បារាំងនឹងបំពាក់គ្រាប់មីស៊ីល ទៅលើយានដ្រូនស៊ើបការណ៍របស់ខ្លួន
ក្រសួងការពារជាតិបារាំង ទើបបានប្រកាសឲ្យដឹងថា ខ្លួនបានសម្រេចថា នឹងបំពាក់អាវុធមីស៊ីល ទៅលើយានដ្រូនស៊ើបការណ៍សំងាត់របស់បារាំង។ លោកស្រីរដ្ឋមន្ត្រីក្រសួងការពារជាតិបារាំង បានប្រកាសដូច្នេះ នៅក្នុងពេលបិទបញ្ចប់ ការជួបជុំជជែក លើកទី១៥ នៃវិស័យការពារជាតិ ដែលធ្វើឡើង នៅទីក្រុងទូឡុង ភាគខាងត្បូងប្រទេសបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ឆ្លងកាត់ ការជជែកដេញដោល លើកហេតុផលជាច្រើនខែមកហើយ ទីបំផុតលោកស្រី Florence Parly រដ្ឋមន្ត្រីក្រសួងការពារជាតិបារាំង បានសម្រេចថា នឹងបំពាក់អាវុធមីស៊ីល (Missiles sol-air) ទៅលើយានដ្រូនស៊ើបការណ៍សំងាត់ របស់កងទ័ពបារាំង។
លោកស្រីរដ្ឋមន្រ្តីបានថ្លែងថា អន្តរាគមន៍របស់កងទ័ពបារាំង នៅឯបរទេស ត្រូវជួបនឹងសត្រូវ ដែលធ្វើបំលាស់ទីយ៉ាងរហ័ស នៅតាមទីវាលរហោស្ថានធំល្វឹងល្វើយ និងពេលខ្លះ នៅលាយឡំជាមួយនឹងប្រជាជនស៊ីវីល។ ការនេះតម្រូវឲ្យកងទ័ពបារាំង ត្រូវតែធ្វើទំនើបកម្ម អាចបត់បែន នឹងធ្វើបំលាស់ទីឲ្យរហ័ស ឲ្យសមស្របទៅតាមស្ថានការណ៍ និងកាលៈទេសៈ។ ដូច្នេះ មធ្យោបាយធ្វើប្រតិបត្តិការរបស់កងទ័ពបារាំង ក៏ត្រូវតែមានឲ្យច្រើន ដើម្បីសម្រេចឲ្យបានគោលដៅ ហើយមិនប្រឈមមុខនឹងការបាត់បង់ជីវិតមនុស្ស។
សូមបញ្ជាក់ថា បច្ចុប្បន្ន បារាំងមានយានដ្រូនស៊ើបការណ៍សំងាត់ ចំនួន៦គ្រឿង ដែលបារាំង បានទិញពីអាមេរិក។ ដ្រូន៥គ្រឿងក្នុងចំណោម៦គ្រឿងនេះ កំពុងបំពេញការងារនៅ ឯប្រទេសនីហ្ស៊េ ក្នុងតំបន់ Niamey។ ដ្រូនទាំង៦គ្រឿងនេះ នឹងត្រូវយកទៅកែច្នៃ ដើម្បីបំពាក់គ្រាប់មីស៊ីល នៅរវាងឆ្នាំ២០១៨។ ក្រៅពីនេះ បារាំងបានបញ្ជាទិញយានដ្រូនថ្មី ៦គ្រឿងទៀត ផលិតដោយក្រុមហ៊ុន General Atomics ដែលនឹងត្រូវផលិតឡើង បំពាក់ជាមួយនឹងអាវុធមីស៊ីលតែម្តង។ ដ្រូនថ្មីទាំង៦គ្រឿង នឹងត្រូវដាក់ឲ្យប្រើប្រាស់ នៅរវាងឆ្នាំ២០១៩។
គួរកត់សំគាល់ដែរថា ជាមួយនឹងប្រតិបត្តិការនៅខាងក្រៅ ព្រមទាំងការគំរាមកំហែងភេរវកម្ម កាន់តែធ្ងន់ទៅៗ ប្រទេសនៅអឺរ៉ុប កំពុងតែរកវិធីការពារសុវត្ថិភាព តាមរយៈបច្ចេកវិទ្យាដ្រូន។ យ៉ាងណាមិញ បារាំង ក៏មានគម្រោងសហការ ជាមួយអាល្លឺម៉ង់ អ៊ីតាលី និងអេស្ប៉ាញ ដើម្បីផលិតយានដ្រូនស៊ើបការណ៍មួយប្រភេទ ដែលនឹងក្លាយជាសមិទ្ធិផលរបស់អឺរ៉ុប។ តាមការគ្រោងទុក យានដ្រូនរបស់អឺរ៉ុបនេះ នឹងត្រូវដាក់ឲ្យប្រើប្រាស់ នៅរវាងឆ្នាំ២០២៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ