ការស្រាវជ្រាវផ្អែកលើទឹកកកភ្នំ អាចដឹងពីអតីតកាល កាលពី១៨០០០ឆ្នាំមុន
អ្នកវិទ្យាសាស្ត្រនៃសកលវិទ្យាល័យហ្ក្រឺណូប ប្រទេសបារាំង ទើបតែបានដឹកជញ្ជូនការ៉ុតទឹកកក ដែលគេបានខួងយក ពីលើកំពូលភ្នំកំពស់ជាង៦ពាន់ម៉ែត្រ នៅប្រទេសបូលីវី ទៅដល់ទីពិសោធន៍នៅប្រទេសបារាំង។ នេះជាតំណាក់កាលទីពីរ ហើយ នៃគំរោងស្រាវជ្រាវ ដោយផ្អែកលើទឹកកកភ្នំ ដែលមានអាយុ រាប់ពាន់ឆ្នាំ។ ទឹកកកទាំងនោះ នឹងអនុញ្ញាតឲ្យដឹង អំពីការវិវឌ្ឍន៍ នៃសីតុណ្ហភាព និងកត្តាអាកាសធាតុ របស់ភពផែនដី ចាប់តាំងពី១ម៉ឺន៨ពាន់ឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ការ៉ុតទឹកកកសរុបប្រមាណ៣តោន ត្រូវបានគេដឹកជញ្ជូនយកពីទ្វីបអាមេរិកខាងត្បូង មកដល់មន្ទីរពិសោធន៍នៃសកលវិទ្យាល័យហ្រ្កឺណូប ប្រទេសបារាំង បានដោយជោគជ័យ។ ការ៉ុតទឹកកក ដែលមានប្រវែងមួយម៉ែត្រ សរុបចំនួន២៥០ដើមនេះ ត្រូវបានក្រុមអ្នកស្រាវជ្រាវ ខួងយក មកពីកំពូលជួរភ្នំ Andes នៅប្រទេសបូលីវី ត្រង់កំរាលទឹកកកឈ្មោះ Illimani ដែលស្ថិតនៅកំពស់ ៦៣០០ម៉ែត្រ។ ការដឹកជញ្ជូន បានចំណាយពេល៥០ថ្ងៃ ដោយត្រូវប្រើសម្ភារៈបច្ចេកទេសយ៉ាងសន្ធឹកសន្ធាប់ ដើម្បីរក្សាការ៉ុតទឹកកកទាំងនោះកុំឲ្យរលាយ។
គម្រោងនេះ មានឈ្មោះថា Ice Memory ឬ "ការចងចាំនៅក្នុងទឹកកក" ដែលផ្តួចផ្តើមឡើងដោយសកលវិទ្យាល័យទីក្រុងហ្រ្កឺណូប និងអ្នកវិទ្យាសាស្ត្របរទេសមួយចំនួនទៀត។ លោក Jérôme Chapellaz ប្រធានគំរោងស្រាវជ្រាវនេះ បានលើកឡើងថា ការ៉ុតទឹកកក មកពីតំបន់ Illimani ប្រទេសបូលីវីនេះ នឹងនាំអ្នកស្រាវជ្រាវ ឲ្យត្រលប់ទៅកាន់១៨០០០ឆ្នាំមុន។ គេនឹងស្រាវជ្រាវអំពីការវិវឌ្ឍន៍នៃអាកាសធាតុ សីតុណ្ហភាពរបស់ផែនដី។ បន្ថែមពីនេះ អ្វីដែលអ្នកស្រាវជ្រាវចាប់អារម្មណ៍បំផុត គឺការវិវឌ្ឍន៍នៃបាតុភូត El Niño ដែលបានកើតឡើងកាន់តែញឹកញាប់ និងកាន់តែធ្ងន់ធ្ងរ ក្នុងរយៈពេលប៉ុន្មានឆ្នាំចុងក្រោយនេះ។
សូមបញ្ជាក់ថា នេះគឺជាដំណាក់កាលទីពីរ នៃគម្រោង Ice Memory។ កាលពីខែសីហា ឆ្នាំ២០១៦ អ្នកវិទ្យាសាស្ត្របានខួងយកទឹកកក ពីតំបន់ជួរភ្នំAlpes នៅប្រទេសបារាំង ដែលស្ថិតនៅកំពស់ ៤៣០០ម៉ែត្រ។ ដំណាក់កាលបន្ទាប់ទៅទៀត គឺនៅឆ្នាំ២០១៨ គេមានគំរោងខួងយកទឹកកក ពីកំពូលភ្នំ Elbrouz ដែលស្ថិតក្នុងតំបន់កូកាសរុស្ស៊ី។ ក្រុមអ្នកស្រាវជ្រាវ មានគំរោងមួយទៀត គឺកសាងតំបន់ស្តុកការ៉ុតទឹកកកនេះទុក នៅមហាសមុទ្រទឹកកកអង់តាក់ទិក ព្រោះទីនោះអាចមានសីតុណ្ហភាពថេរក្នុងកំរិត -៥០°c ដែលអាចរក្សាការ៉ុតទឹកកកបានយូរអង្វែង។ តែយ៉ាងណា លោកប្រធានគំរោងនេះ បានលើកឡើងថា វាអាស្រ័យថា តើគេអាចទទួលបានជំនួយថវិកា គ្រប់គ្រាន់ដែររឺទេ។
ប្រធានគំរោងនេះ ក៏បានឆ្លៀតបន្ថែមថា វិស័យស្រាវជ្រាវដោយផ្អែកលើទឹកកកភ្នំនេះ ទើបតែចាប់បដិសន្ធិនៅទសវត្សទី៦០ប៉ុណ្ណោះ។ បច្ចុប្បន្នការស្រាងជ្រាវ ផ្តោតសំខាន់ទៅលើកត្តាអាកាសធាតុ។ តែទៅថ្ងៃខាងមុខ ការស្រាវជ្រាវនេះ អាចវិវឌ្ឍន៍ទៅរកវិស័យវិជ្ជសាស្ត្រសុខាភិបាល ព្រោះថានៅក្នុងការ៉ុតទឹកកកទាំងនោះ មានផ្ទុកទៅដោយ បាក់តេរី និងមេរោគ កាលពីរាប់ពាន់ឆ្នាំមុន រាប់លានប្រភេទឯណោះ។ គេនៅចាំតែ ស្រាវជ្រាវរកវិធី យកវាចេញមកវិភាគ តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ