បណ្តាំចុងក្រោយរបស់លោកអូបាម៉ា ឮខ្ទរដល់អឺរ៉ុប
ចុះផ្សាយនៅថ្ងៃ៖
ស្តាប់ - ០៥:៤៩
កាលពីថ្ងៃទី១០មករា លោកអូបាម៉ា បានថ្លែងសារផ្ញើរជាចុងក្រោយ ក្នុងនាមជាប្រធានាធិបតីអាមេរិក។ ក្រៅពីបានបូកសរុបសមិទ្ធិផលការងារ ដែលលោកបានសម្រេចបាន លោកអូបាម៉ា បានផ្ញើរបណ្តាំជាការក្រើនរំលឹក ទៅដល់រដ្ឋាភិបាលថ្មី ជាពិសេសគឺ ទៅដល់ប្រជាជនអាមេរិកគ្រប់រូប ដែលស្រលាញ់សិទ្ធិសេរីភាព និងលទ្ធិប្រជាធិបតេយ្យ។ លោកបានលើកឡើងអំពីគ្រោះថ្នាក់ នៃចរន្តជ្រុលនិយម ដែលបំភិតបំភ័យមតិសាធារណ ធ្វើឲ្យពួកគេបាត់បង់ហេតុផល។ នេះគឺជាគ្រោះថា្នក់ ដល់លទ្ធិប្រជាធិបតេយ្យ។ សម្តីនេះ បានឮខ្ទរដល់ទ្វីបអឺរ៉ុប ព្រោះស្ថានភាពនយោបាយនៅអឺរ៉ុបបច្ចុប្បន្ននេះ មិនខុសពីសហរដ្ឋអាមេរិកឡើយ។ ប្រទេសនៅអឺរ៉ុប កំពុងតែប្រឈមមុខនឹងចលនានយោបាយបែបប្រជាភិថុត និងឱកាសនិយមនេះ។
សុន្ទរកថា អមដោយទឹកភ្នែកជាច្រើនតំណក់ របស់លោកអូបាម៉ា ត្រូវបានបណ្តាញសារព័ត៌មានអន្តរជាតិនានា យកទៅផ្សព្វផ្សាយ និងវិភាគយ៉ាងគគ្រិកគគ្រេង។ លោកអូបាម៉ា បានថ្លែងសារលាប្រជាជនអាមេរិក កាលពីថ្ងៃអង្គារទី១០មករា ពីទីក្រុងឈីកាហ្កោ ជាសារដែលពិរោះនិងមានន័យបំផុត។ ជាសារនយោបាយ ដែលមានន័យសុទិដ្ឋិនិយម តែលោកមិនភ្លេចក្រើនរំលឹកអំពីគ្រោះថ្នាក់ទេ បើសិនជាយើងម្នាក់ៗភ្លេចខ្លួន។
ត្រូវបន្តតស៊ូ ការពារ ថែររក្សាប្រជាធិបតេយ្យ ៖
លោកអូបាម៉ា មានប្រសាសន៍ថា ៖ “លទ្ធិប្រជាធិបតេយ្យ អាចបាក់ស្រុត បើសិនជាយើងម្នាក់ៗ ក្លបខ្លាច មិនហ៊ានតស៊ូប្រឆាំង។ លទ្ធិប្រជាធិបតេយ្យ អាចជួបគ្រោះថ្នាក់ បើសិនជាយើងភ្លេចខ្លួន ភ្លេចគិតដល់ការថែរក្សានិងចិញ្ចឹមបំប៉នវា។ លទិ្ធប្រជាធិបតេយ្យ មិនមែនកើតឡើងដោយឯកឯងទេ តែវាកើតចេញពីការចូលរួមរបស់ប្រជាជនសាមញ្ញម្នាក់ៗ”។
លោកបន្តថា ៖ រដ្ឋធម្មនុញ្ញសហរដ្ឋអាមេរិក គឺជាអំណោយមួយដ៏មានតំលៃបំផុតសម្រាប់ប្រជាជនអាមេរិក តែវាគ្រាន់តែជាសៀវភៅមួយក្បាល ដែលមានចារអក្សរតែប៉ុណ្ណោះ វាគ្មានអំណាចអ្វីទេ។ គឺប្រជាជនម្នាក់ៗ ដែលមានតួនាទី ធ្វើឲ្យអក្សរគ្រប់ពាក្យ នៃរដ្ឋធម្មនុញ្ញនេះ មានអំណាច មានឥទ្ធិពល ក្លាយជាច្បាប់កំពូល។
តាមរយៈសម្តីនេះ លោកអូបាម៉ា បានអំពាវនាវឲ្យប្រជាជនអាមេរិក ប្រកាន់ជំហររឹងមាំ ហ៊ានតស៊ូ ហ៊ានប្រឆាំងរិះគន់ នៅពេលណាដែលរដ្ឋធម្មនុញ្ញ ត្រូវគេជាន់ឈ្លី។ ប្រជាជនម្នាក់ៗ មិនត្រូវចុះចាញ់ទេ នៅពេលសិទ្ធិសេរីភាព និងតំលៃរួមរបស់សហរដ្ឋអាមេរិក ជួបនឹងការគំរាមកំហែង។ សហរដ្ឋអាមេរិក ជាទឹកដីដែលមានប្រវត្តិប្រមូលផ្តុំមនុស្សចំរុះជាតិសាសន៍ ពីគ្រប់មជ្ឈដ្ឋាន ជាទឹកដីដែលផ្តល់ឱកាសឲ្យមនុស្សទាំងអស់ ដោយឥតរើសអើសព៌ណសំបុរ រឺសាសនាអ្វីឡើយ។
លោកអូបាម៉ា យល់ថា អ្វីដែលជាលក្ខណៈពិសេសរបស់នយោបាយ គឺជាការជជែកដោះដូរយោបល់គ្នា ស្វែងយល់ពីគ្នា។ លោកបានលើកឡើងអំពីសារៈសំខាន់ នៃការដេញដោលយោបល់គ្នា ក្នុងពេលឃោសនាបោះឆ្នោត។ ធ្វើបែបនេះ គឺដើម្បីបង្ហាញពីចំណុចសំខាន់ៗ តាមលំដាប់លំដោយ នៃកម្មវត្ថុនយោបាយ ព្រមទាំងស្វែងយល់ពីមធ្យោបាយដើម្បីសម្រេចវា។ ការដេញដោលគ្នា ត្រូវតែភាគីនីមួយៗ គោរពការយល់ឃើញរបស់ភាគីម្ខាងទៀត ហើយទទួលស្គាល់បើសិនជាភាគីម្ខាងទៀតគិតត្រូវ មានហេតុផលល្អជាងយើង។
សត្រូវពីខាងក្រៅ ចង់បំផ្លាញលទ្ធិប្រជាធិបតេយ្យសេរី៖
ប្រសាសន៍លោកអូបាម៉ា ស្តីពីតំលៃនៃលទ្ធិប្រជាធិបតេយ្យ ស្តីពីតួនាទីរបស់មនុស្សម្នាក់ៗក្នុងសង្គម ដែលត្រូវជួយចូលរួមកសាងលទ្ធិប្រជាធិបតេយ្យ ស្តីពីការអត់ឱនសណ្តោសយោគយល់ ចាប់ដៃគ្នា ទាំងអស់នេះ មិនមែនមានន័យសម្រាប់តែសហរដ្ឋអាមេរិកមួយទេ តែវាមានខ្លឹមសារសម្រាប់មនុស្សជាតិទាំងមូលទូទាំងពិភពលោក។ យ៉ាងណាមិញ ទ្វីបអឺរ៉ុប ដែលកំពុងតែស្ថិតក្នុងបរិយាកាសនយោបាយ ដ៏សែនងងឹត ស្របពេលដែលចរន្តនយោបាយជ្រុលនិយម ឱកាសនិយម និងប្រជាភិថុត កំពុងតែបំពុល ហើយអាចនឹងឈានទៅបង្កគ្រោះថ្នាក់ដល់លទ្ធិប្រជាធិបតេយ្យ។
លោកអូបាម៉ា បានលើកឡើងអំពីការគំរាមកំហែងពីខាងក្រៅ ដែលគេមានបំណងធ្វើឲ្យប្រជាធិបតេយ្យអាមេរិក ជួបវិបត្តិ។ ទោះជាលោកអូបាម៉ា មិនបញ្ចេញឈ្មោះ ក៏គេអាចកាត់យល់បានដែរថា លោកអូបាម៉ាចង់សំដៅទៅលើរដ្ឋាភិបាលរុស្ស៊ី។ រដ្ឋាភិបាលរុស្ស៊ីត្រូវបានរបាយការណ៍ភ្នាក់ងារចារកិច្ចអាមេរិកសន្និដ្ឋានថា ជាអ្នកដែលនៅពីក្រោយការលួចយកទិន្ន័យព័ត៌មានវិទ្យា របស់គណបក្សប្រជាធិតេយ្យ។ សកម្មភាពនេះ ត្រូវបានលោកអូបាម៉ា គិតថា រុស្ស៊ីមានចេតនាតែមួយគត់ គឺបង្ករភាពរញ៉េរញ៉ៃដល់ការបោះឆ្នោត។
អឺរ៉ុប កំពុងក្លាយជាចំណី នៃចរន្តជ្រុលនិយម៖
ស្ថិតក្នុងបរិយាកាសអួរអ័ព្ទ ជាមួយនឹងវិបត្តិសេដ្ឋកិច្ច វិបត្តិសង្គម និងការគំរាមកំហែងភេរវកម្ម ប្រទេសនៅអឺរ៉ុប កាន់តែច្រើន បាននាំគ្នាបត់ក្បាលទៅរកនយោបាយបែបបិទទ្វារ។ ជាមួយនឹងភាពភ័យខ្លាច និងការលំបាក ប្រជាជនម្នាក់ៗបែរជាគិតបែបយករួចខ្លួន ចុះចាញ់ការប្រកូកប្រកាសបំភិតបំភ័យ ដែលភាគច្រើន សុទ្ធតែជាការបំភ័យដោយគ្មានមូលដ្ឋាន។
ការបោះឆ្នោតប្រជាមតិ នាំអង់គ្លេសចេញពីសហភាពអឺរ៉ុប គឺជាមេរៀនមួយយ៉ាងធំ សម្រាប់ប្រជាជនអឺរ៉ុបឯងទៀត។ ប្រទេសប៉ូឡូញ ប្រទេសហុងគ្រី សុទ្ធតែបាននាំគ្នាជ្រើសរើសយកនយោបាយអភិរក្ស បែបស្តាំនិយមជ្រុល ដែលជានយោបាយមិនត្រឹមតែបែរខ្នងដាក់ប្រទេសដ៍ទៃ តែថែមទាំងបែរខ្នងដាក់ប្រជាជនខ្លួនឯងណា ដែលមានដើមកំណើតមកពីបរទេស។ អូទ្រីស ក៏សឹងតែធ្លាក់ទៅក្នុងអន្លង់នេះដូចគ្នាដែរ ក្នុងពេលបោះឆ្នោតជ្រើសរើសប្រធានធិបតី កាលពីពេលថ្មីៗនេះ។ តែជាសំណាងល្អ លោកVan der Bellen អ្នកនយោបាយមកពីបក្សការពារបរិស្ថានធម្មជាតិ បានយកជ័យជំនះ។
ឆ្នាំ២០១៧ នេះ ប្រជាជនបារាំងនឹងត្រូវបោះឆ្នោតជ្រើសរើសប្រធានាធិបតីថ្មី។ យោងតាមការវិភាគ បេក្ខជនឈរឈ្មោះមកពីបក្សស្តាំនិយមជ្រុល លោកស្រី ម៉ារីន ឡឺប៉ែន ប្រាកដជានឹងឈានឡើងដល់ការបោះឆ្នោតជុំទីពីរ។ គណបក្ស Front National របស់លោកស្រីម៉ារីន ឡឺប៉ែន គឺជាបក្សដែលអំពាវនាវឲ្យមនុស្សស្អប់គ្នា ប្រកាន់ពូជសាសន៍នឹងគ្នា លែងសាមគ្គីគ្នា។ គណបក្សនេះ មានបំណងរំលាយសហភាពអឺរ៉ុប មានបំណងរំលាយប្រាក់អឺរ៉ូ មានបំណងពុះបំផ្លាញសង្គមបារាំង ជាជំរៀកៗ ទៅតាមនិន្នាកាសាសនា។
ចំណែកបក្សស្តាំនិយម ដែលមានលោក ហ្វ្រង់ស័រ ហ្វ៊ីយ៉ុង ជាបេក្ខជនវិញ ក៏មានកម្មវិធីនយោបាយ មិនខុសគ្នាណាស់ណា ពីលោកស្រី ម៉ារីន ឡឺប៉ែនដែរ។ លោកហ្វ៊ីយ៉ុង មានបំណងរំលាយប្រព័ន្ធធានាសុខភាពសង្គម តាមរយៈការធ្វើឯកជនភាវូបនីយកម្ម។ លោកហ្វ៊ីយ៉ុង ចង់លប់ឈ្មោះមន្ត្រីរដ្ឋការរាប់ម៉ឺននាក់។ លោកហ្វីយ៉ុង ចង់ហាមឃាត់ មិនឲ្យមនុស្សស្រីមានសិទ្ធិរំលូតកូនចេញ ។ល។
ជាងនេះទៅទៀត ទាំងលោកហ្វីយ៉ុង ទាំងលោកស្រី ម៉ារីន ឡឺប៉ែន សុទ្ធតែមានជំហរទន់ទោរទៅខាងរុស្ស៊ី។ យើងមិនអាចមិនយល់ទេ រុស្ស៊ីរបស់លោកពូទីន មានមហិច្ឆិតាធំកំរិតណា។ រុស្ស៊ីមិនដែលខ្វល់ រឺគោរពលទ្ធិប្រជាធិបតេយ្យអ្វីឡើយ។
អឺរ៉ុប អាចក្លាយជាជនរងគ្រោះរបស់រុស្ស៊ី បន្ទាប់ពីសហរដ្ឋអាមេរិក៖
គ្រោះថ្នាក់នៃប្រព័ន្ធប្រជាធិបតេយ្យអាមេរិក ដែលបង្កឡើងដោយសកម្មភាពបៀតបៀនរបស់ប្រទេសមួយដ៏ទៃ ដែលលោកអូបាម៉ា បានលើកឡើង គឺមិនមែនគ្រាន់តែជាសារប្រាប់ទៅប្រជាជនអាមេរិក ឲ្យប្រុងប្រយ័ត្នទេ តែសារនេះ ក៏មានន័យដាស់តឿនដែរ ដល់របបប្រជាធិបតេយ្យនៅអឺរ៉ុប។
ថ្ងៃនេះអាមេរិករងគ្រោះ ថ្ងៃស្អែក អ្នករងគ្រោះអាចជាអឺរ៉ុប។ ប្រជាជនអឺរ៉ុបម្នាក់ៗ ត្រូវត្រៀមខ្លួនឲ្យរឹងមាំ កុំក្លបខ្លាច កុំភ័យ កុំយករួចខ្លួន កុំបោះបង់សាមគ្គីភាព និងភាតរភាពសង្គមឲ្យសោះ។ អឺរ៉ុប ក៏ត្រូវត្រៀមខ្លួន ទប់ទល់ កុំឲ្យមនុស្សចិត្តមាណាម្នាក់ ចូលមកបង្កបញ្ហា ប្រើមធ្យោបាយថោកទាប ដើម្បីបំផ្លាញប្រជាធិបតេយ្យរបស់ខ្លួន បានជាដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ