដ្ឋាភិបាលអេស្ប៉ាញ បានលើកឡើងថា សហភាពអឺរ៉ុបបានយល់នូវស្ថានភាព ក៏ដូចជាករណីពិសេស នៃតំបន់ស្វយ័ត Gibraltar នេះ។ អេស្ប៉ាញយល់ថា វាជារឿងសមរម្យណាស់ ដែលសហភាពអឺរ៉ុប បើកផ្លូវឲ្យអង់គ្លេស និងអេស្ប៉ាញចរចានិយាយគ្នា ស្តីពីអនាគត ក៏ដូចជាលក្ខខណ្ឌនានា នៃតំបន់ Gibraltar នៅពេលអង់គ្លេសចេញពីសហភាពអឺរ៉ុប។ តែយ៉ាងណា អេស្ប៉ាញ ធានាអះអាងថា តំបន់Gibraltar នឹងនៅតែស្ថិតក្នុងអធិបតេយ្យរបស់អង់គ្លេសជានិច្ច។
Gibraltar ដែនដីអង់គ្លេស ក្នុងដីអេស្ប៉ាញ
ចំណុចពិសេសធំចំបង គឺស្ថិតនៅលើទីតាំងភូមិសាស្ត្រ។ តាមពិតទៅ តំបន់ស្វយ័ត Gibraltar នេះ មានទីតាំងស្ថិតនៅក្នុងប្រទេសអេស្ប៉ាញតែម្តង។ ដូច្នេះ រាល់ការផ្គត់ផ្គង់ ទំនិញ បន្លែផ្លែឈើ សម្ភារៈគ្រប់មុខ គឺត្រូវឆ្លងកាត់អេស្ប៉ាញទាំងអស់។ តំបន់នេះ មានផ្ទៃក្រឡាតែប្រមាណជាជិត ៧គីឡូម៉ែត្រការ៉េប៉ុណ្ណោះ ហើយមានប្រជាជន រស់នៅប្រហែល៣៣០០០នាក់។
កន្លងមកអេស្ប៉ាញ តែងតែធ្វើការរិះគន់ អង់គ្លេស ដែលបណ្តោយឲ្យតំបន់នេះ ក្លាយជាច្រករត់ពន្ធទំនិញខុសច្បាប់សព្វបែបយ៉ាង ជាពិសេស គឺបារី កញ្ឆារ និងថ្នាំញៀនផ្សេងៗ ព្រោះតំបន់នេះ មានកំពង់ផែក្នុងសមុទ្រមេឌីទែរ៉ាណេ ហើយនៅទល់មុខនឹងម៉ារ៉ុក ដែលស្ថិតនៅលើទ្វីបអាហ្វ្រិក។ បន្ទាប់មក ទំនិញគេចពន្ធ ខុសច្បាប់ទាំងនោះ ត្រូវហូរចូលទៅអេស្ប៉ាញ ដើម្បីនាំចេញទៅកាន់ប្រទេសផ្សេងទៀត នៃសហភាពអឺរ៉ុប។
ក្រៅពីនេះ តំបន់Gibraltar នេះ ក៏គឺជាឋានសួគ៌សម្រាប់អ្នកដែលចង់លាក់លុយ គេចពន្ធ រឺក៏លាងលុយក្រខ្វក់ដើម។ ក្រុមហ៊ុនល្បែងស៊ីសង តាមអ៊ីនធើនែតភាគច្រើន គឺមានទីតាំង និងចុះបញ្ជីនៅតំបន់ Gibraltar នេះ។ យ៉ាងណាមិញ អេស្ប៉ាញ ក៏បានចំណេញមួយផ្នែកដែរ ពីតំបន់ នេះ ព្រោះមានប្រជាជនអេស្ប៉ាញ ប្រមាណជា១ម៉ឺននាក់ ដែលឆ្លងព្រំដែន ទៅធ្វើការនៅ Gibraltar ព្រោះមានកំពង់ផែដ៏ធំនៅទីនោះ។ ដូច្នេះ បើសិនជាតំបន់Gibraltar អនុវត្តកិច្ចព្រមព្រៀងផ្តាច់ខ្លួនតាមអង់គ្លេស នោះអេស្ប៉ាញប្រាកដជាខាត។
តាមពិតទៅ តំបន់ស្វយ័ត Gibraltar នេះ តែងតែជាកម្មវត្ថុនៃការប្រកែកគ្នាជារឿយៗ រវាងអង់គ្លេស និងអេស្ប៉ាញ។ កាលពីឆ្នាំ២០០២ ប្រជាជនតំបន់Gibraltar បានបោះឆ្នោតប្រជាមតិ មិនព្រមចេញពីចក្រភពអង់គ្លេសទេ។ ក៏ប៉ុន្តែបើយើងក្រលេកមើលលទ្ធផលប្រជាមតិ ចេញពីសហភាពអឺរ៉ុបរបស់អង់គ្លេសវិញ គឺប្រជាជនតំបន់ Gibraltar នេះ ប្រមាណជា៩៦% បានបោះឆ្នោតគាំទ្រឲ្យអង់គ្លេស នៅក្នុងសហភាពអឺរ៉ុបតទៅទៀត។ ត្រង់ចំណុចនេះហើយ ដែលអេស្ប៉ាញ បានលេស យកស្ថានភាពនេះ ជំរុញឲ្យតំបន់Gibraltar ទាមទារឯករាជ្យ ចេញពីអង់គ្លេស ដូចតំបន់អេកូស។ ក៏ប៉ុន្តែខុសពីតំបន់អេកូស ថ្នាក់ដឹកនាំតំបន់Gibraltar នេះនៅស្មោះ និងស្និតនឹងរដ្ឋាភិបាលទីក្រុងឡុងខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ