បារាំង៖ ហិង្សាធ្ងន់ធ្ងរកណ្តាលប៉ារីស ជាមួយនឹងបាតុកម្មលើកទី១៨ របស់ក្រុមអាវកាក់លឿង
នៅបារាំង ដូចជារៀងរាល់ថ្ងៃសោរ៍ ប្រមាណជាង៣ខែមកនេះ គឺក្រុមអាវកាក់ពណ៌លឿង បានធ្វើបាតុកម្ម ដើម្បីប្រឆាំង នឹងរដ្ឋាភិបាលរបស់លោកម៉ាក្រុង។ បន្ទាប់ពីបានថមថយកម្លាំងមួយរយៈ ចលនាបាតុកម្មនេះ បានបង្កឲ្យមានអំពើហិង្សាយ៉ាងធ្ងន់ធ្ងរ កាលពីថ្ងៃសោរ៍ទី១៦មីនា នៅទីក្រុងប៉ារីស។ ភោជនីយដ្ឋាន ហាងទំនិញធំៗជាច្រើន ត្រូវបានក្រុមបាតុករជ្រុលនិយម វាយបំផ្លាញ និងចូលលួចយកទំនិញ។ ក្រុមបាតុករ ក៏បានដុតបំផ្លាញអាគារមួយកន្លែង។ រដ្ឋាភិបាលបារាំង បានសន្យាថានឹងមិនអត់ឱន ឲ្យជាដាច់ខាតដល់ជនឆក់ឱកាស ដែលមកចូលរួមបាតុកម្ម ក្នុងគោលបំណងតែមួយគត់ គឺវាយកំទេច បំផ្លេចបំផ្លាញ បង្កអគ្គីភ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ដូចសព្វមួយដង ទីលានរង្វង់មូលវិមានជ័យជំនះ ក្នុងសង្កាត់សង់អេលីហ្សេ បានក្លាយជាចំណុចប្រមូលផ្តុំ របស់ក្រុមអាវកាក់ពណ៌លឿង។ ចាប់ពីម៉ោង១១ព្រឹក បាតុករអាវកាក់ លឿង មានចំនួនយ៉ាងហោច១ម៉ឺននាក់ បាននាំគ្នាដើរសំដៅទៅទីនោះ ខណៈដែលការប្រឈមមុខដាក់គ្នា រវាងហ្វូងបាតុករ និងសមត្ថកិច្ច បានចាប់ផ្តើម។
ភាពចលាចលអនាធិបតេយ្យបានកើតឡើង ដោយក្នុងចំណោមហ្វូងបាតុករអាវកាក់លឿង មានលាយឡំទៅដោយក្រុមជនជ្រុលនិយម ស្លៀកខ្មៅ បិទមុខជិត។ លោក Christophe Castaner រដ្ឋមន្ត្រីក្រសួងមហាផ្ទៃ បានលើកឡើងថា ក្នុងចំណោមបាតុករ១ម៉ឺននាក់ មានយ៉ាងហោច ១៥០០នាក់ គឺជាបាតុករក្លែងក្លាយ ហើយពួកនេះ គឺជាពួកហិង្សាជ្រុលនិយមបំផុត។
យោងតាមក្រុមអ្នកយកព័ត៌មានបារាំង ហ្វូងបាតុករបានចាប់ផ្តើម គាស់ដុំថ្មពីផ្លូវ គប់ចោលទៅលើសមត្ថកិច្ច។ ទីលានវិមានជ័យជំនះ បានគ្រប់ដណ្តប់ទៅដោយផ្សែងក្រាស់ឃ្មឹក ដែលចេញពីគ្រាប់បែបផ្សែង រាប់រយគ្រាប់ ដែលសមត្ថកិច្ចបានប្រើ ដើម្បីបំបែកបាតុករ ដែលពុះកញ្ជ្រោល។ ក្រុមបាតុករបានគាស់រំលើង វាយកំទេចហាងទំនិញធំៗ ជាច្រើនកន្លែងនៅក្នុងសង្កាត់សង់អេលីហ្សេ។ តូបលក់កាសែតជាច្រើនកន្លែង ត្រូវបានក្រុមបាតុករដុតកម្ទេច។ ភោជនីយដ្ឋានបារាំង តម្លៃថ្លៃ ដ៏ល្បី ឈ្មោះLe Fouquet’s ត្រូវបានហ្វូងបាតុករវាយកម្ទេច សឹងតែគ្មានសល់។ នៅតាមជញ្ជាំងអាគារ បាតុករខ្លះ បានសរសេរថា “ពួកអ្នកមានត្រូវតែស្លាប់”។ ហើយបាតុករខ្លះ បានស្រែកថា “យើងនឹងដុតឲ្យឆេះខ្ទេច”។
នៅវេលាម៉ោងប្រមាណ១និង៣០នាទី ក្រុមមនុស្សមួយក្រុម បានដុតបំផ្លាញការិយាល័យធនាគារមួយកន្លែង។ អគ្គិភ័យបានឆាបឆេះអាគារទាំងមូល ដោយក្រុមពន្លត់អគ្គិភ័យ បានចូលទៅជន្លៀសប្រជាជនដែលរស់នៅអាគារនោះ។ មនុស្សយ៉ាងហោចណាស់១១នាក់បានរងរបួស។ រដ្ឋមន្ត្រីមហាផ្ទៃបារាំង បានចាត់ទុកអ្នកបង្កអគ្គីភ័យនេះ ថាគឺជា “ឃាតករ”។
អ្នកនាំពាក្យរដ្ឋាភិបាលបារាំង បានអះអាងថា រដ្ឋាភិបាលនឹងមិនអត់ឱនឲ្យជាដាច់ខាត ចំពោះអំពើហិង្សា បំផ្លេចបំផ្លាញទ្រព្យសម្បតិ្តសាធារណៈនិងឯកជន បង្កឡើយដោយក្រុមជ្រុលនិយម។ សមត្ថកិច្ចនិងមិនរាថយ មិនចុះញ៉ម ជាដាច់ខាត ដើម្បីការពារសន្តិសុខសុវត្ថិភាពជូនពលរដ្ឋ ក៏ដូចជាពាណិជ្ជករទូទៅ។
គួរកត់សំគាល់ថា នៅថ្ងៃសៅរ៍ ទី១៦មីនាដែរ នៅទីក្រុងប៉ារីស មានការដង្ហែរក្បួនបាតុកម្មមួយទៀត ដែលមានមនុស្សចូលរួមប្រមាណ ៣ម៉ឺននាក់។ ជាក្បួនបាតុកម្មទាមទារឲ្យរដ្ឋភិបាល គិតគូរពីបញ្ហាបរិស្ថានធម្មជាតិ និងអាកាសធាតុនៃភពផែនដី។ ខុសពីបាតុកម្មរបស់ក្រុមអាវកាក់លឿង បាតុកម្មរបស់ក្រុមអ្នកបារម្ភពីអាកាសធាតុ បានប្រព្រឹត្តធ្វើទៅក្នុងសភាព យ៉ាងស្ងប់ស្ងាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ