អាជ្ញាធរបារាំង ចាប់បានជនជីហាតអ៊ីស្លាម៥នាក់ ដែលមានបំណងធ្វើភេរវកម្មទ្រង់ទ្រាយធំ
កាលពីថ្ងៃទី២៥ វិច្ឆិកា លោករដ្ឋអាជ្ញាអមតុលាការក្រុងប៉ារីស ប្រទេសបារាំង បានធ្វើសន្និសីទកាសែតមួយ ដើម្បីបង្ហើបឲ្យដឹងអំពី ការចាប់ខ្លួនជនសង្ស័យ ជីហាតអ៊ីស្លាម៥នាក់។ ជនទាំង៥នាក់នេះ ត្រូវបានចាប់ខ្លួនកាលពី ចុងសប្តាហ៍កន្លងទៅ ក្នុងប្រតិបត្តិការតាមដាននិងប្រម៉ាញ់បណ្តាញភេរវកម្មជីហាត។ តាមការឲ្យដឹង ជនទាំង៥នាក់នេះ កំពុងត្រៀមរៀនចំធ្វើភេរវកម្មទ្រង់ទ្រាយធំ នៅប្រទេសបារាំង នៅរវាងដើមខែធ្នូខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
កាលពីចុងសប្តាហ៍មុន ប្រតិបត្តិការចុះបង្រ្កាបបណ្តាញភេរវកម្មជីហាតអ៊ីស្លាម ត្រូវបានប្រកាសដោយលោករដ្ឋមន្ត្រីក្រសួងមហាផ្ទៃបារាំង។ ជនសង្ស័យជាបក្សពួករបស់ក្រុមជីហាតអ៊ីស្លាម ៧នាក់ ត្រូវបានចាប់ឃាត់ខ្លួន។ ឆ្លងតាមការពិនិត្យលើភស្តុតាងនានា ជនសង្ស័យ២នាក់ ត្រូវបានដោះលែងត្រលប់ទៅវិញ តែត្រូវស្ថិតក្នុងការតាមដានយ៉ាងជាប់ស្អិតពីអាជ្ញាធរ។
ថ្ងៃទី២៥ វិច្ឆិកា លោក François Molins រដ្ឋអាជ្ញាអមតុលាការក្រុងប៉ារីស បានធ្វើសន្និសីទកាសែត ដើម្បីផ្តល់ព័ត៌មានលំអិត ស្តីពីការចាប់ខ្លួននេះ។ យោងតាមប្រសាសន៍របស់លោករដ្ឋអាជ្ញា ជនសង្ស័យ៤នាក់ ក្នុងចំណោម៥នាក់ដែលកំពុងត្រូវឃុំខ្លួន គឺជាមិត្តស្និតស្នាលនឹងគ្នា ហើយមានប្រភពមកពីទីក្រុងStrasbourg ភាគខាងកើតប្រទេសបារាំង។ ចំណែកជនសង្ស័យទី៥ គឺជាជនជាតិម៉ារ៉ុក អាយុ៤៦ឆ្នាំ ដែលត្រូវបានគេចាប់ខ្លួននៅក្រុងMarseille ភាគខាងត្បូងប្រទេសបារាំង។
ឆ្លងកាត់ការតាមដាន រួមជាមួយនឹងភស្តុតាងឯកសារនានា អាជ្ញាធរបារាំងបានសន្និដ្ឋានដឹងថា ក្រុមជនសង្ស័យកំពុងរៀបចំធ្វើភេរវកម្មដ៏ធំមួយ នៅដើមខែធ្នូខាងមុខ នៅក្នុងប្រទេសបារាំង។ ទីកន្លែងលាក់ខ្លួន និងលាក់អាវុធកាំភ្លើងAK ជាច្រើនដើម ត្រូវបានរកឃើញនៅក្នុងព្រៃឈ្មោះ Montmorency ភាគខាង ជើងក្រុងប៉ារីស។ លោករដ្ឋអាជ្ញាបារាំង បញ្ជាក់ថា ជនសង្ស័យទាំង៥មានទំនាក់ទំនងជាមួយគ្នា ព្រោះពួកគេមានទំនាក់ទំនង នឹងទទួលបញ្ជាដោយផ្ទាល់ពីមនុស្សតែម្នាក់គត់។ មនុស្សនោះ គឺជាមេបណ្តាញពួកជីហាតរបស់អង្គការរដ្ឋអ៊ីស្លាមប្រចាំនៅស៊ីរី និងអ៊ីរ៉ាក់ ដែលមានរហ័សនាមថា Abou Ali ហើយប្រហែលអាចជាជនជាតិបារាំង ផងក៏ថាបាន។
ជនសង្ស័យទាំង៥នេះ សុទ្ធតែធ្លាប់បានប៉ុនប៉ង ឆ្លងទៅចូលក្នុងទឹកដីស៊ីរី។ ជាងនេះទៅទៀត គេបានរកឃើញវីដេអូ ផ្សព្វផ្សាយមនោគមវិជ្ជារបស់ពួកជីហាតអង្គការរដ្ឋអ៊ីស្លាម នៅក្នុងម៉ាស៊ីនកុំព្យូទ័ររបស់ជនសង្ស័យ ក៏មានវីដេអូ ដែលជនសង្ស័យបានថតខ្លួនឯង ដើម្បីប្រកាសចុះចូលបំរើ នឹងសុខចិត្តស្លាប់ ជាមួយក្រុមដ៏ព្រៃផ្សៃនេះទៀតផង។
ការចាប់ខ្លួននេះគឺជាដំណឹងល្អមួយ តែក៏វាបង្ហាញផងដែរ អំពីការគំរាមកំហែងភេរវកម្ម ដែលមានជាប្រចាំថ្ងៃ នៅក្នុងប្រទេសបារាំង។ យ៉ាងណាក៏ដោយ លោករដ្ឋអាជ្ញាបារាំង បានអំពាវនាវឲ្យអ្នកសារព័ត៌មានទាំងអស់ មានការប្រុងប្រយ័ត្ន មុននឹងធ្វើការផ្សព្វផ្សាយព័ត៌មានណាមួយ ទាក់ទិននឹងប្រតិបត្តិការនេះ ព្រោះវាអាចធ្វើឲ្យខូចផែនការតាមប្រម៉ាញ់របស់សមត្ថកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ