ទីក្រុងប៉ារីស ត្រៀមខ្លួនធ្វើជាម្ចាស់ផ្ទះនៃកីឡាអូឡាំពិកឆ្នាំ២០២៤
ចុះផ្សាយនៅថ្ងៃ៖
ស្តាប់ - ០៧:០១
នៅថ្ងៃពុធទី ១៣ កញ្ញានេះ គណកម្មាធិការអន្តរជាតិ កីឡាអូឡាំពិក នឹងត្រូវប្រជុំបោះឆ្នោតសម្រេច ប្រគល់ការរៀបចំកីឡាអូឡាំពិក ឆ្នាំ២០២៤ និង ឆ្នាំ២០២៨ ទៅឲ្យទីក្រុងពីរ គឺទីក្រុង ប៉ារីស និងទីក្រុង ឡូស អង់ហ្សឺឡេស។ ថ្វីបើមិនទាន់ក្លាយជាផ្លូវការ តែទីក្រុងប៉ារីស សង្ឃឹមជឿជាក់យ៉ាងខ្លាំង ថាបេក្ខភាពខ្លួន នឹងត្រូវបានគណកម្មាធិការអន្តរជាតិអូឡាំពិក ទទួលយក។ តែយ៉ាងណា ការទទួលធ្វើជាម្ចាស់ផ្ទះកីឡាអូឡាំពិកនេះ មិនបានធ្វើឲ្យទីក្រុងប៉ារីស គេចផុតពីការរិះគន់ឡើយ។ ការរិះគន់ ដោយផ្អែកលើការព្រួយបារម្ភ ថាទីក្រុងប៉ារីស ក៏ដូចជារដ្ឋាភិបាលបារាំង នឹងចំនាយប្រាក់ឥតប្រយោជន៍ ដោយពុំបានអ្វីត្រឡប់មកវិញ។
នេះជាលើកទីមួយហើយ ដែលគណកម្មាធិការអន្តរជាតិកីឡាអូឡាំពិក ធ្វើការបោះឆ្នោតសម្រេចប្រគល់ការរៀបចំកីឡានេះ២លើក ទៅឲ្យទីក្រុង២ ក្នុងពេលតែមួយបែបនេះ។ ពោលគឺឆ្នាំ២០២៤ ប្រគល់ទៅឲ្យទីក្រុងប៉ារីស និងឆ្នាំ២០២៨ ប្រគល់ទៅឲ្យទីក្រុងឡូស អង់ហ្សឺឡេស។
ទីក្រុងផ្សេងទៀតដកខ្លួនថយអស់ ទុកប៉ារីស ឲ្យគ្មានគូប្រកួត
សួរថា មិនទាន់បោះឆ្នោតសម្រេចផង ម្តេចក៏ដឹងច្បាស់ទៅហើយ? ងាយយល់ទេ គឺថា បេក្ខភាពចុងក្រោយគឺនៅសល់តែពីរទីក្រុងនេះទេ។ តាមពិតទៅ ពីដំបូង ទីក្រុងឡូសអង់ហ្សឺឡេស គឺជាបេក្ខភាពសម្រាប់កីឡាអូឡាំពិកឆ្នាំ២០២៤ ដូចក្រុងប៉ារីសដែរ តែក្រោយមក ឡូសអង់ហ្សឺឡេស ក៏សុំដកខ្លួនវិញ សុខចិត្តទទួលធ្វើនៅឆ្នាំ២០២៨ ជំនួសវិញ ដោយសារមូលហេតុហិរញ្ញវត្ថុ។ ដូច្នេះ ឆ្នាំ២០២៤ គឺមានតែក្រុងប៉ារីសតែមួយតែប៉ុណ្ណោះ ក្នុងពេលនេះ។
បើពិនិត្យទៅលើឯកសារដែលបេក្ខភាពនីមួយៗ បានដាក់បង្ហាញ តាំងតែពីដំបូងមក ទីក្រុងប៉ារីស មានបេក្ខភាពរឹងមាំ ហើយបំពេញលក្ខខណ្ឌបានល្អជាងគេ។ បេក្ខភាពស្នើសុំរៀបចំកីឡាអូឡាំពិកឆ្នាំ២០២៤ មានច្រើនក្រុងណាស់ ពីដំបូង ដូចជាទីក្រុង ហំបួររបស់អាល្លឺម៉ង់ ទីក្រុងប៊ូដាប៉េស្ត៍ របស់ហុងគ្រី ទីក្រុង បូស្តុនរបស់អាមេរិក និងទីក្រុងរ៉ូម ជាដើម តែពីមួយដំណាក់កាលទៅមួយដំណាក់កាល ទីក្រុងទាំងនោះ បានដកខ្លួនថយទាំងអស់ ទីមួយដោយសារមានការមិនយល់ស្រប ពីសំណាក់ មតិសាធារណៈ និងរដ្ឋាភិបាលរៀងៗខ្លួន ហើយទីពីរ គឺបានមើលឃើញថា បេក្ខភាពទីក្រុងប៉ារីស មានប្រៀបជាងឆ្ងាយណាស់។ ដូច្នេះហើយ បានជាពេលនេះ គឺនៅសល់តែបេក្ខភាពទីក្រុងប៉ារីសតែមួយគត់ សម្រាប់ឆ្នាំ២០២៤។
ប៉ារីស សក្តិសមនឹងទទួលធ្វើជាម្ចាស់ផ្ទះ
មានហេតុផលច្រើន ដែលទីក្រុងប៉ារីសសក្តិសមនឹងទទួល ធ្វើជាម្ចាស់ផ្ទះនៃកីឡាអូឡាំពិកឆ្នាំ២០២៤។ ទីមួយ គឺនៅប៉ារីសនេះហើយ ដែលលោក Pierre de Coubertin បានបង្កើតគណកម្មាធិការអន្តរជាតិ នៃកីឡាអូឡាំពិក ក្នុងឆ្នាំ១៨៩៤។ ទីពីរ គឺ ទីក្រុងប៉ារីស ធ្លាប់រៀបចំធ្វើជាម្ចាស់ផ្ទះ បានពីរដង គឺនៅឆ្នាំ១៩០០ និងឆ្នាំ១៩២៤។ ដូច្នេះ ដល់ឆ្នាំ២០២៤ គឺមានន័យថា មួយសតវត្សក្រោយមក ប៉ារីសនឹងក្លាយជាម្ចាស់ផ្ទះម្តងទៀត។ ប៉ារីស ធ្លាប់ធ្លាក់៣ដងមកហើយ លើកចុងក្រោយគេ គឺនៅឆ្នាំ២០១២ ដោយចាញ់បេក្ខភាពជ័យលាភីគឺ ទីក្រុងឡុងដ៍។ ដូច្នេះលើកនេះ គឺគេជឿថា ប៉ារីស សក្តិសមនឹងទទួលបានណាស់។
ហេតុផលចំបងមួយទៀត គឺដោយផ្អែកលើសំណុំឯកសារ គម្រោងរៀបចំកីឡាអូឡាំពិកនេះ ដែលក្រុមការងារទីក្រុងប៉ារីស បានរៀបចំដាក់ស្នើរទៅគណកម្មការអូឡាំពិក។ បើតាមប្រសាសន៍លោក Etienne Thobois ជាអគ្គនាយកបេក្ខភាពប្រកួត បានឲ្យដឹងថា សំណុំឯកសាររបស់ប៉ារីស ឆ្លើយតបទៅនឹងតថៈភាព ហើយមានលក្ខខណៈរឹងមាំជាងទីក្រុងណាៗទាំងអស់។ ទាំងផ្នែកហេដ្ឋារចនាសម្ព័ន្ធ ទាំងផ្នែកហិរញ្ញវត្ថុ គឺប៉ារីស មានប្រៀប និងទទួលបានការគាំទ្រយ៉ាងទូលំទូលាយ នៅក្នុងគណកម្មការអន្តរជាតិអូឡាំពិក។ ប៉ារីស ក៏មានផែនការច្បាស់លាស់ ក្នុងការកែច្នៃសំណង់ទាំងអស់ ដែលសាងសង់ក្នុងឱកាសនោះ យកទៅប្រើបន្ត ឲ្យមានប្រយោជន៍ មិនបោះបង់ចោលទេ។
បទពិសោធន៍កីឡាអូឡាំពិកទីក្រុងរីយ៉ូ ធ្វើឲ្យប្រជាជនបារាំងខ្លាច
ជាមួយនឹងវិបត្តិ ក៏ដូចជារឿងអាស្រូវ ដែលកើតឡើង នៅក្រោយការរៀបចំកីឡាអូឡាំពិកទីក្រុងរីយ៉ូ ប្រទេសប្រេស៊ីល កាលពីឆ្នាំ២០១៦ មានមតិមួយចំនួន បានលើកឡើងថា បារាំងមិនគួរធ្វើជាម្ចាស់ផ្ទះទេ ព្រោះគេនឹងចាយប្រាក់ឥតប្រយោជន៍ ខណៈដែលសេដ្ឋកិច្ចបារាំង កំពុងតែមានដំណើរការមិនសូវល្អផងនោះ។ ជាទូទៅ គេតែនិយាយថា ស្រុកណាទទួលរៀបចំកីឡាអូឡាំពិក ស្រុកនោះនឹងធ្លាក់ខ្លួនក្រ។ ធ្លាក់ខ្លួនក្រ ឬយ៉ាងណា គឺវាអាស្រ័យទៅលើធនធាន ដែលមានស្រាប់ ព្រមទាំងគំរោងចំណាយ របស់ទីក្រុងម្ចាស់ផ្ទះ។
ការទទួលធ្វើជាម្ចាស់ផ្ទះនៃកីឡាអូឡាំពិកនៅទីក្រុងរីយ៉ូ គឺ មានន័យដូចជាបណ្តាសារ។ ទីមួយគឺ ប្រេស៊ីល លោភ ចង់បានមុខមាត់ពេក។ ពោលគឺហ៊ានចាយហួសមាឌ។ ទទួលរៀបចំកីឡាបាល់ទាត់ពិភពលោកឆ្នាំ២០១៤ ហើយឆ្នាំ២០១៦ កីឡាអូឡាំពិកទៀត។ ការរៀបចំកីឡាសកលទាំងពីរនេះ គឺត្រូវការកសាងហេដ្ឋារចនាសម្ព័ន្ធច្រើនណាស់ ដើម្បីទទួលការប្រកួត គ្រប់វិញ្ញាសារ ទទួលគណប្រតិភូកីឡា មកពីគ្រប់បណ្តាប្រទេស ហើយបន្ថែមពីនេះ ត្រូវរៀបចំស្ថាបនាទីក្រុង និងមធ្យោបាយធ្វើដំណើរ សម្រាប់អ្នកដែលមកទស្សនាការប្រកួត។
ទាំងអស់នេះ ត្រូវចំណាយប្រាក់មហាសាល។ បញ្ហាចោទមួយទៀត គឺប្រើស៊ីល ពោរពេញដោយអំពើពុករលួយ។ យ៉ាងណាមិញ គណកម្មការអូឡាំពិករបស់ប្រេស៊ីល ក៏កំពុងតែជាប់ពាក្យបណ្តឹង ដែលគេចោទថាបានសូកប៉ាន់ គណកម្មាធិការអន្តរជាតិអូឡាំពិក ដើម្បីបានធ្វើជាម្ចាស់ផ្ទះ។ រឿងរ៉ាវពុករលួយ ដ៏ច្រើនស្អេកស្កះ គឺទាក់ទិននឹងក្រុមហ៊ុនដែលទទួលម៉ៅការសំណង់។ ទីបំផុត ក្រោយការប្រកួត ហេដ្ឋារចនាសម្ព័ន្ធ ពហុកីឡាដ្ឋាន ខ្សែរថភ្លើង ត្រូវបានបោះបង់ចោល រឺឯប្រជាជនដែលត្រូវគេបណ្តេញចេញ ដើម្បីយកដីសាងសង់ ក៏មិនបានទទួលសំណងត្រឹមត្រូវ។ ទាំងអស់នេះហើយ ដែលជារូបភាព បង្ហាញថា ប្រេស៊ីលសប្បាយតែមួយពេល តែចុងក្រោយ រលត់រលាយ កើតជាការក្តៅក្រហាយ។
ប៉ារីស មានហេដ្ឋារចនាសម្ព័ន្ធគ្រាប់គ្រាន់ នាំឲ្យចំណាយប្រាក់តិចបំផុត
ក្រុងប៉ារីស មិនមែនក្រុងរីយ៉ូទេ។ ប៉ារីស មានហេដ្ឋារចនាសម្ព័ន្ធ គ្រប់គ្រាន់ស្រេចទៅហើយ មិនថាវិស័យកីឡា កន្លែងស្នាក់នៅ និងវិស័យដឹកជញ្ជូនទេ។ យោងតាមផែនការ ក្រុងប៉ារីសគ្រោងចំណាយប្រមាណជា៦,៦ពាន់លានអឺរ៉ូ ខណៈដែលក្រុងរីយ៉ូ បានចំណាយលើសនេះដល់ទៅជាង២ដង។
បើតាមការឲ្យដឹង ទីក្រុងប៉ារីស មានគំរោងសាងសង់បន្ថែម តែអាងហែលទឹកមួយ និង ភូមិកីឡា ដើម្បីទទួលកីឡាករអត្តពលកម្ម មួយកន្លែងប៉ុណ្ណោះ បើគិតជាទឹកប្រាក់ប្រមាណជា ១,៣ពាន់លានអឺរ៉ូ។ ហើយភូមិកីឡានេះ នឹងត្រូវកែច្នៃយកទៅធ្វើជាផ្ទះស្នាក់នៅ សម្រាប់ប្រជាជនបារាំង នៅពេលចប់ការប្រកួត។ សរុបរួម គឺគំរោងសាងសង់ទាំងអស់ គឺគេនឹងកែច្នៃប្រើប្រាស់បន្តទៀត មិនមែនទុកចោលដូចនៅប្រេស៊ីលទេ។
ពេលប្រកួត ភ្ញៀវទេសចរណ៍រាប់លាននាក់ នឹងមកប៉ារីស។ ហើយមិនត្រឹមតែប៉ុណ្ណោះ ធ្វើជាម្ចាស់ផ្ទះកីឡាអូឡាំពិក នឹងលើកកិត្តិយសក្រុងប៉ារីស ឲ្យកាន់តែល្បីក្នុងក្រសែរភ្នែកទេសចរ។ ក្នុងខណៈដែលសេដ្ឋកិច្ចបារាំងកំពុងជាប់គាំង ព្រឹត្តិការណ៍នេះ និងជួយជំរុញលើកទឹកចិត្ត ជាពិសេសដល់វិស័យសេវ៉ាកម្ម ទេសចរណ៍ សណ្ឋាគារបារាំង ឲ្យមានសន្ទុះកាន់តែខ្លាំងក្លា។ ទាំងនេះហើយ ដែលជាអំណះអំណាងរបស់ទីក្រុងប៉ារីស ហើយប៉ារីស មានសមត្ថភាព និងលទ្ធភាពទទួលធ្វើជាម្ចាស់ផ្ទះ ដោយមិនឲ្យការចំណាយនេះ ក្លាយជាអាសារបង់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ