បារាំង៖ ជិត២សែនគ្រួសារគ្មានអគ្គីសនីប្រើ ដោយសារព្យុះទឹកកកយ៉ាងគំហុក
ធាតុអាកាសដ៏អាក្រក់ កំពុងតែបោកបក់ មកលើប្រទេសបារាំង និងប្រទេសមួយចំនួនទៀត នៅអឺរ៉ុប។ បន្ទាប់ពីបានឆ្លងកាត់សីតុណ្ហភាពក្តៅខុសធម្មតា កាលពីសប្តាហ៍មុននេះ ស្រាប់តែពេលនេះ សីតុណ្ហភាព បានធ្លាក់ចុះយ៉ាងគំហុក ដោយនាំមកជាមួយ នូវព្យុះទឹកកក ខ្យល់បក់ក្នុងល្បឿនខ្លាំង អមដោយទឹកភ្លៀងផងដែរ។ នៅតំបន់ភាគកណ្តាលប្រទេសបារាំង ឈានទៅភាគឥសាន កំពុងរងគ្រោះខ្លាំងជាងគេ ដោយផ្លូវថ្នល់ បណ្តាញរថភ្លើងត្រូវជួបបញ្ហា ដោយសារតែទឹកកកធ្លាក់យ៉ាងគំហុក។ ផ្ទះប្រមាណជិត២សែនគ្រួសារ ពុំមានអគ្គីសនីប្រើប្រាស់។ នៅអ៊ីតាលីវិញ មានស្លាប់មនុស្ស៨នាក់។
ចុះផ្សាយនៅថ្ងៃ៖ កែប្រែថ្ងៃទី៖
នៅវេលាព្រឹកថ្ងៃអង្គារ ទី៣០តុលានេះ យ៉ាងហោចណាស់ មានតំបន់បារាំង ចំនួន១៧តំបន់ ដែលត្រូវស្ថិតក្នុងការប្រកាសអាសន្នកំរិតខ្ពស់ ដោយឧត្តុនិយមបារាំង។ ចាប់ពីភាគកណ្តាល រហូតដល់ភាគខាងកើត ឈាងខាងជើង នៃប្រទេសបារាំង កំពុងរងសំពាធ សីតុណ្ហភាពធ្លាក់ចុះ យ៉ាងខ្លាំង ពពកអួរអាប់ មានទឹកភ្លៀង អមដោយទឹកកកសំលី ដែលធ្លាក់ចុះដោយកន្លែង។
នៅតំបន់ Auverge ដែលស្ថិតក្នុងប្រជុំភ្នំ Massif central គឺជាតំបន់ដែលរងគ្រោះខ្លាំងជាងគេបំផុត ដោយទឹកកកបានធ្លាក់យ៉ាងគំហុង ក្នុងពេលដ៏ខ្លី នៅយប់ថ្ងៃចន្ទ ឈានចូលថ្ងៃអង្គារ។ ទឹកកកធ្លាក់កម្រាស់ ប្រហែល៥០សង់ទីម៉ែត្រ បានបង្កឲ្យមានការរាំងស្ទះ ដល់ការធ្វើដំណើរតាមផ្លូវថ្នល់ និងផ្លូវដែក។ រថយន្តដឹកទំនិញធន់ធំ ប្រមាណ១២៥០គ្រឿង និងរថយន្តធម្មតា ប្រមាណ៧០០គ្រឿងទៀត កំពុងជាប់គាំងនៅតាមផ្លូវថ្នល់នានា ក្នុងតំបន់Auverge។
ស្ថានភាពស្រដៀងគ្នានេះ មាននៅតាមតំបន់ផ្សេងៗទៀត សឹងតែមួយចំហៀងខាងកើត ប្រទេសបារាំង។ យោងតាម ក្រុមហ៊ុនគ្រប់គ្រង ការផ្គត់ផ្គង់អគ្គីសនីបារាំង Enedis បានឲ្យដឹងថា គ្រួសារប្រហែល១៩៥០០០គ្រួសារ កំពុងតែគ្មានចរន្តអគ្គីសនីប្រើប្រាស់ ដោយសារទឹកកក បានបំផ្លាញ កាត់ផ្តាច់ចរន្ត។ យោងតាមឧត្តុនិយមបារាំង ស្ថានភាពនេះ នឹងបន្តនៅថ្ងៃខាងមុខទៀត ដោយសំពាធនេះ នឹងរុញឡើងទៅភាគខាងជើង ធ្វើឲ្យសីតុណ្ហភាពធ្លាក់ចុះ អមជាមួយនឹងទឹកភ្លៀង ហើយដែលធ្វើឲ្យផ្លូវថ្នល់ ត្រូវក្រាលដោយកម្រាលទឹកកក រឹងរអិល។
សូមបញ្ជាក់ថា ជិត១សប្តាហ៍មកនេះ អឺរ៉ុប កំពុងនូវអាកាសធាតុដ៏អាក្រក់ ក្នុងល្បឿនលឿនបំផុត។ កាលពីថ្ងៃចន្ទ កោះCorse ភាគខាងត្បូប្រទេសបារាំង បានជួបនូវខ្យល់បក់បោកខ្លាំង ដែលបានបំផ្លាញបណ្តាញ និងកាត់ផ្តាច់ចរន្តអគ្គីសនីប្រមាណ២១០០០គ្រួសារ។ នៅប្រទេសអ៊ីតាលី ភាគខាងជើង ក្នុងតំបន់ភ្នំ ក៏មានការធ្លាក់ទឹកកកយ៉ាងគំហុក ដោយទីតាំងខ្លះទឹកកកធ្លាក់ រហូតមានកម្រាស់ ១ម៉ែត្រកន្លះ។ មានមនុស្ស៨នាក់ បានស្លាប់ ក្នុងឧបត្តិហេតុផ្សេងៗគ្នាបង្កឡើងដោយព្យុះទឹកកក ក្នុងរវាងថ្ងៃចន្ទ ឈានចូលថ្ងៃអង្គារនេះ។
គួរកត់សំគាល់ថា ការប្រែប្រួលអាកាសធាតុ កំពុងតែបង្ហាញរូបរាង្គពិតប្រាកដ តាមរយៈ ការប្រែប្រួលនូវរដូវកាល សីតុណ្ហភាព ក្តៅ ហើយធ្លាក់មកត្រជាក់ យ៉ាងរហ័ស ខុសពីធម្មតា។ កម្លាំងខ្យល់ និង បរិមាណទឹកកកធ្លាក់ មានកាន់តែខ្ពស់ ក្នុងពេលដ៏ខ្លី ហើយបង្កជាគ្រោះថ្នាក់ ដែលមនុស្សមិនបានត្រៀមរៀបចំ ទុកជាមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ